1 PETER 5 - Pathien Lekhabu Inthieng (BSI)

Pathien berâm ruol

¹ Chuongchun, nangni laia kohran upahai chu, kei, in upatpui, Krista tuornahai hretu, ropuina hung inlang ding chang vetu ding hin kân fui cheu.

² Nangni laia Pathien Pâwlhai chu enkawl ro. Thaw ding a ni lei ni lovin, Pathien thu anga inhâwk pum lemin, hlêpna tirdakum dit lei ni lovin, lungrila inhâwktak lemin,

³ in chanhai chungah insuklal bawk lovin, pâwlhai enkhi dingin insiem lemin inrawi ro.

⁴ Chun, Berâm Vêngtu Laltak chu a hung inlang pha, ropuina lallukhum chuoi thei naw chu hmûng in tih.

⁵ Chuong ang bawkin, nangni tleirâwl deuhai, upahai kuomah intuklût ro. Anih, in rêngin rawng inbâwltuo seng dingin thuhnuoirawlnain inthuom ro; Pathienin chapohai a kal a, inngaitlâwmhai ruok chu lunginsietna a pêk hlak si a.

⁶ Chuleiin, a huntaka chun a chawimawi theina ding cheuin, Pathien kut hrâttak hnuoia chun insukhnuoi unla,

⁷ amain a ngaisak hlak cheu leiin in lunginzîngna po po ama chungah innghat vawng ro.

⁸ Ngaiven unla, fimkhur ro; in khingpui Diebol chu sakeibaknei inrûm hlak angin a fâk thei ding zawngin ân vêl ruoi hlak a nih.

⁹ In unau khawvêla umhai chunga chun chuong anga tuorna chu a tlung ve a nih ti hrein, awi dettaka umin, ama chu do ro.

¹⁰ Chun, lunginsietna po po Pathien, a chatuon ropuina chang dinga Kristaa kotu cheu chun, sâwt nawtê in tuor hnungin siemṭha famkimin, sukdetin, sukhrât a ti cheu.

¹¹ Ama kuoma chun rorêlna chu chatuonin um raw se. Amen.

Inthlâna thu

¹² Ka unaupa ringumtaka ka iruot Silvan kuta hin, nangni infui le, chu chu Pathien lunginsietna tak tak a nih ti inhriettirin, tawitêin in kuomah ka ziek a nih; chuonga chun ngîr det ro.

¹³ Babulona um, nangni anga thlangnu hin chibai a bûk cheu; chuong ang bawkin ka naupa Marka khawmin chibai a bûk cheu.

¹⁴ Hmangaina fâwpa fâwpin chibai inbûk ro. Nangni laia Kristaa um taphawt kuoma chun inremna um raw se.