1 SAMUEL 15 - Pathien Lekhabu Inthieng (BSI)

Saula thuâwi nawna le hnâwla a umna

¹ Chun, Samuel chun Saula kuomah, “Lalpain a mihai chungah, Israelhai chunga lal dinga hriek nâl ding chein a mi tir a nih; chuongchun, Lalpa thuhril râwl chu ngai ta khai, Sipaihai Lalpa chun.

² ‘Amalek mihai Israelhai chunga an thilthaw Aigupta rama inthawka an hung suok laia an lo dodâl dân dâm kha kân chik zing a.

³ Amalek mihai do dingin fe la, an thil nei po po hla hrim hrim nei dêr lovin sukbohmang vawng rawh; nuhmei le pasal, naute khawm, nêne ne laihai dâm, bâwngchal le berâm dâm, sanghâwngsei le sabengtung dâm leh sukhlum vawng rawh,’ a ti a nih,” a ta.

⁴ Chuongchun, Saula chun mipuihai chu a ko khâwm a. Telaim khuoa chun a tiem a, sipai nuoi hni le Juda mi sîng khat an nih.

⁵ Chun, Saula chun Amalek mihai khuo chu a zu tlung a, ruoma chun a lo lambun a.

⁶ Chun, Saula chun Ken mihai kuoma chun, “Hung suok unla, Amalek mihai laia inthawk hin insie fihlîm ro, chuong naw chun sukhlum sa rawi ka ti cheu, nangni chun chu Israel thlahai po po Aigupta rama inthawka an hung suok khan in lo lunginsiet si a,” a ta. Chuongchun, Ken mihai chu Amalek mihai laia inthawk chun an suok ta a.

⁷ Chun, Saula chun Amalek mihai chu Havilaa inthawka Aigupta ram dep Sur chenin a thaw a.

⁸ Chun, Amalek mihai lal Agag chu a hringin a man a, mipuihai po po chu kâwlhnâmin a sât hlum vawng a.

⁹ Amiruokchu, Saula le mipuihai chun Agag chu an hla a, berâm ṭha ṭhahai, bâwngchal ṭha ṭhahai, a thau thau dâm, berâmte le a ṭha po po leh, chuonghai chu an sukhlum nuom naw a; a ṭha naw le an dit naw po chu an sukhlum vawng a.

¹⁰ Chun, Lalpa thu chu Samuel kuoma chun a hung tlung a.

¹¹ “Saula hi lala ka ruot hi kân sîr ngawt el a nih; a mi zui lai chu a mi hnung innghatin ka thupêk angin a thaw si naw a,” a ta. Chun, Samuel chu a lunginsen a, zânkhawvârin Lalpa chu a ko a.

¹² Chun, Samuel chu Saula tuok dingin zîngkâr chun a tho a, chun, “Saula chu Karmelah a fe a, ngai ta, chutaka chun hriet zingna lung a phun a; chun, a kir nâwk a, a fe pei a, Gilgala chun a zu fe tah,” tiin Samuel chu an hril a.

¹³ Chun, Samuel chu Saula kuom tieng chun a fe ta a; chun, Saula chun a kuomah, “Lalpain malsâwm raw se che, Lalpa thupêk ang chun ka thaw tah,” a ta.

¹⁴ Chun, Samuel chun, “Chuong berâm inbe ka naa hung lût le, bâwngchal inbu ka hang hriet si chu iengtizie am a na?” a ta.

¹⁵ Chun, Saula chun, “Amalek mihai ta an hung lâkpêk a nih, Lalpa i Pathien kuoma inthâwina dingin mipuihaiin berâm ṭha ṭhahai le, bâwngchal ṭha an hla a nih, chun a dang po po chu kan sukhlum vawng a nih,” a ta.

¹⁶ Chun, Samuel chun Saula kuomah, “Ngai rawh, zâni zâna Lalpain thu ka kuoma a hril, hril ka ti che,” a ta. Ama chun a kuomah, “Hril raw khai,” a ta.

¹⁷ Chun, Samuel chun, “Nanga ngaia chun mi chîntak ni la khawm, Israelhai hotu dinga siem i ni a ni naw am a nih? Chun, Lalpa chun Israelhai lal dingin hriek a nâl che a;

¹⁸ chun, Lalpa chun a tir suok che a. ‘Fe la, mi suolhai, Amalek mihai chu sukhlum vawng la, an bohmang dêr hmakhat chun thaw pei rawh,’ a ti che a.

