1 SAMUEL 20 - Pathien Lekhabu Inthieng (BSI)

David le Jonathan inruolṭhatna

¹ Chun, David chu Rama khuoa Naiotha inthawk chu a tlân a, Jonathan kuoma chun a fe a, “Ieng am ka thaw leh? Ieng am ka bawsiet a? i pa chunga hin ieng am ka suksuol a hienga mi that tum a na?” a ta.

² Chun, ama chun, “That lo e a, thi naw tawp i tih, ngai ta, ka pa hin mîn hriettir lovin, iengkhawm, lien sien chîn sien, a thaw ngai naw a, iengdingin am hieng thu hi ka kuomah ip hlak a ta? ip naw tawp a tih,” a ta.

³ Chun, David chun, “I pa chun i mi lunginsiet dân hi a hriet chieng hle el si a. ‘Jonathan chun hi hi chu hre kher da raw se, chuong naw chun, a lungngai âwm êm el,’ a ti nîng a tih. Amiruokchu, Lalpa hringna le i hringna sâlin ka hril a nih, thina le kan inkâr chu pên khat chau a nih,” tiin a hril uor nâwk a.

⁴ Chuongchun, Jonathan chun David kuomah, “I hringnain a dit ang taphawt chun thawpêk pei ka ti che,” a ta.

⁵ David chun Jonathan kuomah, “Ngai ta, zinga hin thla thar a ni ding a na, lal kuoma thlaithlêng awt ngei ding ka na, nisienlakhawm, a ni thum ni zântieng chenin phûl tieng inbihmang dingin fe lem ka tih.

⁶ I pa chun ka um naw hi hung hre suok a ni hlau chun, ‘David chun a khuo Bethlehema va fe vak dingin a mi hni a mi hni a, an sûngkaw ta dinga an kum tin inthâwi hun a na,’ lo ti la.

⁷ ‘A ṭha chu,’ a ti chun, i siehlaw chu a lung muong a ta, amiruokchu, a lung a sen chun thil ṭha naw thaw a tum a nih ti hre el rawh.

⁸ Chuleiin, i siehlaw hi ṭhatakin thaw la, i siehlaw chu Lalpa thuthlungah i lûtpui ta si a; amiruokchu, bawsietna nei ka ni chun nangin mi that law law el rawh, iengdingin am i pa kuoma chun mi ṭhuoi kher kher i ta?” a ta.

⁹ Chun, Jonathan chun, “That lo e a, i chunga thil ṭha naw thaw ka pain a tum ka hriet phawt chun ka hril naw ding che am a nih?” a ta.

¹⁰ Chuongchun, David chun Jonathan kuomah, “I pa hin inrawmtakin dawn ta ang sienla che, tuin am mi hril a ta?” a ta.

¹¹ Chun, Jonathan chun David kuomah, “Hung ta, va fêng ei tih,” a ta. Chuongchun, phûla chun an va fe rêl ta a.

¹² Chun, Jonathan chun David kuomah, “Lalpa Israelhai Pathien chu hretu ni raw se, zîngah hieng tik pha hin amanih, ni thum nia manih, ka pa ka hung dâwp pha, ngai ta, David chungchâng thu hi ṭha tieng a ni chun mi hung tirin ka hril el naw ding che?

¹³ Chun, ka pain i chungah thil ṭhanaw thaw nuom ta sienla, ka hril naw che a, lungmuongtaka i fe theina dinga kân thla naw che chun, Lalpain Jonathan chu a thaw thawin thaw sienla, chu nêka nasa khawmin; chun, Lalpa chu i kuomah um raw se, ka pa kuoma a um hlak angin.

¹⁴ Chun, ka thi nawna dingin ka dam sûng chaua Lalpa lunginsietna mîn hmutir ni lovin,

¹⁵ kumkhawtluongin ka sûnghai chunga khawm i lunginsietna chu bo naw raw se; Lalpain David hmêlma hnuoi chunga a sukbo vawng hnung chen khawmin ma naw rawh,” a ta.

¹⁶ Jonathan chun, “David hmêlmahaia inthawkin Lalpa chun phût a tih,” tiin David sûnghai kuoma chun thu a thlung a.

¹⁷ Chun, Jonathan chun ama a hmangaina sâlin David kuoma chun ṭawng ân khâm nâwk a, ama hringna a hmangai ang chiein a hmangai si a.

¹⁸ Chuongchun, Jonathan chun a kuomah, “Zinga hin thla thar a ni ding a na, i ṭhungna hmun a ruok ding leiin i um naw chu inlang ngei ding a na.

¹⁹ Ni thum i um hnung chun fe thla vat la, kha hmaa thil a hung um laia în bîkna hmuna khan hung la, Ezel lung bula chun um zing rawh.

²⁰ Chun, inthemthiem ni âwmtakin a sîrah thal pathum hung kâp ka ta.

²¹ Chun, ngai ta, ‘Fe la, thalhai kha va zawng hmu rawh,’ tiin naupang tir ka ta. Naupang kuoma chun, ‘En ta, thalhai chu i hnungtienga kha a um ie, la la, hung rawh,’ ka ti chun, Lalpa hringna sâlin ka hril a, i ta dingin muong a umin ṭi ding a um naw nîng a ta.

