1 SAMUEL 2 - Pathien Lekhabu Inthieng (BSI)

Hanna ṭawngṭaina

¹ Hanna chu a ṭawngṭai a, “ Lalpa chungah ka lungril a lâwm êm êm a; Ka ki chu Lalpaa chawimawiin a um a; Ka hmêlmahai chungah ka bau suklienin a um a, I sandamnaa chun ka lâwm êm êm leiin.

² Lalpa anga inthieng hi an um nawh; Nangma ang hrim an um si nawh; Ei Pathien ang lungpui hrim a um bawk nawh;

³ Chuong ang taka chapo chun thu hril ta naw unla, In baua inthawkin ṭawng chapo hrim hrim suok naw raw se; Lalpa chu varna Pathien a ni si a, Ama chun thilthawhai chu a bûk fie hlak.

⁴ Mi hrât thalngulhai a sukthliek a, A kathai kâwng chu hrâtnaa khitin a um a,

⁵ Khawp hlakhai chu fâk ding zawngin an inhlawfa ta a, Phîngṭâm hlakhai chu an phîng a ṭâm ta naw a; Anih, ching chun pasari a nei ta a, Nau tamtak neinu chu a châu tah,

⁶ Lalpa chun a sukhlum hlak a, a sukhring bawk hlak, Thlânah ân fe thlâktir hlak a, a ṭhuoi suok bawk hlak.

⁷ Lalpa chun a sukpase hlak a, a sukhausa bawk hlak, A suktlâwm hlak a, a chawisâng bawk hlak.

⁸ Pilvuta inthawkin pasie chu a keitho hlak a, Pasie chu êkdûra inthawkin a chawikâng hlak, Mi lienhai kuomah ân umtir theina ding le, Ropuina lalṭhungpha an chang theina dingin, Leihnuoi innghatsan chu Lalpa ta a nih; Khawvêl chu a chungah ân nghat ta si a.

⁹ A mi inthieng ke chu vêng a ta, Mi suolhai ruok chu inthim hnuoiah sukdei ṭhapin um an tih; Hrâtna chun tukhawma an ngam âwm si naw a.

¹⁰ Lalpa insuolpuihai chu kawinawiin um an ta, Vâna inthawka vâninrûmin do a ta; Lalpa chun kâwlkawdawng chenin rorêl a tih; A lal chu hrâtna pêng a ta, A hrieknâl ki chu chawimawi a tih,” a ta.

¹¹ Chuongchun, Elkana chu Rama khuoa a ina chun a fe nâwk ta a. Chun, naupang chun thiempu Eli hmaa chun Lalpa rawng chu a bâwl ta a.

Eli insûng chungchânga hrillâwkna

¹² Eli naupasalhai chu Belial nauhai an na, Lalpa chu an hriet naw a.

¹³ Chun, mipuihai laia thiempuhai thaw dân chu, mîn inthâwina an hung inhlân hin, sa suong laitak hin thiempu siehlaw hi sa thurna thîrkut zum thum nei mi chawiin a hung hlak a;

¹⁴ chun, bêl bau lien amanih, bêl dâwt nei amanih, bêl khaina nei amanih, bêl amani sûng chu a zuk sun a; chun, chu sa thurna inzumin a hung thur suok po po chu thiempu chun a lâk hlak a nih. Chuong ang chun Israel mihai chutaka hung po pohai chu Silo khuoa chun an lo thawpêk hlak a.

¹⁵ Anih, a thâu chu an raw hma chun thiempu siehlaw chu a hung a, ân thâwitu kuoma chun, “Thiempu ta dinga emhmin ding sa mi pe rawh, i sa suong chu a du naw a, a sel a dit a nih,” a ti hlak a.

¹⁶ Chun, ama chun a kuomah, “A thâu chu raw phawt el sienla; chun, chu zova chun i hringnain a dit zât zât i lâk ding annâwm,” a lo ti chun, “Ni lo, i mi pêk naw chun la lui hrim hrim ka tih,” a ti hlak a.

¹⁷ Chuongchun, tlangvâlhai suolna chu Lalpa mithmuah a lo nasa ta êm êm el a, mihai chun Lalpa kuoma inthâwina inhlânhai chu an ngainêp pha ta si a.

¹⁸ Samuel chu naupang ni sien khawm, puonzai inhmi zakawsîng hâkin Lalpa hmaah rawng a bâwl a.

¹⁹ Chu naw khawm chu a nuin zakawfuol chîn a ṭhuipêk a, kum tina an inthâwina inhlân dinga a pasal kuoma a fe ve hin a chawipêk hlak a.

