1 LALHAI 10 - Pathien Lekhabu Inthieng (BSI)

Seba lalnuin Solomon a sir thu

¹ Chun, Lalpa hming dinga a thilthaw chungchâng thua Solomon hming inthangzie chu Seba lalnuin a lo hriet chun thu khirtak taka fie tumin a kuomah a fe a.

² Chun, Jerusalem khuoah, hnung zuitu tamtak ṭhuoiin, thil rim inhnik le rângkachak tamtak le lunghluhai phur sanghâwngseihai ṭhuoiin a fe a; chun, Solomon kuom a tlung chun a lungrila a thu pai po po chu phawr fai rêtin ama a biek a.

³ Chun, Solomon chun a thu indawnhai po po chu a dawn fai vawng a, lal ihriet naw, a hrilfie thei naw hrim a um dêr naw a.

⁴ Chun, Seba lalnuin Solomon varzie po pohai, a in bâwl dâm,

⁵ a dawkâna fâk ding dâm, a upahai ṭhung dân dâm, a rawngbâwltuhai chângvêl dân dâm, an inchei dân dâm, a no inhlântuhai dâm, Lalpa ina ân hlân pumrawhmang thilinhlâna ân hlânhai a hei hmu chun lungril alêm a nei ta naw a.

⁶ Chuongchun, lal kuoma chun, “I thilthawhai le i varzie hai, keia rama inthawka ka lo hriethai kha thuthang indik tak a lo ni ngei hi tie.

⁷ Nisienlakhawm, keiin ka mit ngeia ka hung hmu hmakhat chun an hril chu ka lo awi naw a, chuongchun, ngai ta, a zâtve khawm an mi lo hril naw a nih, an hril ka lo hriet nêkin i varzie le i ṭhatzie a lo nasa hle lem a ni hi.

⁸ I mihai, hieng i siehlaw, i bula um rawpa i varna thu ngai zing zing hlakhai hi an va hamṭha de aw!

⁹ Lalpa i Pathien, i chunga lâwm êm êm, Israelhai lalṭhungphaa inṭhungtirtu che hi inpâkin um raw se; Lalpain kumkhuoin Israelhai hi a hmangai a, chuleiin, feltaka ro rêl dingin lalah a siem che a ni hi,” a ta.

¹⁰ Chun, lal chu rângkachak talent za le sâwmhni le thil riminhnik tamtak el le, lunghluhai a pêk a, Seba lalnuin Solomon thil riminhnik a pêk ang zozaia tam hi a lût ta ngai naw a.

¹¹ Chun, Hiram lawngruol, Ophira inthawka rângkachak va phurtuhai khawm chun Ophira inthawk chun almug thing tamtak le lunghluhai an hung phur a.

¹² Chun, lal chun almug thinghai chu Lalpa in le lal in inhuonna dingin le hlasaktuhai ta dinga ṭingṭang le perkhuonghai siemna ding chenin a hmang a; tu chen hin chuong ang almug thing hrim hrim chu a lûtin hmu khawm hmu a ni ta ngai nawh.

¹³ Chun, a hni sa naw Solomonin a pêk tihai naw khawm chu lal Solomon chun Seba lalnu chu a dit taphawt, a hni taphawthai chu a pêk a. Chuongchun, a rawihai leh a umna ram tieng chun a fe nâwk ta a.

Solomon a hausakna le a hminginthangna

¹⁴ Solomon kuoma kum khat sûnga rângkachak lût rikzie chu, rângkachak talent za ruk sâwmruk paruk a nih;

¹⁵ sumdâwngtuhaia inthawka siechawi lâklût le, thil zawrtuhai sukhlâwk, Arab lalhai sie-chawi po po le ram awptuhaia inthawka lût tiem lovin.

¹⁶ Chun, lal Solomon chun rângkachak sut phêkin phaw lien za hni a siem a, phaw pakhat chun shekel za ruk a dit a nih.

¹⁷ Chun, rângkachak sut phêkin phaw dang za thum a siem a, phaw pakhat chun rângkachak maneh thum pei a ngai a; chuonghai chu lal chun Lebanon rampui ina chun a sie a.

¹⁸ Chun, lal chun saiha lalṭhungpha ropuitak a siem bawk a, chu chu rângkachak ṭha chi takin ân luon a.

¹⁹ Lalṭhungpha hang lâwnnaa chun kalbi paruk a um a, chu lalṭhungpha hnungtieng chun a hung inkûm a, a ṭhungna sîrtuoka chun a dona a um ve ve a, chun a dona bulhaia chun sakeibaknei pahni an ngîr a.

²⁰ Chun, kalbi paruka chun a sîrtuokah sakeibaknei sâwm le pahni an ngîr a, chuong ang chu khâwlai rama khawm an siem ngai hrim hrim naw a.

²¹ Chun, lal Solomon nohai po po chu rângkachak vawng an na, chun, Lebanon Rampui Ina bûr le bêlhai po po khawm chu rângkachak hlîr hlak vawng an nih; tangkaruo hrim hrim a ṭhang nawh, Solomon dam lai chun, chu chu ieng hûa khawm an ngai nawh.

²² Lal chun tuipuia chun Hiram lawng ruol inkawppuitu ding Tarsis lawng ruol a nei a, Tarsis lawng ruol chun kum thum dan peiah rângkachak dâm, tangkaruo dâm, saiha dâm, zâwng dâm, ârâwnhai dâm, a hung phur hlak a.

²³ Chuongchun, lal Solomon chun khawvêla lal po po chu hausaka le vara chun a khûm vawng a nih.

²⁴ Pathienin a lungrila varna thu a siepêk chu ngai dingin khawvêla mi po pohai chun Solomon chu an hung pan huoi huoi hlak a.

²⁵ Mi tinin lâwmman kum tina pêk bi neiin tangkaraw bûr le bêlhai, rângkachak bûr le bêlhai, puonhai dâm, râlthuomhai dâm, thil riminhnikhai dâm, sakawrhai dâm, sabengtung lien chi hai dâm an hung pêk hlak a.

Sakawr le tawlailîra Solomon a sumdâwng thu

²⁶ Chun, Solomon chun tawlailîrhai le sakawr chung chuong mihai a ko khâwm ṭeu a, tawlailîr sâng khat le za li le sakawr chung chuong mi sîng khat le sâng hni a nei a, chuonghai chu tawlailîr siena khuohaia, Jerusalem khuoa lal umnaa dâm chun ân umtir a.

²⁷ Chun, lal chun Jerusalem khuoa chun a tam êm leiin tangkaruohai chu lung ang ela ngai khawpin ân umtir a, Sidar thinghai dâm chu phaia theichang thing ang ela ngai khawpin ân umtir a.

²⁸ Chun, Solomon inei sakawrhai chu Aigupta rama inthawka hung tawl suok an na, chun, lal sumdâwngtuhai chun aruol ruolin an lo khâr hlak a, aruola inchâwk pei an nih.

²⁹ Aigupta rama inthawka tawlailîr chu tangkaruo shekel za ruk peiin an suktlung hlak a, chun, sakawr chu tangkaruo shekel za le sâwmnga peiin; chuong ang bawk chun Hit mihai lalhai po po le Suria lalhai khawm an suktlung pêk hlak a nih.