1 LALHAI 4 - Pathien Lekhabu Inthieng (BSI)

Solomon a mi lien le hotuhai

¹ Lal Solomon chu Israelhai po po chungah lalin a um ta a.

² Hienghai hi a mi lien neihai chu an nih: Zadok naupa Azaria chu thiempu a na, Sisa naupahai Elihoreph le Ahija chu lekha ziektu an na,

³ Ahilud naupa Jehosaphat chu chanchin ziektu a na.

⁴ Jehoiada naupa Benaia chu sipai hotu a na; Zadok le Abiathar chu thiempu an nih;

⁵ Nathan naupa Azaria chu hotuhai chunga mi a na; Nathan naupa Zabud chu thiempu le lal ruolpa a na,

⁶ Ahisar chu insûng tieng hotu a na; Abda naupa Adoniram chu sinthawa ruoi luihai hotu a nih.

⁷ Solomon chun Israel po pohai chunga chun hotu sâwmpahni a nei a, chuonghai chun lal ta ding le a sûngkuohai ta ding chun fâk ding an ngaituo hlak a, mi pakhatin kum khatah thla khat pei fâk ding a ngaituo ding a nih.

⁸ Chun, hieng hi an hminghai chu a nih: Ephraim tlâng ramah Ben-hur;

⁹ Makaz khuoa dâm, Saalbim khuoa dâm, Beth-semes khuoa dâm, Elonbeth-hanan khuoa dâm chun Ben-dekar a na;

¹⁰ Aruboth rama chun Ben-hesed a na, ama chun Soko le Hepher ram po po a chang sa a;

¹¹ Dor zosâng ram po poah, Ben-abinadab a na; ama chun Solomon naunu Taphath chu nuhmeiah a nei a;

¹² Taanak khuo le Megiddo khuoa dâm, Jezreel khaw hnuoi Zarethan khaw bula um Beth-sean biel po poa dâm, Beth-seana inthawka Abelmeholah-a dâm, Jokmeam ram dep chenin Ahilud naupa Baana a na;

¹³ Ramoth-gilead khuoah Bengeber, ama chun Manasse naupa Jair khuo, Gilead rama umhai chu a chang sa a; Basan rama Argob biel, khaw ropuitak tak khaw sâwmruk, kul le a kalna dâr tluon neihai khawm a chang sa a;

¹⁴ Mahanaim khuoah Iddo naupa Ahinadab a na;

¹⁵ Naphtali ramah Ahimaz a na; ama khawm chun Solomon naunu Basemath chu nuhmeiah a nei a;

¹⁶ Aser le Bealoth khuohaia chun Husai naupa Baana a na;

¹⁷ Issakar ramah Parua naupa Jehosaphat a na;

¹⁸ Benjamin ramah Ela naupa Simei a na;

¹⁹ Amorhai lal Sihon le Basan lal Og ram Gilead ramah Uria naupa Geber; chu rama chun hotu pakhat a um.

Solomon a varna le a hausakna

²⁰ Judahai le Israelhai chu tuisuoriet pang ṭieu phaiphin zât zetin an tam a: an fâkin an dâwn a, hlimtakin an um hlak a.

²¹ Chuongchun, Solomon chun Vadunga inthawkin Philistin mihai ram le Aigupta ramri chenin ram po po chunga chun ro a rêl a; lâwmmanhai an hung chawi hlak a, Solomon dam sûng po chun a rawng an bâwl hlak a.

²² Solomon ni khat fâk khawp chu beiphit inditak tekhâwng sâwmthum le, beiphit narân tekhâwng sâwmruk a nih;

²³ chun, bâwngchal thâutak sâwm, bâwngchal tla mi sâwmhni leh, berâm za leh, chuong naw khawm chu sakhihai dâm, sangaihai dâm, sakhi chalhai dâm, âr châwm thâuhai leh a nih.

²⁴ Vadung râltieng ram po po, Tipsaa inthawka Gaza chenin; Vadung râla lalhai po po chunga chun ân lal a; a vêla mihai po po le chun râlmuongin an um hlak a.

²⁵ Chun, Solomon dam sûng po chun Judahai le Israelhai chu Dana inthawka Beer-seba khuo chenin mi tin mâni grêphrui bula le mâni theichang kûng bula chun lungmuongtakin an um seng a.

²⁶ Chun, Solomon chun a tawlailîr siena dingin sakawr in sîng li le, sakawr chung chuong mi sîng khat le sâng hni a nei a.

²⁷ Chuong hotuhai chun mâni chan thla peiah Solomon le lal Solomon dawkâna hung awt vetuhai po po fâk ding chu an ngaituo hlak a; pêk kim lo an nei ngai nawh.

²⁸ Mi tinin an thaw dinga ruot ang peiin an umna ding hmuna chun sakawrhai le ran tlân hrâttakhai ta dingin buṭei le bupâwlhai an hung siekhâwl hlak a.

²⁹ Chun, Pathienin Solomon chu varna le hrietna nasatak le, lungril lienna tuipui kama phaiphin ang el a nasa a pêk a.

³⁰ Solomon varna chun khawsak nauhai po po varna le Aigupta mihai varna po po chu a khûm vawng a.

³¹ Mi po po nêkin a var lem a; Mahol nauhai, Ezra mi Ethan hai, Heman hai, Kalkol hai, Darda hai nêk khawmin; chuongchun, a vêl hnam po po lai chun a hming ân thang ta a.

³² Thuvarhai sâng thum a hril a; chun, a hlahai chu sâng khat le panga a nih.

³³ Thing chanchin hai khawm, Lebanon tlânga sidar thinga inthawka kula hung ṭo suok hussop chenin a hril hlak a; sa chanchin dâm, vate chanchin dâm, bawkinvâka lâwn mi chanchin dâm, nga chanchin dâm khawm a hril thei a.

³⁴ Chuongchun, Solomon varna chanchin hre taphawthai chu khawvêla lalhai po poa inthawkin chi tina mi a varna ngai dingin an hung hlak a.