²⁰ Chun, Eli chun Elkana le a nuhmei chu mal a sâwmpêk a, “ Lalpa ta dinga in thilinhlân in inhlân hi, hi nuhmei thla hin Lalpa chun thung raw se cheu,” a ta. Chuongchun, in tieng an fe ta a.

²¹ Chun, Lalpa chun Hanna chu a hung sir a, nau a vawn a, naupasal pathum le naunuhmei pahni a nei a. Chun, naupang Samuel chu Lalpa hmaa chun a hung inṭhanglien ta a.

²² Eli chu a hung tar ta hle el a; Israel mihai po po chunga a nauhai thilthaw po po le inbiekna puon in kawtkhâr bula rawngbâwltu nuhmeihai an lo zâlpui hlak thu dâm a lo hriet a.

²³ Chuongchun, an kuomah, “Iengdinga hieng ang thil hi in thaw am a na? Mi po pohaia inthawk hin in thilthaw ṭha nawhai chu ka lo hriet a nih.

²⁴ Ni lo, ka naupasalhai, in chanchin ka lo hriet hi a ṭha naw tieng ruok a nih; Lalpa mihai chu in inbawsiettir a nih.

²⁵ Mi pakhat mi dang chunga a suol chu Pathienin rorêlpêk a ta, amiruokchu mi, Lalpa chungah a suol ruok chun tuin am ngênpui tâng a ta?” a ta. Chuong sa khawm chun an pa râwl chu an ngai nuom naw a, Lalpa chun anni chu a sukhlum ngei ding a ni si a.

²⁶ Chun, naupang Samuel chu ân ṭhanglien deu deu a, Pathien le mihriemhai dit zâwngin a um ta a.

²⁷ Chun, Eli kuoma chun Pathien mi pakhat a hung a, a kuomah, “Lalpa chun hieng ang hin a tih, ‘Aigupta rama Pharao suoka an um lai khan in thlatu kuoma khan kân lâr a ni naw am a nih?

²⁸ Chun, Israel hnam po po laia ka maichâma hang fe a, riminhnik raw a, ka hmaa zakawsîng hâk dingin ka thiempu dingin ama chu ka ruot a ni naw am a nih? I thlatuhai chu Israel mihai pumrawhmang thil inhlân po po ka pêk a ni naw am a nih?

²⁹ Ieng leiin am ka umnaa inhlân dinga ka ruot ka kuoma inthâwina le ka puola thil inhlân chu in sirde a, keia nêka i nauhai i chawimawi lem a, nangni insukthâuna dinga ka mi Israelhai inthâwina a ṭha ṭha in hmang am a na?’ tiin.

³⁰ Chuleiin, Lalpa Israelhai Pathien chun, ‘Kei chun chu i sûnghai le i pa sûnghai chu kumkhuoin ka hmaah um in tih’ ka ti ngei a; nisienlakhawm, tuhin Lalpa chun, ‘Um naw tawp in tih, a mi chawimawi taphawt chu chawimawi ka ta, a mi hmusit taphawt chu ka ngainêp an ni ding a ni si a.

³¹ Ngai ta, i bân dâm, i pa sûnghai bân dâm ka tan ni ding chu a hung tlung ding a ni tah; i inah tarkûna dam hrim hrim um naw ni hai.

³² Pathienin Israelhai chu hausakna a pêk pha chun, hi ka umna ina hin tuorna la hmûng i ta; i ina chun kumkhawtluongin tarkûna dam um naw ni hai.

³³ Chun, i mi, ka maichâma inthawka ka sukbohmang naw ding hai chu i mit sukkhamtu le I lungril suknatu nîng an ta; i ina hung pienghai taphawt chu an vânglai takin thi pei an tih.

³⁴ Chun, hi hi, i naupasalhai pahni Hophni le Phinehas chunga thil hung tlung ding chu i ta dingin inchikna nîng a tih; ni khat sûngin an pahniin thi ve vêng an tih.

³⁵ Chun, thiempu ringumtak ka ta dingin indin ṭha nâwk ka ta, ama chun chu ka lungril le ka lung tuokzâwngin thâwng a tih. Chun, sûngkuo dettakah inngîr ka ta, kumkhuoin ka hriek nâl hmaa chun um a tih.

³⁶ Chun, i ina la um po pohai chu tangka le bei hni dingin fêng an ta, ama chibai bûk an tih, bei tlâwmte bêk ka hmu theina dingin thiempu sin mîn thawtir raw khai, tîng an tih,’ a ti a nih,” a ta.