1 SAMUEL 23 - Pathien Lekhabu Inthieng (BSI)

Keila le thlalêra David chanchin

¹ Chun, “Ngai ta, Philistin mihai chun Keila khuo an thaw a, hrizâwla buhai chu an lâkpêk vawng el,” tiin David chu an hril a.

² Chuongchun, David chun Lalpa chu, “Chuong Philistin mihai chu ka zu thaw ding am a nih?” tiin a râwn a. Lalpa chun David kuomah, “Philistin mihai chu zu thaw la, Keila khuo chu zu sanhim rawh,” a ta.

³ Chun, David mihai chun a kuomah, “Ngai ta, Judai rama um zing khawm hin ei ṭi a na, Keila khuoa zu fe a, Philistin sipaihai zu do chu ṭi a va um nâwkzuol âwm de!” an ta.

⁴ Chuongchun, David chun Lalpa chu a râwn nâwk ta a. Chun, Lalpa chun a dawn a, a kuomah, “Tho la, Keila khuoah zu fe thla rawh, Philistin mihai chu i kutah pêng ka tih,” a ta.

⁵ Chuongchun, David le a mihai chu Keila khuoa chun an zu fe ta a, Philistin mihai chu an zu thaw a, an ranhai chu an lâkpêk a, an that ṭeu a. Chuong ang chun David chun Keila khuoa mihai chu a humhim ta a.

⁶ Chun, Ahimelek naupa Abiathar Keila khuoa David kuoma a tlân lai khan thiempu zakawsîng chawia fe thla a na.

⁷ Chun, Keila khuoa chun David chu a fe ti Saula an hril a, Saula chun, “Pathienin ka kutah a mi pêk a ni ta chu, kul kawtkhâr le a kalna nei khuoa chun lûtin ân khum ta si a,” a ta.

⁸ Chun, Saula chun mi po po chu indo dingin, Keila khuoa chun zu fe a, David le a mihai zûn huol dingin a ko khâwm a.

⁹ David chun Saula chun a chunga thil ṭha naw a ngaituo ti chu a lo hriet a, thiempu Abiathar kuoma chun, “Thiempu zakawsîng kha hung la ta khai,” a ta.

¹⁰ Chuongchun, David chun, “Aw Lalpa, Israelhai Pathien, i siehlaw hin Saula chun keima leia khuo chu sukse dingin, Keila khuoa hin hung thlâk a tum ti ka hriet tlat a.

¹¹ Keila khuoa mihai hin a kuta chun an mi pêk el ding am a nih? I siehlawin ka lo hriet ang chun Saula chu a hung thla ding am a nih? Aw Lalpa, Israelhai Pathien, ka hni che a nih, i siehlaw hi hung hril rawh,” a ta. Chun, Lalpa chun, “A hung thla ding a nih,” a ta.

¹² Chuongchun, David chun, “Keila khuoa mihai chun kei le ka mihai hi Saula kutah an mi pêk el ding am a nih?” a ta. Chun, Lalpa chun, “Pêng an ti che,” a ta.

¹³ Chuongchun, David le a mihai za ruk lai chu an tho a, Keila khuoa inthawk chu an suok a, fena remchâng natieng poa chun an fe ta a. Chun, David chu Keila khuoa inthawkin a tlân suok tah ti Saula an hril a; chuongchun, inthawk suok chu a ṭhul ta a.

¹⁴ Chun, David chu thlalêrah, kulbîng nghettakahai a um a, Ziph thlalêr tlâng ramah a um ta zing a. Chun, Saula chun ama chu ni tin hin a zawng a, nisienlakhawm, Pathienin a kutah a pêk nawh.

¹⁵ Chun, David chun ama sukhlum tumin Saula chu a hung inthawk ti a hriet a; chuongchun, David chu Ziph thlalêr Horeshah a um a.

¹⁶ Chun, Saula naupa Jonathan chu a tho a, Horeshah David kuoma chun a fe a. Pathienah a kut chu a sukhrâtpêk a.

¹⁷ Chun, a kuomah, “Ṭi dêr naw rawh, ka pa Saula kut chun zawng suok naw ni che; Israelhai lalah um i ta, kei nanga dawt nîng ka tih, chu khawm chu ka pa Saula hin a hriet zing a nih,” a ta. Chun, an pahni chun Lalpa hmaa thu an thlung a;

¹⁸ David chu Horesha chun a um zing a; Jonathan ruok chu in tieng a fe ta a.

¹⁹ Chuongchun, Ziph mihai chu Gibea-ah Saula kuomah an hang fe a, “David chu kan kuomah Horesha kulbîngah, thlalêr simtieng pang Hakila tlângah ân bihmang zing a ni naw am a nih?

²⁰ Chuleiin, aw lalpa, i hringnain hung thlâk a duthusâm ang ngei chun hung thla ta la, chun, keini lo thaw ve ding chu lal kuta ama lo inhlân chu nîng a ta,” an ta.

²¹ Chun, Saula chun, “Lalpa chun malsâwm raw se cheu; nangni chun chu in mi lunginsiet hle a ni hi.

²² Fe unla, va sukchieng nâwkzuol unla, a hnung le hma va sui unla, chutaka a hmutu khawm va sukfel nâwkzuol zet zet ro: var vervêktakin thil a thaw hlak a nih ti mîn an mi hril a nih.

²³ Chuleiin, ân bîkhmangna hmun po pohai hre vawng bak unla, chun, ka kuomah hung nâwk ngei ngei unla: chun, nangni leh ka fe ve ding a nih: chun, hi ramah a um phawt chun Juda mi sâng tamtak laia inthawk chun zawng suok ka tih,” a ta.

²⁴ Chun, an tho a, Saula fe hmain Zipha chun an fe ta a, nisienlakhawm, David le a mihai chu Jeshimon simtieng Arabaah Maon thlalêra chun an um a.

²⁵ Chun, Saula le a mihai chu ama zawng dingin an fe a. Chun, David chu an hril a, chuongchun, Maon thlalêra um lungpui pan ding chun a suok a. Saulân chu chu a hriet chun Maon thlalêra chun David chu a hnawt ta a.

²⁶ Saula chu tlâng khingtieng pangah a fe a, David le a mihai chu tlâng khingtieng panga chun an fe a, chun, David chu Saula ṭi chun inhmâwtakin a tlân a; Saula le a mihai chun David le a mihai chu man tumin an inhuol vêl si a.

²⁷ Nisienlakhawm, Saula kuoma chun, “Inhmaw la, hung rawh, Philistin mihai chun ei ram an hung thaw a nih,” tiin thangko a hung tlung a.

²⁸ Chuongchun, Saula chun David a hnawt lai chu a kîrsan a, Philistin mihai do ding chun a fe ta a: chuleiin, chu hmun chu Selahama-hlekoth an ti ta a.

²⁹ Chun, David chu chutaka inthawk chu a fe a. En-gedi kulbîngahai chun a hang um ta a.