¹⁹ Iengdinga Lalpa thu chu zâwm lo a, râllâk thil chu a bawin i baw a, Lalpa mithmua thil ṭha naw i thaw el am?” a ta.

²⁰ Chun, Saula chun Samuel kuomah, “E, Lalpa thu ka zâwm annâwm, Lalpa mi tirna tienga chun ka fe a; Amalek lal Agag ka hung man a, Amalek mihai chu ka sukhlum vawng annâwm.

²¹ Amiruokchu, mipuihai chun râllâk thil berâm le bâwngchalhai sukbohmang ding laia a ṭha ṭhahai chu Gilgal khuoa Lalpa i Pathien kuoma inthâwina dingin an hung lâk a nih,” a ta.

²² Chun, Samuel chun, “Lalpa chun Lalpa thu zâwm chu a lâwm angin pumrawhmang thilinhlânhai le inthâwinahai hi a lâwm am a nih? Ngai ta, inthâwina nêkin thuawi chu a ṭha lem a, berâmchal thau nêkin a thu pawm chu a ṭha lem a nih.

²³ Helna hi aisan thiemna suolhai leh ân ang a, kawmâwna hi milim biek le rîtlona suol tluk a nih. Lalpa thu i dit naw leiin ama khawma lal dingin a dit bîk ta naw che a nih,” a ta.

²⁴ Chun, Saula chun Samuel kuoma chun, “Thil ka suksuol dêr a ni chu, Lalpa thupêk le i thu chu ka lo bawsiet a ni zing chu tie; mipuihai ka ṭia an râwl ka lo ngai leiin.

²⁵ Chuongchun, ka suol chu ngaidam la, Lalpa ka biek theina dingin mi fepui nâwk rawh,” a ta.

²⁶ Chun, Samuel chun Saula kuomah, “Fepui naw tawp ka ti che, Lalpa thu chu i dit si naw a; chun, Lalpa khawmin Israelhai lal dingin a dit bîk ta naw che a nih,” a ta.

²⁷ Chuongchun, Samuel chu fe dinga a hang inher chun a puon hmawr chu a chel a, a tlêr ta a.

²⁸ Chun, Samuel chun a kuomah, “Vawisûna inthawk hin Lalpa chun Israel ram hi a lâkpêk ta che a, i nêka ṭha lem i tuolbâwm a pêk tah a nih.

²⁹ Chun, Israelhai Thahrui chu inkhêl naw ni a, inkîr bawk naw nih; mihriem anga inkîr nâwk el mi a ni naw a,” a ta.

³⁰ Chuongchun, ama chun, “Ka lo suol a ni ta a, nisienlakhawm, ka mihai upa le, Israelhai hmaa hin mi chawimawi dingin ka ngên che a nih; chun, Lalpa i Pathien ka biek theina dingin mi fepui hrâm bawk la,” a ta.

³¹ Chuongchun, Samuel chun Saula chu a fepui ta a; Saula chun Lalpa chu a biek ta a.

³² Chun, Samuel chun, “Amalek mihai lal Agag chu ka kuomah hung ṭhuoi ro,” a ti a. Chuongchun, Agag chu a kuoma chun inthin pumin a va fe a. Chun, Agag chun, “Thina kha chu ka pumpel ta chu ni âwmtak a na,” a ta.

³³ Chun, Samuel chun, “I kâwlhnâmin nuhmeihai nau boa a siem angin i nu khawm nuhmei laia nau bo mi nîng a tih,” a ta. Chuongchun, Samuel chun Agag chu Gilgal khuoa chun Lalpa hmaah a sât nawi neng el ta a.

³⁴ Chun, Samuel chu Rama khuoah a fe a; chun, Saula chu a umna khuo Gibeaa chun a hang fe ta a.

³⁵ Chuongchun, Samuel chun a thi ni chenin Saula chu a sir nâwk ta naw a; amiruokchu, Samuel chu Saula leiin a lungngai a nih; chun, Lalpa khawm chu Israelhai lal dinga Saula a lo siem chu ân sîr a nih.