1 SAMUEL 30 - Pathien Lekhabu Inthieng (BSI)

Davidin Amalek mihai a tukdei

¹ Chun, a ni thum nia David le a mihaiin Ziklag an tlung chun Amalek mihaiin Simtieng le Ziklag khuo chu an lo rûn zing ta a. Ziklag khuo chu an lo sawisa a, an lo raw a;

² nuhmeihai le chu khuoa um taphawthai chu a chîn a lienin salah an man a, tukhawm that lovin an ṭhuoi a, an fepui ta a.

³ Chun, David le a mihaiin khuo an va tlung chun, ngai ta, a lo kâng fai vawng ta a; chun, an nuhmeihai, an naupasalhai, an naunuhmeihai chu salin an lo man ta a.

⁴ Chuongchun, David le a kuoma umhai chun an râwl an insuo a, ṭap hlei thei lo lêkin an ṭap a.

⁵ Chun, David nuhmeihai pahni Jezreel mi Ahinoam le Karmela mi Nabal nuhmei Abigail hai khawm chu salin an ṭhuoi ta a.

⁶ Chun, David chu a lunginzîng hle el a, mi tin an naupasalhai le an naunuhmeihai leiin mi po po an lungril a na êm êm a, ama chu lunga dêng thu an hril leiin; nisienlakhawm, David chu a Pathien Lalpaa chun ân sukhrât a.

⁷ Chun, David chun Ahimelek naupa thiempu Abiathar kuoma chun, “Thiempu zakawsîng mi va lapêk raw khai,” a ta. Abiathar chun David chu thiempu zakawsîng a va lâkpêk a.

⁸ Chun, David chun, “Chuonghai chu hnawt lang, la hnawt phâk ka ti?” tiin Lalpa ân dawn a. Ama chun a hung dawn a, “Hnawt rawh, hnawt phâk ngei ngei i ta, sansuok vawng ngei ngei i tih,” a ta.

⁹ Chuongchun, David chu a fe ta a, ama le a kuoma mi za rukhai le chun; chun, Besor vadung chu an va tlung a, chutaka chun an mi mâksanhai chu an um a.

¹⁰ David ruok chun a hnawt pei a, ama le mi za lihai le chun, mi za hni chu an chau ta leiin Besor vadung chu an kai thei ta naw a, an lo um tah a nih.

¹¹ Chun, phûla hin Aigupta mi an va hmu a, David kuoma chun an ṭhuoi a, bei an pêk a, a lo fâk a; chun, tui dâwn ding an pêk a;

¹² chun, theichang hlawm tlang khat le grêp ra emṭâwl bâwr hni an pêk a; chun, chuong chu a hang fâk chun a hung har nâwk ta a; ni thum le zân thum bu fa lo le tui dâwn lo a ni si a.

¹³ Chun, David chun a kuomah, “Tu mi am i na? Khâwlaia inthawka hung am i ni a?” a ta. Ama chun, “Aigupta ram tlangvâl, Amalek mi siehlaw ka na; chun, ni thum a ni ta a, ka dam naw leiin ka pu chun a mi mâksan el a nih.

¹⁴ Kereth Sim ram le Juda chan Sim ramhai kan rûn a, chun, Kaleb Sim ram kan rûn bawk a; chun, Ziklag khuo khawm kan raw a,” a ta.

¹⁵ David chun a kuomah, “Chuonghai rawi umnaa chun mi zu ṭhuoi thei i ti?” a ta. Ama chun, “Mi that lo ding le, ka pu kuta mi pe nâwk lo dingin Pathien hming sâlin ṭawng inkhâm la, chuongchun, chuonghai umnaa chun zu ṭhuoi ka ti che,” a ta.

¹⁶ Chun, a zuk ṭhuoi thlâk chun, ngai ta, Philistin ram le Judai rama râllâk tamtak an lâk leiin ruoi an ṭhe a, an fâkin an dâwn a, an lo um dar nei nuoi a.

¹⁷ Chuongchun, David chun nisa tlâka inthawkin a zînga zântieng chenin a thaw ta a, tlangvâl za li, sanghâwngsei chunga chuonga tlânsehai ti chau naw chu tukhawm dama suok hrim hrim an um nawh.

¹⁸ Chun, David chun Amalek mihaiin an lâk po po chu a lâk nâwk vawng a; chun, David chun a nuhmei pahnihai chu a sansuok bawk a.

¹⁹ Chuongchun, a chîn a lienin an naupasalhai, an naunuhmeihai, an râllâk le an thil lâk hrim hrim iengkhawm chân an nei naw a, David chun a lâkpêk nâwk vawng a nih.

²⁰ Chun, David chun berâm ruol le ran ruolhai po po chu a lâk a, ran danghai hmaa chun an khal a, “Hieng hi David râllâk a ni hi,” an ta.

²¹ Chun, mi za hni an châu leia David zui thei lova Besor vadunga an inumtirhai kuom chu David chun a va tlung a; chun, anni chu David tuok ding le a kuoma um vehai chu tuok dingin an fe suok a; chun, David chun mipuihai kuom a va tlung chun chibai a bûk tâwl a.

²² Chuongchun, David kuoma fe vehai laia mi suolhai le Belial mihai po po chun an dawn a, “Ei kuoma an fe ve naw leiin râllâk thil ei va lâkpêk nâwk hrim hrim chu pe ve nâwng ei ta, an ṭhuoi a, an fe theina dingin an nuhmeihai le an nauhai seng ruok chu an ṭhuoi phal ei tih,” an ta.

²³ Chuongchun, David chun, “Unauhai, Lalpa chun a mi humpêk a, mi do dinga hung inthawkhai ei kuta petu thil mi pêkhai chu chuong ang chun thaw naw ti niu.

²⁴ Tuin am hi thua hin in thu hi pawm a ta? Indonaa zu fehai chan ang bawk chu thuomhnaw vênga lo umhai chun an chang ve ding annâwm; inang vawnga chang ding a nih,” a ta.

²⁵ Chuongchun, chu nia inthawk tu chen hin Israelhai ta dinga thupêk le dâna nei dingin a siem ta a.

²⁶ Chun, Davidin Ziklag khuo a tlung chun, râllâk ṭhenkhat chu, “Hi hi Lalpa hmêlmahaia inthawka râllâk, lâwmman dingin kân phur cheu,” tiin,

²⁷ Bethela um dâm, Sim Ramotha um dâm, Jattira um dâm:

²⁸ Aroera um dâm, Sipmotha um dâm, Estemoa um dâm:

²⁹ Rakala um dâm, Jerahmeel khuohaia umhai dâm, Ken khuohaia umhai dâm:

³⁰ Hormaa umhai dâm, Borasana umhai dâm, Athaka umhai dâm,

³¹ Hebrona umhai dâm, David le a mihai chêttlatna hmun po poa um Juda upa, a ruolhai kuoma chun a thawn a.