1 SAMUEL 12 - Pathien Lekhabu Inthieng (BSI)

Mipuihai kuoma Samuel thuhril

¹ Chun, Samuel chun Israel mi po pohai kuoma chun, “Ngai ta u, ka kuoma in thuhrilhai po poa chun in râwl ka ngai a, lal ding chu ka siempêk ta cheu a.

² Tuhin, ngai ta u, lal chun a lo keihruoi ta cheu a, kei chu ka hung tarin ka lu khawm ân ṭuok ta a; chun, ngai ta u, ka naupasalhai chu nangni lai an um a, ka tleirâwla inthawkin tuchen hin ka keihruoi cheu a.

³ Hitaka hin ka um a, Lalpa hmaa le a hrieknâl hmaa hin mi sêl ro le? Tu bâwngchal am ka lâkpêk hlak a? Tu sabengtung am ka lâkpêk hlak a? Tu am ka hlêm ta hlak a? Tu am ka suknawmna hlak a? Ka mit sukdel dingin tu kuoma inthawkin am thamna ka lâk hlak a? Thung nâwk vawng ka ti cheu,” a ta.

⁴ Anni chun, “I mi hlêm ngai naw a, i mi suknawmna ngai bawk naw a, tu kuta inthawk khawma lâk âwm lo chu i lâk ngai bawk nawh,” an ta.

⁵ Chun, ama chun an kuomah, “Ka kuta hin âwm naw ieng khawm in hmu nawh ti vawisûn hin Lalpa chu nangni laia hretu a nih; a hriek nâl khawm chu hretu a nih,” a ta. Chun, anni chun, “Ama chu hretu a nih,” an ta.

⁶ Chun, Samuel chun mipui kuoma chun, “Mosie le Aron ruottu le Aigupta rama inthawka in puhai ṭhuoi suoktu Lalpa chu a nih in sawnnaw.

⁷ Chuongchun, ngîr ṭhap unla, Lalpa hmaa hin Lalpain in chunga le in puhai chunga thil a lo thaw fel dân hang sûtpui ka ti cheu.

⁸ Aigupta rama Jakob a lût hnung khan, in puhai chun Lalpa an ko a, chuongchun, Lalpa chun Mosie le Aron a tir a, anni chun in puhai chu Aigupta rama inthawkin an ṭhuoi suok a, hi hmuna hin an inumtir ta a.

⁹ Nisienlakhawm, Lalpa an Pathien chu an theinghil a; chun, ama chun Hazor sipai hotu Sisera kuta le Philistin mihai kuta le, Moab lal kutah a zawr a, chun, anni chun an do a.

¹⁰ Chun, Lalpa chu an ko a, ‘Lalpa chu kan nghatsan a, Baalhai, Astarothhai rawng kan bâwl leiin kan lo suol tah a nih; nisienlakhawm, kan hmêlmahai kuta inthawk hin mi sansuok ta la; chuongchun, i rawngbâwl kan tih,’ an ta.

¹¹ Chun, Lalpa chun, Jerubbaal hai, Bedan hai, Jephtha hai, Samuel hai a tir a, in hmêlma khingtieng khingtienga mihai kuta inthawkin a sansuok cheu a, himtakin in um a.

¹² Chun, Ammon thlahai lal Nahas chu nangni do dingin a hung ti in hriet phingleh ka kuomah, ‘A ni nawh ie, lalin ro mi rêlpêk raw se,’ in ti a, Lalpa Pathien chu in lal a ni zing si a.

¹³ Chuleiin, in lal thlang le hni chu en ta u, Lalpa chun lal a siempêk ta cheu a ni hi.

¹⁴ Lalpa chu in ṭi a, a rawng in bâwl a, a râwl in ngai a, Lalpa thupêk in helsan naw a, nangni le in chunga rorêltuhai leh Lalpa in Pathien zuituhai in ni chun ṭhang a ta;

¹⁵ amiruokchu, Lalpa râwl chu ngai lova Lalpa thupêk in helsan chun in puhaiin Lalpa kut an tuor ang bawkin nangni khawma tuor in tih.

¹⁶ Chuongchun, ngir ṭhap unla, Lalpain in mithmua thil ropuitak a thaw ding hi lo en ro.

¹⁷ Vawisûn hin bu an sîk a ni naw am a nih? Vân inrûmtir ding le ruo insûrtir dingin Lalpa chu ko ka ta; chuongchun, lal in hni thua hin Lalpa mithmua thil in thaw suol hi a nasatzie hi hrein hmûng in tih,” a ta.

¹⁸ Chuongchun, Samuel chun Lalpa chu a ko a, Lalpa chun chu ni chun vân ân rûmtir a, ruo ân sûrtir ta a; chuongchun, mipui chun Lalpa le Samuel chu an ṭi ta êm êm el a.

¹⁹ Chun, mipui po po chun Samuel kuoma chun, “Kan thi nawna dingin Lalpa i Pathien kuoma chun i siehlawhai hi mi ṭawngṭaipêk rawh, hi thil ṭha nawtak, lal kan lo hni hi, kan suol po po belsatu a ni ta hi,” an ta.

²⁰ Chun, Samuel chun, mipuihai kuoma chun, “Ṭi naw ro, hi thil ṭha nawtak hi thaw chu in thaw ngei a, amiruokchu, Lalpa in zui chun ama chu pêtsan chuong naw unla, in lungril po poin Lalpa rawng chu bâwl lem ro;

²¹ iengkhawma ṭhahnem lo ding le sansuok thei lo ding cheu zuiin pêtsan naw ro, teplo mei mei an ni si a.

²² A hming ropuitak lei hin Lalpa chun a mihai chu a nghatsan âwm si naw a, a mihai ni dinga siem cheu chu Lalpa lâwm zâwngtak a ni si a.

²³ Chu chau khawm chu a ni naw a, in ta dinga ṭawngṭai ma a, Lalpa chunga suol chu keia ta ding khawma a âwm naw tawp a nih; lampui ṭha le lampui indik khîkhmu pei lem ka ti cheu.

²⁴ Lalpa chu ṭi phawt el unla, in lungril po poin titakzetin a rawng bâwl unla, in ta dinga thil a thaw ropuizie hi ngaituo ro khai.

²⁵ Amiruokchu, suoltaka thil in la thaw rawp chun bohmang in tih, nangni le in lal khawm,” a ta.