1 KORINTH 14 - Pathien Lekhabu Inthieng (BSI)

Ṭawng hrietlo le thuhriltheina thilpêk

¹ Hmangaina hi hnawt pei unla, Thlarau tieng thilpêk chu châk hle ro; amiruokchu, thu in hril theina ding lem chun châk bîk ro.

² Ṭawng hrietlova thuhril chun mihriem kâwla hril ni lovin, Pathien kuomah a hril lem a ni si a; tûkhawmin a thuhril chu an hriet si naw a; nisienlakhawm, thlarau chun thurûk a hril a nih.

³ Thuhriltu ruok chun mihriem kuomah siem ṭhatna thu dâm, infuina thu dâm, thlamuongna thu dâm a hril lem hlak.

⁴ Ṭawng hrietlova thu hril chun ama chau ân siem ṭha hlak. Thuhriltu ruok chun kohran a siem ṭha hlak.

⁵ Chun, in rênga ṭawng hrietlohaia thu in hril ka nuompui cheu; nisienlakhawm, thu in hril ka nuompui nâwk zuol cheu a nih; kohranin insiemṭhatna an hmu theina dingin a hrilfie nâwk nghâl naw chun, thu hriltu chu ṭawng hrietlova thu hriltu nêk chun a ropui lem hrim hrim a nih.

⁶ Tuhin, unauhai, ṭawng hrietlohaia thu hrilin in kuomah hung ta ang lang, inhriettirna tieng amanih, hrietna tieng amanih, thu hrilna tieng amanih, inchûktirna tieng amanih in kuomah ka hril si naw chun ieng am ka sukṭhathnemna ding cheu a um a?

⁷ Thil hringna neilo, inri theihai khawm theihle amanih, ṭingṭang amanih, a mumal neia ân ri naw chun, ieng hla inzuiin am an keia ti iengtin am inhriet thei a ti leh?

⁸ Tawtawrâwt hi mumal nei lova ân ri chun tu am râl kâp dingin inbuotsai an ta?

⁹ Chuong ang bawkin nangni khawm lei hin ṭawng hriet awla in hril naw chun ieng ang thu am in hril a, ti iengtin am inhriet thei a ta? Boruoka ṭawng mei mei nîng in tih in sawnnaw.

¹⁰ Khawvêla hin ṭawng ri chi tum tamtak a um a ni thei a; nisienlakhawm, umzie nei naw hrim hrim a um si naw a.

¹¹ A ṭawng ri umzie ruok chu ka hriet naw chun, kei chu a hriltu ta ding chun ram dang mi nîng ka ta; a hriltu khawm chu ka ta dingin ram dang mi ni bawk a tih.

¹² Chuongchun, nangni khawmin, thlarau thilpêk chungah ṭhahnem in ngai leiin kohran siemṭhat theina dinga in hausak theina dingin zawng ro.

¹³ Chuleiin, ṭawng hrietlova thu hril chun, a hrilfie theina dingin ṭawngṭai raw se.

¹⁴ Ṭawng hrietlova ka ṭawngṭai chun ka thlarau chun chu a ṭawngṭai ngei a, ka hrietna ruok chu a hlâwk chuong nawh.

¹⁵ Iengtin am ni tâng a ti leh? Thlarauin, ṭawngṭai ka ta, hriettheina khawmin ṭawngṭai bawk ka tih; thlarauin hla sak ka ta, hriettheina khawmin sak bawk ka tih.

¹⁶ Chuong naw chun, thlarauin mal sâwmpêk la khawm, a hrenawhai umnaa um chun i lâwmthu hrila chun iengtin am “Amen” ti thei a ta, i thu hril chu hre thei si lovin?

¹⁷ Nang chun chu lâwmthu i hril ṭha takzet a, mi dang ruok chu a siemṭha chuong si nawh.

¹⁸ Nangni po po nêka ṭawng hrietlova thu ka hril rawn lem leiin, Pathien kuomah lâwmthu ka hril a;

¹⁹ nisienlakhawm, kohran inkhâwmnaa chun, ṭawng hrietlova thu sîng khat hril nêk chun, mi danghai kân chûktir theina dingin ka hriettheinaa thu panga chau hril ka nuom lem.

