1 LALHAI 12 - Pathien Lekhabu Inthieng (BSI)

Israel helna

¹ Chun, Rehoboam chu Sekem khuoah a fe a, Israelhai po po chu Sekem khuoa chun ama lala siem dingin an fe ta si a.

² Chun, Nebat naupa Jeroboam chun chuong thu chu a lo hriet chun (lal Solomona inthawka a tlânhmangna Aigupta rama la um a na, chuongchun Jeroboam Aigupta rama la um zing chu an zûn kotir a),

³ Jeroboam le sipai pungkhâwmhai po po chu an hung a, Rehoboam kuoma chun,

⁴ “I pa khan kan rîngkawl a sukrik êm hlak a, chuleiin, i pa mi sawr rimsikna le, a rîngkawl riktak kan chunga ân nghat hi mi sukzângpêk la, chuongchun, i rawng bâwl kan tih,” tiin an hung hril a.

⁵ Ama chun an kuomah, “Ni thum sûng chu lo va fe kieng phawt unla, chun, ka kuomah hung nâwk ro,” a ta. Chun, mipuihai chu an fe kieng ta phawt a.

⁶ Chun, lal Rehoboam chun a pa Solomon dam laia a kâwla um hlak upahai chu, “Hieng mipuihai hi ka dawn dân ding ieng am mi ruotpui in ta le?” a ta.

⁷ Anni chun a kuomah, “Tuhin hienghai siehlawa hin i um a, an rawng i bâwl a, anni chu i dawn a, an kuoma thu ṭhatak hril i tum chun, kumkhawtluongin i siehlawah um an tih,” tiin an hril a.

⁸ Nisienlakhawm, upahai remruotpui chu a pawm naw a, ama ruolpui tlângvâlhai, ama kâwla um hlakhai chu a râwn ta lem a.

⁹ An kuoma chun, “Hieng mipuihai, ka kuoma, ‘I pain ka chunga rîngkawl ân nghat hi mi sukzângpêk rawh,’ tia hriltuhai hi ka dawn dân ding rem ieng am in mi ruotpuia le?” a ti a.

¹⁰ Chun, ama ruolpui tlangvâlhai chun a kuomah, “Hieng mipuihai, ‘I pa khan kan rîngkawl a sukrik êm hlak a, nang chun chu mi sukzângpêk raw khai,’ i kuoma tituhai kuoma chun, hieng ang hin ti la, hieng ang hin an kuoma chun hril rawh, ‘Ka pa kâwng nêk chun ka kutte khawm hi a lien lem a.

¹¹ Ka pa khan rîngkawl riktak a lo inbâttir cheu a, kei chun in rîngkawl chu ka belsa ding a nih, ka pa chun vuoknain a lo hrâwk hlak cheu a, kei ruok chun chu ainuvêtin ka hrâwk ding cheu a nih,’ tiin,” an hril a.

¹² Chuongchun, Jeroboam le mipuihai po po chu lalin, ni thum chinah ka kuomah hung nâwk ro tia a hril ang khan a ni thum ni chun Rehoboam kuoma chun an va fe a.

¹³ Chun, lal chun mipuihai chu inrumtakin a lo dawn a, upahai remruotpui kha a pawm naw a,

¹⁴ tlangvâlhai remruotpui ang khan, “Ka pa chun in rîngkawl a lo sukrik a, kei chun chu in rîngkawl chu ka belsa ding a nih, ka pa chun vuoknain a lo hrâwk hlak cheu a, kei chun chu ainuvêtin ka hrâwk lem ding cheu a nih,” a ta.

¹⁵ Chuongchun, lal chun, mipuihai thuhril kha a pawm ta naw a, chu chu Lalpa lei a nih, Lalpa chun Silo mi Ahija hmanga, Nebat naupa Jeroboam kuoma a thu lo hril ta kha a suknghet theina dingin.

¹⁶ Chun, Israelhai po po chun lalin an thuhril a pawm nawh ti an hrietin, mipuihai chun, “David a hin chanvo ieng am ei nei leh? Jesai naupaa hin rohluo ding ei nei chuong bawk nawh: Aw Israelhai, in puon in tieng fe vawng ro, David, i sûngkuo chu ngaituo el rawh,” tiin lal chu an dawn a. Chuongchun, Israelhai chu an puon in tieng chun an fe ta a.

