1 SAMUEL 3 - Pathien Lekhabu Inthieng (BSI)

Lalpain Samuel a ko

¹ Chun, naupang Samuel chun Eli hmaa chun Lalpa rawng a bâwl a. Chuong lai chun Lalpa thu chu a hlu hle el a, ân langa inlârnahai a um naw a.

² Chun, hieng hi a hung na, Eli chu ama hmuna a zâl laiin (a mit ân thim ta deu a, khuo a hmu ṭha thei mang ta naw a),

³ Pathien khâwnvar khawm a la thi hmain, Pathien bâwm umna Lalpa biek ina chun Samuel chu a hang zâl a;

⁴ Lalpa chun Samuel chu a ko a, ama chun, “Hitaka hi ka um,” a ta.

⁵ Chun, Eli kuoma chun a va tlân a, a kuomah, “Hitaka hi ka um, i mi ko a,” a ta. Ama chun, “Ka ko naw che ie, va zâl nâwk ta rawh,” a ta.

⁶ Chun, Lalpa chun Samuel chu a ko nâwk a. Samuel chu a tho a, Eli kuoma chun a feh a, “Hitaka hi ka um, i mi ko a,” a ta. Ama chun a dawn a, “Ka ko naw che ie, ka naupa, va zâl nâwk ta rawh,” a ta.

⁷ Chuong lai chun Samuel chun Lalpa a la hriet naw a, Lalpa thu a kuoma puong a la ni naw bawk a.

⁸ Chun, Lalpa chun Samuel a ko nâwk a, chu chu a vawi thumna a nih. Chun, a tho a, Eli kuoma chun a fe a, “Hitaka hi ka um, i mi ko a,” a ta. Chuongchun, Eli chun naupang chu Lalpain a ko a nih ti a lo hriet ta a.

⁹ Chuleiin, Eli chun Samuel kuoma chun, “Fe la, va zâl nâwk phawt la, a ko nâwk che chun, ‘Lalpa, thu hril rawh, i siehlaw hin a ngai zing,’ ti el rawh” a ta. Chuongchun, Samuel chu a hmuna chun a va zâl nâwk ta a.

¹⁰ Chun, Lalpa chu a hung a, a hung ngîr a, a hmaa a ko ang khan, “Samuel, Samuel,” tiin a ko nâwk a. Chuongchun, Samuel chun, “Thu hril rawh, I siehlaw hin a ngai zing,” a ta.

¹¹ Chun, Lalpa chun Samuel kuoma chun, “Ngai ta, Israel rama hin a hre taphawthai na chu a khing hni hnia a ṭhâwng zâwngtakin thil ka thaw ding a nih.

¹² Chu ni chun a sûngkuo chungchâng thu ka hril po po chu a bula inthawka a tâwp chenin Eli chunga hin ka thaw ding a nih.

¹³ A nauhaiin Pathien an hrilsietna suol chu hre zing pumin a khap naw leiin a sûngkuo chu kumkhuoa dingin ka ngaituo ding a nih ti ka hril ta si a.

¹⁴ Chuleiin, Eli sûngkuo kuoma chun Eli sûnghai bawsietna chu inthâwinain amanih, thilinhlânin amanih iengtika khawm sukkieng thei ni naw nih, tiin ṭawng kân khâm tah a nih,” a ta.

¹⁵ Samuel chu zingkâr chenin a zâl a; chun, Lalpa in kawtkhârhai chu a hawng a, Samuel chun chuong inlârna chu Eli inhriettir ding chu a ṭi a.

¹⁶ Chun, Eli chun Samuel chu a ko a, “Samuel, ka naupa,” a ta. Ama chun, “Hitaka hin ka um,” a ta.

¹⁷ Chun, ama chun, “Ieng thil am Lalpa chun i kuomah a hril lie? Ka kuoma hin iengkhawm ip naw raw aw; i kuoma a hril po po chu ka kuomah ip i nei chun i chungah Pathien chun a thaw thawin thaw sienla, chu nêka nasa khawmin,” a ta.

¹⁸ Chun, Samuel chu a hung a, iengkim el chu a hril fai vawng a, a kuoma chun iengkhawm ip a nei naw a. Chun, ama chun, “Lalpa a nih annâwm, ṭha a ti ang peiin thaw raw se,” a ta.

¹⁹ Chun, Samuel chu a hung inṭhanglien deu deu a, a kuomah Lalpa a um pei a; a thu hrim hrim chu leihnuoiah ân luonghmangtir el naw a.

²⁰ Chuongchun, Dana inthawka Beerseba tlung rakin Israel mi po pohai chun Samuel chu Lalpa zâwlnei dinga sukdet a ni tah ti an hriet ta a.

²¹ Chun, Lalpa chu Siloa chun ân lâr nâwk a; Lalpa chu thuin Samuel kuoma chun Siloa chun ân lâr a ni si a.