²² Amiruokchu, naupang kuoma chun, ‘En ta, thalhai chu i khêltienga saw a um,’ ka ti chun, fe hmang el rawh; Lalpa chun ân fe hmangtir che ning a tih.

²³ Chun, nang le keiin thil ei hril tahai chungchâng thua chun ngai ta, nang le ei inkâra chun Lalpa chu a um kumkhuo a nih,” a ta.

²⁴ Chuongchun, David chu phûla chun ân bihmang a, chun, thla a hung thar chun lal chu thlaithlêng awtin a ṭhung a.

²⁵ Lal chu ni danga a ṭhungna pângngai bang kâwla a ṭhungnaa chun a ṭhung a; chun, Jonathan chu a ngîr a; chun, Abner chu Saula kâwla chun a ṭhung a; David hmun ruok kha chu a ruok a.

²⁶ Amiruokchu, Saula chun chu ni chun iengkhawm a hril naw a, “A chungah thil ieng am a nih a um a, ân thieng naw amanih ning a ta, a thieng naw ni ngei a tih,” a ti lungril a.

²⁷ Chun, thla thar a ni hni ni chun David hmun chu a la ruok ta rawp a; chuongchun, Saula chun a naupa Jonathan kuomah, “Iengdinga Jesai naupa hi zâni le vawisûn hin thlaithlêng awt dinga hung naw am a na?” a ta.

²⁸ Jonathan chun Saula chu a dawn a, “David chun Bethlehema fe dingin a mi hni a mi hni a.

²⁹ ‘Mîn fetir hrâm rawh khai, kan sûngkuo chun khuoa chun inthâwina an nei ding a na, ka unaupa chun um ve dingin a mîn cha tlat a; chuongchun, i mi lunginsiet thei chun mîn fetir la, ka unauhai va sir ka tih,’ a ta. Chu lei chun lal dawkâna chun a hung naw a nih,” a ta.

³⁰ Chuongchun, Jonathan chungah Saula lung chu a sen ta thut el a, “Nang nuhmei lepchie le kâwmaw naupa, Jesai naupa chu i muolphona dingin le i nu saruokna sukmuolphona dingin i thlang ti ka hriet naw am a nih?

³¹ Jesai naupa hi, hi hnuoia a um sûng phawt chun sukdet ni naw ti ni a, i ram khawm. Chuleiin, inkotir nghâl la, ka kuomah hung inṭhuoitir rawh, a thi ngei ding a nih,” a ta.

³² Chun, Jonathan chun a pa Saula chu a dawn a, a kuomah, “Iengdingin am sukhlum ding nîng a ta? Ieng am a thaw hrim leh?” a ta.

³³ Saula chun khaw tumin a fei chu a hang inlet a; chu chu lei chun Jonathan chun a pain David chu that a lo tum ngei a ni ti a hriet ta a.

³⁴ Chun, Jonathan chu dawkâna inthawk chun lunginsentakin a tho a, chu thla ni hni ni chun thlaithlêng a awt ve ta naw a, a pa chun David a sukmuolpho êm lei chun a lungngaipui a nih.

³⁵ Chun, zîngkâr chun Jonathan chu naupangte chu ṭhuoiin David le an hmun ruot phûl tieng chun a fe ta a.

³⁶ Chun, a naupang kuoma chun, “Tlân la, ka thal kâphai hi va zawng raw khai,” a ta. Chun, naupang chu a tlân lai chun a khêl tieng chun thal chu a kâp a.

³⁷ Chun, naupang chun Jonathan thal kâp tlâkna hmun a va tlung chun Jonathan chun naupang chu a ko a, “Thal chu i khêl tienga saw a ni naw am a nih?” a ta.

³⁸ Chun, Jonathan chun naupangte chu a ko a, “Hung tlân vak rawh, inhmaw rawh, muong naw rawh,” a ta. Chun, Jonathan naupang chun thal chu a rût khâwm a, a pu kuom tienga chun a fe ta a.

³⁹ Nisienlakhawm, naupang chun iengkhawm a hriet naw a, Jonathan le David chau chun thil umzie chu an hriet a.

⁴⁰ Chun, Jonathan chun a hriemhreihai chu naupang chu a pêk a, a kuomah, “Fe la, khuoah lo hang fepui rawh,” a ta.

⁴¹ Chun, naupang chu a fe phingle chun David chu a umna hmun simtieng panga inthawk chun a hung tho a, hmaia hnuoi sikin chibai vawi thum a bûk a, chun, an infâwp a, an ṭap rêl a. David ruok chu a zuol bîk a.

⁴² Chun, Jonathan chun David kuomah, “Lungmuongtakin fe raw khai, ‘Lalpa chu nang le ei inkâra le ka thlahai le i thlahai kâra chun kumkhuoin um raw se,’ tiin Lalpa hmingin ṭawng ei inkhâm hmunkhat ta kha,” a ta. Chuongchun, a tho a, a fe ta a, chun, Jonathan chu khuoa chun a lût ta a.