¹⁷ Israel thla Juda ram khuoa umhai chunga ruok chun Rehoboam chun ro a rêl a.

¹⁸ Chuongchun, lal Rehoboam chun sinthawa sawr luihai hotu Adoniram chu a tir a, ama chu Israelhai po po chun lungin an lo dêng a, a thi ta a. Chun, lal Rehoboam chu Jerusalem khuoa tlân hmang tumin a taw lailîra chun a chuong kai vat ta a.

¹⁹ Chuongchun, Israelhai chu David sûnghai chunga chun an hung hel tah a nih, tu chen el hin.

²⁰ Chun, Israelhai po po chun Jeroboam chu a hung kîr nâwk ti an hrietin, pungkhâwmnaa hung dingin an inkotir a, Israelhai po po chunga lalah an siem ta a; Juda hnam ti chau naw chu David sûnghai zui tukhawm an um nawh.

²¹ Chun, Rehoboam chun Jerusalem khuo a hang tlung chun, Israel sûnghai chu doa Solomon naupa Rehoboam ram la nâwk dingin Juda sûnghai po po le Benjamin hnam mi huoisen ruok thlang suok, nuoi khat le sîng riet zet ân khâwm a.

²² Nisienlakhawm, Pathien mi Semaia kuomah Pathien thu a hung tlung a,

²³ “Judai ram lal Solomon naupa Rehoboam le Juda le Benjamin sûnghai po po kuoma le mipui danghai kuoma chun,

²⁴ ‘Lalpain hieng ang hin a tih, Hang fe naw rawh, Israel thla in unauhai chu hang do bawk naw ro, mâni in tieng seng fe nâwk ta ro, hi hi keima thaw a nih,’ tiin hril rawh,” tiin. Chuongchun, Lalpa thu chu an awi a, Lalpa thu ang chun an kîr a, an fe nâwk ta vawng a.

Jeroboamin Israel a ṭhuoi suol

²⁵ Chuongchun, Jeroboam chun Ephraim tlâng rama chun Sekem khuo a siem a, chutaka chun a um a, chun, chutaka inthawk chun a suok a, Penuel khuo a siem a.

²⁶ Chun, Jeroboam chun a lungrilin, “Ram hi David sûnghai ta hi a hung ni nâwk el âwm ie,

²⁷ hienghairawi hi Jerusalem khuoa Lalpa ina inthâwinahai inhlân dinga an hang fe chun hienghai lungril hi an lalpa Rehoboam, Juda ram lal tieng hin thle nâwk el a ta, chuongchun, kei hi mi that an ta, Juda ram lal Rehoboam tieng an kawp nâwk el âwm ie,” a ta.

²⁸ Chuongchun, lal chun mi a râwn a, rângkachak bâwngte lim, pahni a siem a, an kuoma chun, “In ta dingin Jerusalem khuoa hang fe chu ân tak talaw êm a, aw Israelhai, en ta u; Aigupta rama inthawka ṭhuoi suoktu cheu in pathienhai hi,” a ta.

²⁹ Chun, pakhat chu Bethelah a sie a, pakhat chu Danah a sie bawk a.

³⁰ Chu thil chu suol a hung ni ta a nih, mipuihai chu an pahnia be ding chun Dan chen rauin an va fe hlak si a.

³¹ Chun, bâwlhmun inhai a bâwl a, Levi nauhai ni lo, vântlâng laia mihai thiempuah a siem a.

³² Chun, Jeroboam chun Juda rama ruoiṭhe an nei hlak ang bawkin thla rietna, chu thla ni sâwm le ni nga ni chu ruoiṭhe niah a ruot ve a, maichâma chun an hang fe a, Bethela chun a bâwngte lim siem kâwla inthâwiin chuong ang chun an thaw a nih; chun, a siem bâwlhmun thiempuhai chu Bethela chun a sie a.

³³ Chun, amain a dit anga a ruot thla ngei, thla rietna, ni sâwm le ni nga nia chun Bethela a maichâm siema chun a hang fe a, chun, Israel mipuihai ta dingin ruoiṭhe ni a ruot a, maichâma riminhnik raw dingin a hang fe a.