1 SAMUEL 1 - Pathien Lekhabu Inthieng (BSI)

Samuel Pieng Thu

¹ Ephraim tlâng rama Ramathaim-zophim khuoa chun mi pakhat a um a, a hming chu Elkana a nih; ama chu Jeroham naupa a na, ama chu Elihu naupa a na, ama chu Tohu naupa a na, ama chu Ephraim mi Zuph naupa a nih.

² Nuhmei pahni a nei a, pakhat hming chu Hanna a na, a dang hming chu Peninna a nih; chun, Peninna chun nauhai a nei a, Hanna ruok chun nau a nei ve naw a.

³ Chun, ama chu an khuoa inthawkin Silo khuoah sipaihai Lalpa chu be dingin kum tin a hang fe hlak a. Chutaka chun Eli naupasalhai pahni, Hophni le Phinehas, Lalpa thiempuhai chu an um a.

⁴ Chun, Elkana inthâwi ni a hung tlung chun a nuhmei Peninna le a naupasalhai le a naunuhai po po chu chanvo a siempêk a.

⁵ Hanna ta ding ruok chun chan hni a siempêk a, Hanna chu a hmangai êm êm si a; nisienlakhawm, Lalpain a sul a sukpingpêk a.

⁶ Chun, Lalpain a sul a sukpingpêk leiin a lungngaina chu chawktho tumin a khingpui chun a lo thaw rawp hlak a.

⁷ Chuong anga kum tin a lo thaw hlak leiin, Lalpa ina a hang fe zâtin a lungngaina chu amanu chun a lo chawktho hlak a. Chuleiin, Hanna chu a ṭap a ṭap a, bu khawm a fâk naw a.

⁸ Chun, a pasal Elkana chun a kuomah, “Hanna, ieng dinga i ṭap am? Ieng dinga bu i fâk naw am a na? Ieng dinga i lungril i suknat am? Naupasal sâwm nêk khawmin i ta dingin ka ṭha lem a ni naw am a nih?” a ta.

⁹ Chun, Silo khuoa bu an fâk a an dâwn zo chun Hanna chu a tho a. Thiempu Eli chu Lalpa biek in kawtkhâr ban bula a ṭhungnaa chun a ṭhung a.

¹⁰ Chun, Hanna chu a lungril a lunginzîng êm êm el a, Lalpa kuomah a ṭawngṭai a, lungsetakin a ṭap a.

¹¹ Chun, thu a tiem a, “Aw sipaihai Lalpa, i suoknu tlâwmzie hi i hriet tak meu a, i mi hriet zing a, i suoknu hi i mi theinghil naw a, i suoknu hi naupasal i pêk chun a dam sûng po chu Lalpa pe ve thung ka ta, a lu khawm vâw hrim hrim ni naw ni,” a ta.

¹² Chun, Lalpa hmaa a ṭawngṭai zing lai chun Eli chun a hmûr châng chu a lo inchik a.

¹³ Hanna chun a lungrilin a hril a, a hmûr chu a châng a, a râwl chu hriet a ni naw a; chuleiin, Eli chun zu ân rui niin a ring a.

¹⁴ Chuongchun, Eli chun a kuomah, “Ieng chen am inrui zinga i um ding a na? I uoin chu sie hmang raw khai,” a ta.

¹⁵ Hanna chun a dawn a, “Ni lo, ka lalpa, nuhmei lungril lungngai tâwpkhâwk ka na; uoin khawm, zupui khawm ka dâwn dêr naw a, Lalpa hmaa chun ka lungril ka phawr lem a nih.

¹⁶ I suoknu hi Belial naunuah inbûk naw raw khai; ka lungrila sip liem ka lungninawna le ka lungngaina ka hril a ni hi,” a ta.

¹⁷ Eli chun, “Lungmuongtakin fe raw khai, Israelhai Pathien chun i thil hni chu pe raw se che,” a ti a, a dawn a.

¹⁸ Ama chun, “I siehlawnu hi i mittlung ni raw se,” a ta. Chuongchun, nuhmei chu a fe ta a, bu dâm a fâk a, lungngai hmêl a put ta naw a.

¹⁹ Chun, zingkâr an tho a, Lalpa chu an biek a, an fe ta a, Rama khuoa an in chu an tlung nâwk ta a; chun, Elkana chun a nuhmei Hanna chu a pâwl a, chun, Lalpain ama chu a hriet zing a.

²⁰ Chuongchun, Hanna chun nau a vawn a; a hun a hung tlung chun naupasal a nei a, “Lalpa ka ihni a nih,” tiin a hminga chun Samuel a sak a.

²¹ Chun, Elkana le a sûnghai po po chu Lalpa kuoma an kum tin inthâwina inhlân ding le an thutiem hlen dingin an hang fe a.

²² Hanna ruok chu a hang fe ve naw a; a pasal kuoma chun, “Kei chu naute hin nêne nêk a bân hmakhat chu hang fe ve naw ning ah; chu pha ruok chun Lalpa hmaa ân lang theina dingin ṭhuoi ka ta, chutaka chun um zing el tâng a tih,” a ta.

²³ A pasal Elkana chun a kuomah, “Ṭha âwma i ti ang phawt chun thaw el rawh; a nêne nêk în bântir chenin um rawh, amiruokchu, Lalpa chun a thu chu sukdet ngei raw se,” a ta. Chuongchun, a nêne nêk bân hmakhat chun nuhmei chu a um ta a, a naupa chu a enkawl a.

²⁴ Chun, nêne nêk ân bântir phing chun beiphit epha khat le uoin saidawiûm khat chawiin sebâwng pathum leh a hang ṭhuoi a, Silo khuoa Lalpa ina chun a fepui a; naupang chu a la naupang hle a.

²⁵ Chun, bâwngchal chu an that a, naupang chu Eli kuoma chun an ṭhuoi a.

²⁶ Chun, ama chun, “Aw ka lalpa, i hringna sâlin ka hril a, kei chu aw lalpa, hi hmuna i kâwla ngîr a, Lalpa kuoma ṭawngṭaitu nuhmei ka ni ngei a.

²⁷ Hi naupang hni hin ka ṭawngṭai a na, chun, Lalpa chun ka hni chu a mi pêk ta a.

²⁸ Chuleiin, kei khawma Lalpa kuomah kân hlân a nih; a dam sûng poa Lalpa ta dinga inhlân a nih,” a ta. Chun, chutaka chun Lalpa chu a biek a.