1 SAMUEL 26 - Pathien Lekhabu Inthieng (BSI)

Ziph-a Davidin Saula hringna a hla

¹ Chun, Ziph mihai chu Gibeaa Saula kuomah an fe a, “David chu Jeshimon dep Hakila tlânga chun ân bihmang a ni naw am a nih?” tiin an va hril a.

² Chuongchun, Saula chu a tho a, Ziph thlalêra chun Israel mihai laia thlang ṭhieu mi sâng thum ṭhuoiin Ziph thlalêra chun David zawng dingin a zu fe ta a.

³ Chun, Saula chun Jeshimon dep, lam palailaka chun Hakila tlânga chun ṭhanghmun a khuor a. David ruok chu thlalêra chun a um zing a; chun, Saula chu ama zawng dingin thlalêra chun a hung ti a hriet a.

⁴ Chuleiin, David chun enthlittuhai a tir a, Saula chu a hung tak tak a nih ti a hriet chieng ta a.

⁵ Chuongchun, David chu a tho a, Saula ṭhanghmun khuornaa chun a fe a, chun David chun Saula le a sipai hotu Abner, Nera naupa zâlna chu a hmu a; Saula chu tawlailîr huol sûnga chun a zâl a, a vêlin mihai chun umhmun an rem a.

⁶ Chuongchun, David chun Hit mi Ahimelek le Joab unau Zeruia naupa Abisai kuomah, “Saula ṭhanghmuna chun kei leh tu am fêng a ta?” a ta. Abisai chun, “Keima hi i kuoma chun zu fe vêng ka tih,” a ta.

⁷ Chuongchun, David le Abisai chu mipuihai umnaah zâna chun an zu fe a; chun, ngai ta, Saula chu tawlailîr huol sûnga chun a lo zâl a, a lu tieng chun a fei chu hnuoia hin a sunbûr a; chun, Abner le mihai chu a vêla chun an zâl a.

⁸ Chuongchun, Abisai chun David kuomah, “Vawisûn hin i hmêlma chu Pathienin i kutah a pêk a ni hi, chuleiin, fei hin vawi khatin hnuoia hin hang sunde tlat el ka ti aw? Sun nawn nâwk naw tawp ka tih,” a ta.

⁹ Nisienlakhawm, David chun Abisai kuomah, “Sukbohmang naw rawh, Lalpa hrieknâl chunga kut thlâka thiem chang thei tu am um an ta?” a ta.

¹⁰ Chun, David ma chun, “Lalpa hringna sâlin ka hril a nih, Lalpa chun a chungah kut thlâk naw nîm, an naw vêk leh a thi ni la hung tlung el a tih; a ni naw vêk leh indonaah fêng a ta, bohmang el a tih.

¹¹ Lalpa hrieknâl chunga chun kut ka thlâk naw dingzie chu, a lu bula fei le tuiûm ruok kha chu la ta la aw, chuongchun, fe el ei tih,” a ta.

¹² Chuongchun, David chun Saula lu bula fei le tuiûm chu a lâk a, an fe nâwk ta a, tukhawmin an hmu naw a, tukhawm a hrie le har an um bawk naw a; Lalpa chun inhniktaka ân ininnghiltir tâwl leiin an in vawng a nih.

¹³ Chuongchun, David chu râl khingtieng chun a fe a, hla fea hin tlâng sîpah a ngîr a, an inkâr chu hlatak a nih.

¹⁴ Chun, David chun mipuihai le Nera naupa Abner chu, “Abner, i mi hung dawn naw ding am a nih,” tiin a ko a. Chuongchun, Abner chun a dawn a, “Lal hung ko veitu chu tu am i ni leh?” a ta.

¹⁵ Chun, David chun Abner kuoma chun, “Mi huoisen i ni naw am a nih? Israel mihai lai hin nang ang tu am an um a? Iengtiziea lal i pu chu i vêng naw am a na? Lal i pu chu sukbohmang dingin tu amanih a hung kha tie.

¹⁶ I thilthaw dân hi a ṭha naw a nih. Lalpa hringna sâlin ka hril a nih, Lalpa hrieknâl i pu chu i vêng ṭhat naw leiin thi el tlâk i nih. Lal lu thluona fei le tuiûm um kha khâwlai am a um tah hang en ta hman,” a ta.

¹⁷ Chun, Saula chun David râwl chu a hei hriet a, “Chu i râwl a ni maw ka naupa David,?” a hei ti a. David chun, “Aw lalpa, ka pu, ka râwl a ni chu,” a ta.

¹⁸ Chun, “Ieng leiin am ka lalpa hin a siehlaw hi a hnawt a na? Ieng thil am ka thaw a? Ka kuta hin thil suol ieng am a um a?

¹⁹ Chuleiin, lalpa, ka pu chun a siehlaw thu hi ngai dingin ka hni che. Kei mi do dinga i lungril chawkthotu chu Lalpa a ni chun thilinhlân chu pawm hrâm sienla; mihriem nauhai an ni ruok chun Lalpa hmaah ṭawngsephurin um raw se, ‘Fe la, pathien danghai rawng bâwl rawh,’ tia Lalpa ro ka hluo thei nawna dinga vawisûn hin an mi hnawt hmang ka ni si a.

²⁰ Chuleiin, ka thisen chu Lalpa hmu phâk nawah hnuoi chungah luong naw raw se; varung pêl dinga mihai chu tlânga chun an raminvâk angin Israel lal chu uihrik chau zawng dingin a fe suok a ni hi,” a ta.

²¹ Chuongchun, Saula chun, “Thil ka lo thaw suol dêr el a nih, ka naupa David, hung kîr nâwk rawh, i mithmuah ka hringna hi vawisûn hin a hlut êm leiin iengkhawm law ta naw hrim hrim ka ti che, ngai ta, thil invêtthlâktak ka lo thaw ta a, ka lo thaw suol dêr el a ni ta hi,” a ta.

²² Chun, David chun a dawn a, “Aw lalpa, fei hi hei en ta, tlangvâl pakhat hung sienla hung la raw se.

²³ Chun, Lalpa chun mi tin an fel man le an ringumna man a pêk ding a na, vawisûn hin Lalpa chun nang hi ka kutah a pêk che deh a chu Lalpa hrieknâl chungah ka kut kân let nuom naw a nih.

²⁴ Ngai ta, vawisûna i hringna ka ngaihlutpêk che ang bawk hin Lalpa chun ka hringna hi mi ngaihlupêk sienla, lunginzîngna po poa inthawk hin mi sansuok raw se,” a ta.

²⁵ Chuongchun, Saula chun David kuomah, “Ka naupa David, malsâwmin um raw khai, thilthawtheitakin um i ta, hne pei i tih,” a ta. Chuongchun, David chu a fe a, chun, Saula khawm chu ama hmun tieng chun a fe ve ta a.