1 SAMUEL 31 - Pathien Lekhabu Inthieng (BSI)

Saula le a nauhai thi thu

¹ Chuongchun, Philistin mihai chun Israel mihai chu an do a, chun, Israel mihai chu Philistin mihai hmaa chun an tlânse a: Gilboa tlânga chun thatin an um ta zul el a.

² Chun, Philistin mihai chun Saula le a naupasalhai chu an hnawt zui ta ngat ngat a; chun, Philistin mihai chun Saula naupasalhai, Jonathan le Abinadab le Malkisua chu an that a.

³ Chun, Saula chu an thaw nasa ta êm êm el a, thal kâp mihai chun an hnawt phâk ta a: thal kâp mihai lei chun a lunginzîng ta êm êm el a.

⁴ Chuongchun, Saula chun a râlthuom chawitu kuoma chun, “I kâwlhnâm kha phawi la, mi hang sunthleng rawh, chuong naw chun hieng sertanlohai hi hung an ta, mi hung sunthleng an ta, mi uongkhum nghe nghe rawi an tih,” a ta. Nisienlakhawm, a râlthuom chawitu chun a thaw nuom naw a, a ṭi êm êm el si a. Chuleiin, Saula chun kâwlhnâm chu a lâk a, a bawlût ta a.

⁵ Chun, a râlthuom chawitu chun Saula a thi ti a hriet chun, ama khawm chun a kâwlhnâm chu a bawlût ve a, an thi rêl ta a.

⁶ Chuongchun, Saula leh, a naupasal pathumhai leh, a râlthuom chawitu leh, a mihai po po leh, chu ni ngei chun an thi seng tah a nih.

⁷ Chun, ruom râl khingtienga Israel mi umhai le Jordan râla umhaiin Israel mihai an tlânsie ti le Saula le a naupasalhai an thi ti an hriet chun, khuohai chu an suoksan a, an tlânhmang ta a; chun, Philistin mihai chun an va hluo ta a.

⁸ Chun, a zînga chun Philistin mihaiin an râl thathai thuom hlîppêk dinga an va fe chun Saula le a naupasal pathumhai Gilboa tlânga an lo thi chu an va hmu a.

⁹ Chun, a lu chu an tan a, a râlthuom chu an hlîp a, chanchin chu an milim biekna ina le mihai kuoma phuong dingin Philistin rama chun an inphur vêl a.

¹⁰ A râlthuom chu Astaroth inah an sie a, a ruong chu Bethsan kul banga chun an târ a.

¹¹ Chun, Jabes-gileada umhaiin Philistin mihaiin Saula an thaw dân chungchâng thu chu an lo hriet chun,

¹² mi huoisenhai po po chu an tho a, zânkhawvârin an fe a, Saula ruong le a naupasalhai ruong Beth-san kul banga inthawk chun an lâk a; chun, Jabes an hung tlung a; chutaka chun an raw a.

¹³ Chun, an ruhai chu an lâk a, Jabesa tamarisk thing hnuoiah an phûm a; chun, ni sari bu an nghei a.