1 SAMUEL 10 - Pathien Lekhabu Inthieng (BSI)

¹ Chuongchun, Samuel chun hriek bâwm chu a hung lâk suok a, a lua chun a bur a, a fâwp a, “Lalpa chun a rochan hai chunga hotu dingin hriek a nâl che a ni naw am a nih? Lalpa mipuihai chungah ro rêl i ta, an vêla an hmêlmahai kuta inthawkin sandam i tih. Chun, hi hi Lalpain a rochanhai chunga hotu dingin a ruot che ti inchikna chu ning a tih.

² Vawisûn hin i mi fesan hnungin, Zelzaah Benjamin ramria Rakil thlân kâwlah mi pahni intuokpui i ta; chun, anni chun i kuomah, Sabengtung i zawnghai kha an hmu ta ie; chun, ngai ta, i pa chun sabengtung chu a ngaituo ta naw a, nangma mawl a ngaituo a, ‘Ka naupa chu iengtin am ka thaw ding a ni ta leh aw, a ti a ti el a,’ tîng an ta.

³ Chun, chutaka inthawk chun fe pei la, Tabor thingsaisuo chu va tlung i ta, chutaka chun mi pathum, Bethela Pathien kuoma hang fe dinghaiin lo intuokpui an ti che a; pakhat chun kêlte pathum pawm a ta, pakhat chun beiphêk pathum chawi a ta, chun, pakhat chun uoin peng chawi bawk a tih.

⁴ Chun, chibai bûk an ti che a, beiphêk chu phêk hni pêng an ti che a; chu chu lâng i ta.

⁵ Chu hnunga chun Philistin sipaihai umna Pathien tlâng chu va tlung i ta, chun, chutaka khuo i va tlung chun zâwlneihai perkhuong dâm, khuongtê dâm, theihle dâm, ṭingṭang dâm chawihai hma ṭhuoia bâwlhmuna inthawka hung thla intuokpui i ta; chun, thu hril duol duol an ta;

⁶ chun, Lalpa thlarau nasatakin i chungah hung tlung a ta, nang khawm thu an hril duol duolnaa chun ṭhang vêng i ta, chun, mi danglam daiah inchang el i tih.

⁷ Chun, hieng inchiknahai hi i chunga a hung um pha chun thil hung umin a zir ang peiin i thaw ding a nih; Pathien chu i kuomah a um pei si a.

⁸ Chun, ka fe hma hin Gilgala chun lo zu fe la, chun, ngai ta, kei khawm pumrawhmang thilinhlânhai le inremna inthâwinahai inhlân dingin i kuomah hung thlâng ka ta; i kuoma ka hung a, i thaw ding ka hung hril hma che chun ni sari i lo um ding a nih,” a ta.

⁹ Chun, Samuel chu ṭhe dinga a hnungnghat phingleh Pathien chun lungril danglam dai a pêk ta a; chun, chuong inchiknahai po po chu chu ni chun a hung tlung ta vawng a.

¹⁰ Chuongchun, tlâng chu an hang tlung chun, ngai ta, zâwlneihai chun an intuokpui a; chun Lalpa thlarau nasatakin a hung tlung a; thu an hril duol duolnaa chun a ṭhang ve ta a.

¹¹ Chun, kha hmaa ama lo hre hlakhaiin zâwlneihai thu hril duol duolnaah a ṭhang ve ti an hriet chun mihai chu an inbiek a, “Kis naupa chunga thil hung um hi ieng am a ni ta leh? Saula khawm chu zâwlneihai lai a ṭhang ve am a ni el tah?” an ta.

¹² Chun, a umna khuoa mi pakhatin a dawn a, “An pa chu tu am a ni bîk leh?” an ta. Chuongchun, “Saula khawm chu zâwlnei a ni ve el ta a ni maw chu?” ti chu ṭawngna takah an hmang ta zing a.

¹³ Chun, an thu hril duol duolnaa a ṭhang zo chun bâwlhmun chu a tlung ta a.

¹⁴ Chun, Saula pami chun a kuoma le a siehlaw kuoma chun, “Khâwlai am in feh a?” a ta. Chun, ama chun, “Sabengtung kan zawng a nih, chun, kan hmu zo naw phingleh Samuel kuomah kan fe a nih,” a ta.

¹⁵ Saula pami chun, “Samuel chun i kuomah ieng am a na a hril mi hril raw khai,” a ta.

¹⁶ Saula chun a pami kuoma chun, “Sabengtunghai chu an hmu tah ti a mi hril ngei kha tie,” a ta. Amiruokchu, ram chungchâng thu Samuelin a hril chu a hril naw a.

¹⁷ Chuongchun, Samuel chun mipuihai chu Mizpaa chun Lalpa kuomah a ko khâwm a;

¹⁸ Israel thlahai kuoma chun, “Lalpa Israelhai Pathien chun hieng ang hin a ti a nih, ‘Israelhai chu Aiguptaa inthawkin ka ṭhuoi suok a, Aigupta mihai kuta inthawk le, a hnuoisietuhai cheu ram po poa inthawkin ka sansuok cheu a.

¹⁹ Nisienlakhawm, vawisûn hin in lunginzîngna po po le in rinumna po poa sanhimtu cheu in Pathien ngei chu in dit naw a, a kuomah, A ni nawh, lal mi siempêk rawh’ in ti a. Chuleiin, tuhin a hnama hnam le a chia chiin Lalpa hmaah hung inlang ro,” a ta.

²⁰ Chuongchun, Samuel chun Israel chi po po chu a hung inlangtir a, chun, Benjamin chi chu thlang a lo ni ta a.

²¹ Chun, Benjamin chihai chu a sûngkuoin a hung inlangtir a, Matri mi sûngkuo chu thlang an lo ni ta a; chun, Kis naupa Saula chu thlang a lo ni ta a, nisienlakhawm, ama chu an hang zawng a, an hmu naw a.

²² Chuongchun, Lalpa chu an hang indawn nâwk a, “Mi dang la hung ding an um am?an ta. Chun, Lalpa chun a dawn a, “Ngai ta u, thuomhnaw lai ân bihmang a nih,” a ta.

²³ Chuongchun, an tlân a, an va ṭhuoi suok a; chun, mipui lai a hang ngîr chun mi lai chun ân sâng tak el a, mi dang hrim hrim a liengko nêka insâng khawm an um naw a.

²⁴ Chun, Samuel chun mi po po kuomah, “Lalpa mi ruot hi in hmu am? Mipuihai po po lai ama ang hrim hrim an um nawh,” a ta. Chun, mipuihai chu an khêk a, “Pathienin laltak chu humhim raw se,” an ta.

²⁵ Chuongchun, Samuel chun mipuihai chu ram umdân ding chu a hril a, lekhabuah a ziek a, Lalpa hmaa chun a sie a. Chun, Samuel chun mipuihai chu mâni in tieng seng ân ṭintir ta a.

²⁶ Saula khawm chu Gibea khuoa a in tieng a fe ta a; mi huoisenhai, an lungril Pathienin a tâwkhai, chu a kuomah an fe ve a.

²⁷ Amiruokchu, Belial nauhai tuhaiin amani ruok chun, “Hi mipa hin iengtin am mi sandam thei hlak a ta?” an ta. Chuongchun, ama chu an ngainêp a, thilpêk hrim hrim an pêk nuom naw a. Nisienlakhawm, ama chu a to zing a.