1 SAMUEL 22 - Pathien Lekhabu Inthieng (BSI)

¹ Chuongchun, David chu chutaka inthawk chu a suok a, Adullam pûkah a tlân ta a; chun, a unauhai le a pa sûngkuohai po poin an lo hriet chun chutaka chun a kuomah an zu fe a.

² Chun, mi lunginzing taphawthai, leibat nei taphawthai, lungninawna nei taphawthai chu a kuomah an fe khâwm a; chuongchun, an hotuah a um ta a, chun a kuoma chun mi za li lai an um ta a.

³ Chun, David chu chutaka inthawk chun Moab rama Mizpeah a fe a, Moab lal kuoma chun, “Pathien thil mi thawpêk ding ka hriet hmakhat chu ka nu le ka pa hung hai sien, i kuomah lo um raw hai se, ka hni che a nih,” a ta.

⁴ Chun, Moab lal hmaa chun anni chu a hung ṭhuoi a, kulbînga a um sûng po chun a kuoma chun an um ta a.

⁵ Chun, zâwlnei Gad chun David kuomah, “Kulbînga hin um zing naw rawh, suok la, Judai ramah fe rawh,” a ta. Chuongchun, David chu a suok a, Hereth ramhnuoia chun a lût ta a.

Nob-a thiempuhai Saulân a that

⁶ Chun, Saula chun David le a kuoma umhai chu an hmu tah ti a lo hriet a, Saula chu Gibeaah Rama khuoa tamarisk thing hnuoiah a fei chawiin a ṭhung a; chun, a vêla chun a siehlawhai po po chu an ngîr a.

⁷ Chun, Saula chun a kâwl vêla ngîr a siehlawhai kuoma chun, “Nangni Benjamin thlahai lo ngai unla, Jesai naupa chun lohai, grêp huonhai pe seng cheuin, a sipai sâng hotuahai, a sipai za hotuahai a siem vawng ding cheu am a nih?

⁸ in rêngin in mi enbing a, ka naupain Jesai naupa kuoma thu a ithlung ka kuoma suklang hrim hrim in um naw a, a mi lungngaipui hrim hrim khawm in um naw a, ka naupain ka siehlaw hi mi do ding le vawisûn ni chen khawma min chân dinga ân fui thu ka kuoma suklang hrim iengdinga in um naw?” a ta.

⁹ Chuongchun, Saula siehlawhai kâwla ngîr Edom mi Doeg chun a dawn a, “Jesai naupa chu Nob khuoa Ahitub naupa Ahimelek kuoma a hung ka hmu a.

¹⁰ Chun, ama chun Lalpa a rawnpêk a, fâk ding a pêk a; chun, Philistin mi Goliath kâwlhnâm a pêk bawk a,” a ta.

¹¹ Chuongchun, lal chun Ahitub naupa Ahimelek thiempu le, a pa sûngkuo Nob khuoa thiempu um po po chu ân kotir a; anni chu an rêngin lal kuoma chun an hung a.

¹² Chun, Saula chun, “Nang Ahitub naupa, lo ngai rawh,” a ta. Ama chun, “Ka lalpa, hitaka hin ka um,” a ta.

¹³ Chun, Saulain a kuomah, “Bei le kâwlhnâm dâm lo pe a, Lalpa chu rawnpêkin vawisûn nia a thaw anga mi do ding le min chân dinga iengdinga nang le Jesai naupa hin in mi phierrûk am a na?” a ta.

¹⁴ Chuongchun, Ahimelek chun lal chu a dawn a, “Lal mâkpa, i mi rawntak hlak, in sûngkuo laia mi inzaum David ang hrim hrima mi ringum hi i siehlaw po pohai lai hin tu am a um a?

¹⁵ Vawisûn hi Pathien ka biek râwnpêk ṭan ni am a nih? A ni nawh. Lal hin a siehlaw amanih, ka pa sûngkuo hrim hrim hi min tum lul naw raw se, i siehlaw hin hieng thu po po a iengkhawm hi ka hriet naw a nih,” a ta.

¹⁶ Chun, lal chun, “Ahimelek, i thi ngei ngei ding a nih, nang le i pa sûngkuohai po po leh,” a ta.

¹⁷ Chun, lal chun a kâwla ngîr sipai kuoma chun, “Nghakîr unla, Lalpa thiempuhai hi that ro, David tieng an ṭhang a, a tlân hmang a nih ti hre zing siin ka kuoma an hril naw leiin,” a ta. Nisienlakhawm, lal siehlawhai chun Lalpa thiempuhai thaw ding chun kut an inlet nuom naw a.

¹⁸ Chun, lal chun Doeg kuoma chun, “Nang nghakîr la, thiempuhai kha thaw rawh,” a ta. Edom mi Doeg chu a nghakîr a, thiempuhai chu a thaw a, chu ni chun puonzai inhmi sil thiempu zakawsîng hâk, mi sâwmriet le panga a that a.

¹⁹ Chun, Nob, thiempu khuo chu kâwlhnâmin a thaw a, a nuhmei a pasalin naupang le nênê ne lai chenin, bâwnghai, sabengtunghai, berâmhai leh kâwlhnâmin a sât hlum a.

²⁰ Chun, Ahitub naupa Ahimelek naupasalhai laia pakhat a hming Abiathar chu a tlân suok a, David kuomah a tlân a.

²¹ Chun, Abiathar chun Saulain Lalpa thiempuhai a that thu chu David a hril a.

²² David chun Abiathar kuoma chun, “Edom mi Doeg chutaka a um ni ngei khan Saula hril ngei ngei a tih ti ka hriet sa hrim a nih; I pa sûngkuohai po po chu keia leia thi an nih.

²³ Nang chu ka kuomah um la ṭi naw rawh; kei mi that tum chun nang khawm that tum ngei an ti che; ka kuoma i um ruok chun chu him i tih,” a ta.