1 SAMUEL 16 - Pathien Lekhabu Inthieng (BSI)

David lal dinga hriek nâla a um thu

¹ Chun, Lalpa chun Samuel kuomah, “Israel mihai lal dinga ka dit ta naw hnung chu Saula lei hin ieng chen am i lungngai ding a ni leh? I kiah hriek thun sip la, fe rawh; Bethlehem mi Jesai kuomah ka tir ding che a nih, a naupasalhai laia mi lal dingin ka ruot zing tah a nih,” a ta.

² Chun, Samuel chun, “Iengtin am fe thei ka ti leh? Saula chun a lo hriet chun mi sukhlum el a tih,” a ta. Chun, Lalpa chun, “Bâwngla ṭhuoi la, ‘Lalpa kuoma inthâwi dinga hung ka nih,’ ti el rawh.

³ Chun, inthâwinaa chun Jesai chu ko la; chun, i thaw ding chu hril ka ti che a; chun, a hming ka hril ding che chu hriek mi nâlpêk rawh,” a ta.

⁴ Chuongchun, Samuel chun Lalpa hril ang chun a thaw a, Bethlehema chun a fe ta a. Khuoa upahai chun inthin pumin ama an lo tuok a, “Thu ṭhaa hung am i nih?” an lo ti a.

⁵ Ama chun, “Thu ṭhaa hung ni e, Lalpa kuoma inthâwi dinga hung ka nih; insukthieng unla, inthâwinaah hung ve ro,” a ta. Chun, Jesai le a naupasalhai chu a sukthieng a, inthâwinaa chun a ko ve a.

⁶ Chun, an hung chun, Eliab chu a lo en a, “Lalpa hrieknâl chu a hmaa um hi a ni ngei el,” a ta.

⁷ Nisienlakhawm, Lalpa chun Samuel kuoma chun, “A hmêl tieng amanih, ân sang tieng amanih en naw rawh, ama hi chu ka dit naw a nih, Lalpa chun mihriem en dân angin a en ve si naw a, mihriem chun puotienga inlang dân an en hlak a, Lalpa ruok chun lungril tieng a en lem hlak a nih,” a ta.

⁸ Chun, Jesai chun Abinadab a hei ko a, Samuel hmaa chun ân fetir a. Ama chun, “Hi khawm hi Lalpa thlang a la ni nawh,” a ta.

⁹ Chun, Jesai chun, Samma a vân fetir nâwk a. Ama chun, “Hi khawm hi Lalpa thlang a la ni naw ta rawp,” a ta.

¹⁰ Chuongchun, Jesai chun a naupasal pasari hai chu Samuel hmaa chun ân fetir a. Chun, Samuel chun Jesai kuomah, “Lalpa chun hienghai khawm hi a thlang nawh,” a ta.

¹¹ Chun, Samuel chun Jesai kuomah, “Hitaka hin i nauhai an um kim vawng am?” a ta. Chun, ama chun, “A naupang tak a la um a, ngai ta, berâm a vêng a nih,” a ta. Chun, Samuel chun Jesai kuomah, “Vân kotir raw khai, a hung tlung hmakhat chun ei awt naw ding a nih,” a ta.

¹² Chuongchun, a vân kotir a, a hung ṭhuoi a. Ama chu sâr veng vawng, mit meng mawitak, en dâwltak el hi a na. Chun, Lalpa chun, “Tho la, hriek nâl rawh, hi ngei hi a nih,” a ta.

¹³ Chuongchun, Samuel chun hriek bâwm ki chu a lâk a, a unauhai lai chun ama chu hriek a nâl a, chun, Lalpa thlarau chu nasatakin chu nia inthawk chun David chunga chun a hung tlung ta a. Chuongchun, Samuel chu a tho a, Rama khuoah a fe ta a.

Saula hmaa Davidin ṭingṭang a kei

¹⁴ Lalpa thlarau chun Saula chu a suoksan a, Lalpa tir khawhriin ama chu a sukbuoi a.

¹⁵ Chun, Saula siehlawhai chun a kuomah, “Ngai ta, Pathien tir khawhriin a sukbuoi che a nih.

¹⁶ Tûn kan lalpa hin i siehlaw i hmaa umhai hi ṭingṭang kei thiemtak zawng ding thu mi pe raw khai, chuongchun, Pathien tir khawhriin a man pha che khawm, kei a ta, ṭha el hlak i tih,” an ta.

¹⁷ Chun, Saula chun a siehlawhai kuoma chun, “Chuong ang kei thiemtak chu mi zawngpêk unla, ka kuomah hung ṭhuoi ro le,” a ti a.

¹⁸ Chuongchun, tlangvâl pakhat chun a dawn a, a kuomah, “Ngai ta, Bethlehem mi Jesai naupa pakhat chu ka hmu ta a, ama chu kei thiemtak, mi huoitak, indo mi, thuhril thiemtak, hmêl ṭhatak a nih; a kuomah Lalpa khawm a um a nih,” a ta.

¹⁹ Chuongchun, Saula chun Jesai kuoma chun mi a tir a, “I naupa David berâm vênga um chu ka kuomah inhungtir rawh,” a ta.

²⁰ Chun, Jesai chun sabengtung, bei le uoin peng khat phur le, kêlte a lâk a, a naupa David chu Saula pêk dingin ân chawitir a.

²¹ Chun, David chun Saula kuom chu a va tlung a, a hmaa chun a va ngîr a, ama chun a lo ngaina êm êm el a; a râlthuom chawituah a ṭhang ta a.

²² Chun, Saula chun Jesai kuomah, “David hi ka kuomah um raw se, ka mit a tlung hle el,” tia hril dingin mi a tir a.

²³ Chun, hieng hi a hung na, Pathien tir khawhriin Saula chu a man po leh, David chun ṭingṭang a lâk a, a kei hlak a; chuongchun, Saula chu a hung har a, a ṭha nâwk hlak a; chun, khawhri chun a suoksan hlak a.