1 KORINTH 2 - Pathien Lekhabu Inthieng (BSI)

Hemde tah Krista chanchin puongna

¹ Chun, kei chu unauhai, Pathien thurûk hril cheuva in kuoma ka hung lai khan ka thu hril ropui le varna ropui le hung ka ni naw a,

² Isu Krista ama ngei hemdea a um thu chau naw chu nangni lai ieng dang khawm hriet ka tum nawh kha.

³ Chun, hrâtnaw le ṭiin, nasataka inthin pumin in kuomah ka um a.

⁴ Ka ṭawngbau suok le ka thu hrilhai chu thu vara thlêmna thu a ni naw a, Thlarau le thilthawtheina inhriettirin a ni lem kha;

⁵ in ringna chu mihriem varnaa innghat lova, Pathien thilthawtheinaa innghata a um lemna dingin.

Pathien Thlarau inhriettirna

⁶ Amiruokchu, puitlinghai lai chu thu var kan hril hlak; nisienlakhawm, hi khawvêl thu var chu a ni nawh, hi khawvêl rorêltu bohmang dinghai thu var chu a ni bawk nawh;

⁷ Pathien thu var thurûk chu kan hril lem hlak a nih, thu var inthup, ei ropuina dinga Pathienin khawvêl um hmaa a ruot lâwk ta chu.

⁸ Chu chu hi khawvêl rorêltuhai hrim hrimin an hriet nawh, hre hai sien chu ropuina Lalpa chu hemde naw ni hai.

⁹ “Mita hmu ngai naw le naa hriet ngai naw, Mihriem lungrila lût ngai naw, Pathienin ama hmangaituhai ta dinga A buotsai taphawt chu,” ti ziek ang lem khan.

¹⁰ Keini ruok chu chuong chu Pathienin Thlarauin a mîn hriettir tah a nih; Thlarau chun iengkim a suisuok hlak si a; anih, Pathien thu inril khawm.

¹¹ Mihriem thuhai chu mihriem lungril, a sûnga um bawk naw chun tuin am hrieng a ta? Chuong ang bawkin Pathien thuhai chu Pathien Thlarau bawk naw chun tûkhawmin an hriet nawh.

¹² Chuongchun, a thlâwna Pathien thil mi pêkhai chu ei hriet theina dingin, eini chun khawvêl thlarau ni lovin, Thlarau Pathien kuoma inthawk chu ei hmu lem a nih.

¹³ Mihriem varna inchûktir thua hril lovin, Thlarau inchûktir thua hril lemin Thlarau tieng thuhai chu thlarau tieng mihai kuoma hrilfiein, chuong thil a mi pêkhai thu khawm chu kan hril hlak.

¹⁴ Khawvêl mi chun Pathien Thlarau thil chu a lâwm ngai nawh, ama ngaia chun invêtthlâk a ni si a; Thlaraua hriet chieng a ni leiin a hriet thei naw hrim a nih.

¹⁵ Thlarau mi ruok chun thil iengkim a hriet chieng hlak, ama hlak chu tûkhawmin an hriet chieng si nawh.

¹⁶ Tûin am Lalpa lungril hre taa ama inchûktir thei ding? Eini ruok chun Krista lungril ei put a nih.