²⁰ Unauhai, lungril tieng naupang naw ro; nisienlakhawm, suol kawnga chu nautê ang ni unla, lungril tienga chun puitling ro.

²¹ Dân Lekhabua chun, “ ‘ṭawng dang mihai bau le, ram dang mihai hmûrin, hieng mihai kuoma hin thu hril ka ta; chuong sa khawm chun mi ngainaw ni hai,’ Lalpain a tih,” ti ziek a nih.

²² Chuleiin, ṭawng hrietlohai hi awihai ta ding chun inchikna a ni naw a, awinawhai ta ding a ni lem; thu hril ruok hi chu, awinawhai ta dingin inchikna a ni naw a, awihai ta dingin a ni lem.

²³ Chuleiin, kohran po po inkhâwm unla, in rênga ṭawng hrietlohaia thu in hril chun a la hrenawhai amanih, awinawhai amani hung lût hai sienla, invêt an ti naw ding cheu am a nih?

²⁴ In rêngin thu inhril ruok chun, awinaw amanih, la hrelo amanih hung lût sien la, a thiemnawzie in rêngin suklang ni a ta; in rêngin in suosal nîng a tih;

²⁵ a lungril thurûk chu phawr nîng a ta, chuongchun, bawkkhupin Pathien chibai bûk a ta, Pathien nangni lai a um takzet ti hril a tih.

Pathien bieknaa thil feltak le mawi taka thaw a ṭûlzie

²⁶ Unauhai, iengtin am ni tâng a ta? In hung inkhâwmin inpâkna hla amanih, thu inchûktirna amanih, inhriettirna amanih, ṭawng hrietlo amanih, hrilfiena amanih in nei seng hlak. Iengkim siem ṭhatna dingin thaw ni raw se.

²⁷ Tukhawmin ṭawng hrietlova thu an hril chun, pahniin amanih, a tamtakah pathumin amanih ni sienla, insâwk peiin ni bawk raw se; chun, mi pakhatin hrilfie raw se.

²⁸ Hrilfietu an um naw chun, kohran inkhâwmnaa chun to zingin um hai sienla, mâni le Pathien kuomah hril raw se.

²⁹ Thuhriltuhai khawmin, pahniin amanih, pathumin amanih, hril sienla, mi danghai chun nguntakin ngaituo raw hai se.

³⁰ Amiruokchu, a kâwla ṭhung mi dang kuomah inhriettirna thu pêkin a hung um chun, a hmasa chu to el raw se.

³¹ Mi po poin an inchûk theina ding le, mi po po lungmuonga an um theina dingin pakhat peiin thu in hril thei si a.

³² Thuhriltuhai thlarauhai chu thuhriltuhai thununin an um a nih.

³³ Pathien chu buoina Pathien a ni naw a, inremna Pathien a ni lem si a. Mi inthieng kohranhai po poa ang hin,

³⁴ kohran inkhâwmnahaia chun nuhmeihai chu to zingin um raw hai se; anni chu an thu hril phal a ni si naw a; Dân Lekhabuin a hril ang bawk khan thu zâwmin um lem raw hai se.

³⁵ Chun, iengkhawm inchûk an nuom chun, in tieng an pasalhai indawn raw hai se; kohran inkhâwmnaa nuhmei thu hril inzak a um si a.

³⁶ Pathien thu hi nangnia inthawka suok a ni maw? Annawleh, nangni kuom chaua hung tlung a ni maw?

³⁷ Tûkhawm thu hriltu amanih, thlarau mi amanih nia ân ngai chun in kuoma thu ka ziek hi Lalpa thupêk a ni ti lo hre raw se.

³⁸ Nisienlakhawm, tûkhawmin hi hi a hriet nuom naw chun ama chu hriet lovin um raw se.

³⁹ Chuleiin, ka unauhai, thu hril hi inhâwk hle unla, ṭawng hrietlohaia thu hril khawm khap naw ro;

⁴⁰ nisienlakhawm, iengkim mawitak le feltaka thaw ni raw se.