1 LALHAI 3 - Pathien Lekhabu Inthieng (BSI)

Solomonin Pharao naunu a nei

¹ Chun, Solomon chun Aigupta lal Pharao le inkungkeina a siem a, Pharao naunu a nei a, ama in le Lalpa in a bâwl hma le, Jerusalem khuo kula ân huol vêl hmakhat chun David khawpuia chun ân umtir a.

² Mipuihai chu bâwlhmunahai an inthâwi el hlak a, chu hma chun Lalpa hming ta dinga in bâwl a la um hri naw leiin.

³ Solomon chun Lalpa chu a hmangai a, a pa David thuruothai chu a zâwm hlak a, bâwlhmunahai ân thâwi a, rim inhnikhai a raw el hlaka chu.

Varna dinga Solomon ṭawngṭaina

⁴ Chun, lal chu inthâwi dingin Gibeon khuoah a fe a, chu chu bâwlhmun ropuitak a ni si a; Solomon chun chu maichâm chunga chun pumrawhmang thilinhlân sâng khat zet ân hlân a.

⁵ Chun, Gibeon khuoa chun zânah Lalpa chu Solomon kuomah a mangah a hung inlâr a; chun, Pathienin, “Hni ta, ieng am a na ka pêk ding che?” a ta.

⁶ Solomon chun, “I siehlaw ka pa David kha i mithmua thutak le, felnaa leh, lungril indiktak puta a um ang pei khan nang chun a kuomah lunginsietna nasatak în langtir a, nangin hi lunginsietna nasatak hi a ta dingin i sie pêk a, a lalṭhungphaa ṭhung ding naupa i pêk a, vawisûna a hung um ta ang ngei hin.

⁷ Chuongchun, aw Lalpa ka Pathien, nang chun i siehlaw hi ka pa David aia chun lalah i lo siem ta a; kei chu chu naupangsie el ka la na, thu hung tieng le fe tieng khawm hi ka la hriet naw a,

⁸ I siehlaw hi i mihai i thlanghai, mi tamtak, an tam leia tiem sêng ruollo le, a zât hriet sêng ruol lohai lai hin a um a na.

⁹ Chuongchun, i mihai rorêlpêkna dingin i siehlaw hi hrietna lungril hung pe la, a sie le a ṭha ka thlier theina dingin, i mi hieng zât zozai hi tuin am ro rêlpêk thei a ta le?” a ta.

¹⁰ Chun, Solomonin chu thil chu a hni leiin, chu thuhril chun Lalpa a suklâwm hle a.

¹¹ Chun, Pathien chun a kuomah, “Nangin i ta dinga dam sâwtna hni lo a, hieng ang hi i hni lem leiin le, i ta dinga hausakna khawm hni lo a, i hmêlmahai thina ding khawm hni lo a, i ta dinga rorêl thiemna i hni leiin, ngai ta, i hni ang chun ka thaw ta a;

¹² ngai ta, varna le hrietna lungril ka pêk che a nih; chuongchun, i hmaah nangma ang hrim hrim tukhawm an um naw a, i hnunga khawm nanga ang hrim hrim chu tukhawm hung um ta naw bawk an tih.

¹³ Chun, i hni naw hausakna le ropuina khawm ka pêk bawk che; Chuongchun, i dam sûngin lalhai lai chun nanga ang hrim hrim um naw ni hai.

¹⁴ I pa Davidin a hraw anga, ka thuruothai le ka thupêkhai pawm dinga ka lampuihai i hraw chun indam sâwttir bawk ka ti che,” a ta.

¹⁵ Chun, Solomon chu a hang har a, ngai ta, mang a lo ni zing el a; chun, Jerusalemah a fe a, Lalpa thuthlung bâwm hmaah a ngîr a, pumrawhmang thilinhlân le inremna thilinhlân ân hlân a; a siehlaw po pohai ta dingin ruoi a ṭhe a.

Solomonin vartaka ro a rêlna

¹⁶ Nuhmei pahni nawchizawr, lal kuoma chun an hung a, ama hmaah an hang ngîr a.

¹⁷ Chun, nuhmei pakhat chun, “Aw ka lalpa, hi nuhmei le hin in khata um ve ve kan na, chu ina a um ve lai chun nau ka nei a.

¹⁸ Chun, ka nau nei ni thum hnunga chun hi nuhmei khawm hin a nei ve a; um hmunkhat kan na, chu ina um keini pahni chau naw chu, chu ina chun tukhawm mikhuol um an um naw a.

¹⁹ Chun, hi nuhmei nau hi zânah a lo thi a; a delhlum a nih.

²⁰ Chuongchun, zân lai chun a tho a, i suoknu hi a in kârin ka naupa ka kuoma um chu a lâk a, a pawm a, a nau thi chu a mîn pawmtir a.

²¹ A zînga zîngkâra ka nau nêne pe dinga ka hang tho chun a thi a lo ni zing el a, nisienkhawm, zîngkâra ka hang en chieng chun, ngai ta, ka naupa, ka inei kha a lo ni ta dêr da el a,” a ta.

²² Nuhmei dang chun, “Ni lo, a dam lem hi ka naupa a na, a thi hi i naupa a nih,” a ti ve a. Pakhat chun, “Ni lo, a thi hi i naupa a na, a dam hi keia naupa a nih,” a lo ti tlat bawk a. Chuong ang chun lal hmaa chun an hril ve ve a.

²³ Chuongchun, lal chun, “Pakhatin, ‘A dam lem hi ka naupa a na, a thi hi i naupa a nih,’ a ti a, chun, pakhatin, ‘Ni lo, a thi hi i naupa a na, a dam hi ka naupa a nih,’ a ti bawk si a,” a ta.

²⁴ Chun, lal chun, “Kâwlhnâm mi hung lapêk ta u,” a ta. Chuongchun, kâwlhnâm chu lal hmaa chun an hung lâk a.

²⁵ Chun, lal chun, “Nautê a dam kha tum hni insuo unla, a chenve chu pakhat kha pe unla, a chenve chu pakhat kha pe ro,” a ta.

²⁶ Chuongchun, nautê dam lem a nu chun nautê chu a lainat êm êm el si a; lal kuoma chun, “Aw ka lalpa, nautê dam hi ama kha pe el rawh, a that chu that lul naw raw khai,” a ta. Pakhat lem chun, “Chang bîk naw tawp ka tih, nang khawma chang bîk naw bawk i tih, tanbawng el ro,” a ta.

²⁷ Chuongchun, lal chun a dawn a, “Nautê dam kha a hmasanu kha pe ro, that dêr naw ro, ama ngei kha a nu a ni kha,” a ta.

²⁸ Chun, Israelhai po po chun chu thua lal rorêl dân chu an lo hriet a; lal chu an ṭi ta hle el a; rorêlna dinga Pathien varna amaa chun a um ti an hriet ta si a.