1 SAMUEL 18 - Pathien Lekhabu Inthieng (BSI)

Jonathanin David le an kârathu a thlung

¹ Chun, Saula kuoma thu a hril zo chun Jonathan hringna le David hringna chu a lo inzawm ta chie el a, chuongchun, Jonathan chun ama hringna a hmangai ang chiein a hmangai ta a.

² Chun, Saula chun chu ni chun ân umtir ta nghâl a, a pa ina chun ân fetir phal ta naw a.

³ Chuongchun, Jonathan le David chun thu an thlung a, ama hringna ang chiea a hmangai leiin.

⁴ Chun, Jonathan chun a puon sil lai a hlîp a, David chu a pêk a, a thuom le a kâwlhnâm le a thalngul le a kâwng khitna chenin a pêk a.

⁵ Chun, Saula chun a tirna taphawta chun David chu a fe hlak a, feltakin a châng pei a; chun, Saula chun râl kâp mihai hotu dingin a siem a, chu chu mi po po ngaia le Saula siehlawhai ngaia khawm a ṭha êm êm a.

Saulân David a thîk ṭan

⁶ Chun, an hung inlawi a, Philistin mi thata David a hung kîr chun Israel khaw tinah, nuhmeihai hla sak le lâm pumin khuongtê le thil inri theihai leh, hlimtakin lal Saula tuok dingin an hung suok a.

⁷ Chun, nuhmeihai chun lâm pumin hlain an indawn tuo a. “Saulain a sânga sâng a that a, Davidin a sînga sîng a that a,” an ti a.

⁸ Chuongchun, Saula chu a lunginsen ta vieu el a, chuong thu chun ama a suklâwm naw hle el a, “David chu a sînga sîng thatah an ngai a, kei ruok chu a sânga sâng chau thatah an mi ngai a: ram ti chau lo chu ieng am a nei ding dang a um ta leh?” a ta.

⁹ Chuongchun, chu nia inthawk chun Saula chun David chu a hmusiet ta a.

¹⁰ Chun, a zînga chun Pathien tir khawhri Saula chunga chun a hung tlung ta rak el a, in sûnga chun thu chu a hril ta nuk nuk el a, chun, David chun ni danga a thaw dân ang bawkin ṭingṭang a kei a: Saula chun a fei chu a chawi zing a.

¹¹ Chun, Saula chun fei chu a hang inlet a, “Banga sawn David khâw de tlat ka tih,” a ta. David chun vawi hni ân kiensan a.

¹² Chun, a kuoma Lalpa a um lei le, Saula chu a fesan leiin Saula chun David chu a ṭi a.

¹³ Chuleiin, Saula chun a kuoma inthawkin ân sawntir a, sâng chunga sipai hotuah a siem a, chun, mipuihai lai chun a lûtin a suok hlak.

¹⁴ Chun, David chu a thilthaw taphawtah feltakin a châng hlak a, Lalpa chu a kuomah a um a.

¹⁵ Chun, Saula chun feltakin a châng hlak ti a hmuin a ṭi hle el a.

¹⁶ Nisienlakhawm, Israelhai le Judahai po po chun David chu an ngaina êm êm a, anni laia lûta suok hlak a ni si a.

¹⁷ Chun, Saula chun David kuomah, “Ngai ta, ka naunuhmei upa lem Merab hi nuhmeiah inneitir ka ti che, huoitakin mi ṭan phawt el la. Lalpa indonahai chu do rawh,” a ta. Saula chun, “Kei chun chu a chunga hin kutthlâk lovin, Philistin mihaiin thlâk lem raw se,” a ti a nih.

¹⁸ Chun, David chun Saula kuomah, “Tu am ka na, ka hringna le Israelhai lai ka pa sûnghai chu ieng am an na, lal mâkpa ka hang nina san ding chu?” a ta.

¹⁹ Nisienlakhawm, Saula naunu Merab chu David inneitir a hung hun chun Meholath mi Adriel nuhmei dingin a pêk ta el a.

²⁰ Chun, Saula naunu Mikal chun David chu a hmangai a, Saula chu an hril a, chu chun a suklâwm a.

²¹ Chun, Saula chun, “A âwkna châng a hung ni theina dingin le Philistin mihaiin a chunga kut an thlâk theina dingin ama hi pêng ka tih,” a ta. Chuleiin, Saula chun David kuoma a vawi hninaah chun, “Vawisûn hin ka mâkpa ning i tih,” a ta.

²² Chuongchun, Saula chun a siehlawhai chu thu a pêk a, “Inrûk takin David be unla, ‘Ngai ta, lal chu i chungah a lâwm hle el a, a siehlawhai po po khawma an hmangai che a nih; chuongchun, lal mâkpaa hin um el rawh,’ ti ro,” a ta.

²³ Chun, Saula siehlawhai chun chuong thuhai chu David na hrieta chun an hril a. David chun, “Mi pasie le tukhawm ingaisâng naw keia ta ding hin lal mâkpa hang ni chu thil namênah in ngai am a nih?” a ta.

²⁴ Chun, Saula siehlawhai chun, “David chun chuong ang chun a ti a nih,” tiin an hril a.

²⁵ Chun, Saula chun, “David kuoma chun hieng ang hin ti ro khai, ‘Lal chun lal hmêlma phubalâkna dingin Philistin mihai servun za ti naw chu man ieng dang khawm a dit nawh,’ tiin,” a ta. Saula chun David chu Philistin mihai kuta inthitir a lungril tlat a.

²⁶ Chun, a siehlawhaiin chuong thu chu David an hang hril chun, lal mâkpa a hang ni ding chu David chu a lâwm hle el a. Chun, ni tiemhai chu a la tling naw a.

²⁷ David le a mihai chu an tho a, Philistin mi za hni an va that a: David chun an ser vun chu a hung phur a, chuongchun, lal mâkpa a ni theina dingin lal chu kimtakin an pêk a. Chuongchun, Saula chun a naunu Mikal chu nuhmeiah ân neitir ta a.

²⁸ Chun, Saula chun David kuoma chun Pathien a um a nih ti a hriet chieng ta a: chun, Saula naunu Mikal chun ama chu a hmangai a.

²⁹ Chuongchun, Saula chun David chu a ṭi zuol ta sau a, Saula chu David hmêlma a ni kumkhuo el ta a.

³⁰ Chuongchun, Philistin mi lienhai chu an vân thawk hlak a; chun, an hung inthawk dawk po leh David chu Saula siehlawhai po po nêka fel lemin a châng hlak a, chuongchun, a hming chu an chawisâng hle el ta a.