1 SAMUEL 29 - Pathien Lekhabu Inthieng (BSI)

Philistin mihaiin David an ringhla

¹ Chuongchun, Philistin mihai chun an sipaihai po po chu Apheka chun an ko khâwm vawng a; chun, Israel mihai chun Jezreela tui- khur kâwlah ṭhanghmun an khuor a.

² Chun, Philistinhai lalhai chu sâng têl têl dâmin, za têl têl dâmin an fe zut zut el a.

³ Chun, David le a mihai le Akis le chun hnung an dâl a. Chuongchun, Philistin lalhai chun, “Hieng Hebrai mihai hi ieng thaw am an ni leh?” an ta. Akis chun Philistin lalhai kuoma chun, “Hi David, Israelhai lal Saula siehlaw, hi chen rau ka kuoma um ta a, ka kuoma a hung tlûklûta inthawka tu chen khawma a suolna ka hmu nawna chu a ni naw am a nih?” a ta.

⁴ Nisienlakhawm, Philistin lalhai chu a chungah an lunginsen a, a kuomah, “Ama chu i hmun ruotpêka khan kîr nâwk dingin infetir la, indonaah kan kuoma chun fe ve naw raw se; chuong naw chun indonaah ei hmêlmahai tieng ṭhang el rawi a tih; hieng mihai luhai laia ding hin hi mipa hi a lalpa leh an inrem nâwk el âwm de aw?

⁵ Hi David hi a ni naw am a nih lâm puma: ‘Saulain a sânga sâng a that a, Davidin a sînga sîng a that a,’ tia a chungchâng thu hlaa an sak kha?” an ta.

⁶ Chuongchun, Akis chun David chu a ko a, a kuomah, “Lalpa hringna sâlin ka hril a nih, mi indiktak i lo na, sipaihai lai ka kuoma i fea i hung hlak chu ka mithmua chun a ṭha hle el a; ka kuoma i hung nia inthawk vawisûn chen hin i chungah iengkhawm ṭhat nawna hrim hrim ka hmu dêr naw a; nisienlakhawm, lalhai rawi hin an ngaina naw che a nih.

⁷ Chuleiin, Philistin lalhai i suklungninaw nawna dingin kîr nâwk la, lungâwitakin fe el rawh,” a ta.

⁸ David chun Akis kuomah, “Anleh ieng thil am ka lo thaw leh? i kuoma ka um sûng po vawisûn chen hin, ka pu, laltak hmêlma chu do lova ka hang kîr nâwk elna dingin i siehlaw chunga hin ieng am hriet i nei leh?” a ta.

⁹ Akis chun a dawn a, David kuomah, “Ka mithmua chun Pathien vântirko ang elin i ṭha a, nisienlakhawm, Philistin lalhai hin, ‘Indonaah kan kuomah hung ve naw nih,’ an ti tlat el a.

¹⁰ Chuleiin, i kuoma fe ve, i pu siehlawhai le hin zîngkâr tho unla, chun, zîngkâr in tho a, khuo a var phing le chun fe el ro,” a ta.

¹¹ Chuongchun, David le a mihai chu Philistin rama kîr dinga zîngkâra suok dingin zîngkâr an tho ta a. Chun, Philistin mihai chu Jezreelah an hang fe ta a.