1 KORINTH 12 - Pathien Lekhabu Inthieng (BSI)

¹ Chun, unauhai, thlarau tieng thilpêk thuhai chu in hriet naw ka nuom nawh.

² Awinawhai in ni lai khan, ieng ang khawma an ṭhuoi ang pei cheu khan, khâng milim rawl neilo tienga khan ṭhuoihmangin in um ti in hriet a.

³ Chuleiin, tûkhawmin Pathien thlaraua thu hrilin, “Isu chu ṭawngsephur a nih,” an ti ngai nawh; chun, tûkhawmin Thlarau Inthienga chau naw chun, “Isu chu Lalpa a nih,” an ti thei ngai nawh ti kân hriettir cheu.

⁴ Chun, thilpêk chu a tum tum a um a, Thlarau chu hmunkhat a nih.

⁵ Rawngbâwl dân tum tum khawm a um a; nisienlakhawm, Lalpa chu hmunkhat a nih.

⁶ Sinthaw dân tum tum khawm a um a, Pathien ruok chu hmunkhat a nih, mi po poa iengkim thawtu chu.

⁷ Chun, ṭhathnempui tlâng seng dingin Thlarau inhriettirna chu mi tin kuomah pêk seng a nih.

⁸ Mi pakhat kuomah Thlaraua chun varna thu pêk a nih; mi dang kuomah chu Thlarau thu ma chun hrietna pêk a nih;

⁹ chun, mi dang kuomah chu Thlaraua bawk chun, ringna pêk a nih; mi dang kuomah Thlarau thuhmuna chun sukdam theina pêk a nih;

¹⁰ mi dang kuomah thilmak thawtheina pêk a nih; mi dang kuomah thuhril theina pêk a nih; mi dang kuomah thlarauhai hriet dik theina pêk a nih; chun, mi dang kuomah ṭawng hrietlo chi dang danghaia thuhril theina pêk a nih; mi dang kuomah ṭawng hrietlohai hrilfie theina pêk a ni si a;

¹¹ nisienlakhawm, chuong po po chu Thlarau thuhmun bawk chun, mi tin kuomah a nuom ang peia semin sin a thaw hlak.

Taksaa inthawka inentirna

¹² Taksa hi pakhat a na, pêng tamtak a nei a, taksa pênghai po po chu tam hai sienkhawm taksa pumkhat an ni si a; Krista chu chuong ang bawk chu a nih.

¹³ Ei rêngin, Judahai amanih, Grikhai amanih, suok amanih, suok nilo amanih taksa pumkhata um dingin, Thlarau pakhat chauah baptisin ei um seng si a. Thlarau pakhat chau bawk a mîn dâwntir bawk a.

¹⁴ Taksa hi pêng khat chau a ni si naw a, pêng tamtak a ni lem.

¹⁵ Kepha hin, “Kut ka ni naw leiin taksaa ṭhang ka ni nawh,” ti sienla, chu lei chun taksaa ṭhang naw a ni chuong nawh.

¹⁶ Chun, nakâwr hin, “Mit ka ni naw leiin taksaa ṭhang ka ni nawh” ti sienla, chu lei chun taksaa ṭhang naw a ni chuong nawh.

¹⁷ Taksa pumpui hi mit ni vawng ta sienla, ri hrietna chu khâwlai am ni tâng a ti leh? A pumin ri hrietna ni vawng ta sienla, rim hriet theina chu khâwlai am ni tâng a ti leh?

¹⁸ Nisienlakhawm, Pathienin pêng tin hi taksaah a nuomna poah ân umtir seng tah a nih.

¹⁹ Chuongchun, chuong po po chu pêng khat chau ni sienla, taksa hi khâwlai am um a ta?

²⁰ Amiruokchu, pêng tamtak an ni lem a; nisienlakhawm, taksa pumkhat chau a ni si a.

²¹ Chun, mit hin kut kuomah, “Ienga khawm hmangna ka nei naw che,” a ti thei nawh; lu khawm hin kephahai kuomah, “Ienga khawm hmangna ka nei naw cheu,” a ti thei bawk nawh.

²² Anih, chuong nêk hmanin taksa pêng hrât âwm lova inlanghai hi an pawimaw lem bêk bêk a nih;

²³ chuongchun, taksa pêng chawimawi tlâk naw lema ei ruothai hi, chuong ngei chu ei chawimawi nasa lem hlak; chuongchun, ei pêng mawinawhai hin mawina nasa lem an hmu hlak;

²⁴ ei pêng mawi lemhai ruok chun chuong anga thaw chu an ngai nawh; nisienlakhawm, Pathienin mawina neinaw pêng chu chawimawi nasa lemin taksa hi a rem khâwm a nih;

²⁵ taksaa hin inṭhena hrim um lova, pênghai hin inangtaka an inbuoipui tuo seng theina dingin.

²⁶ Chuongchun, pêng khatin a tuor chun, pêng po poin an tuorpui hlak, pêng khat chawimawia a um chun, pêng po poin an lâwmpui hlak.

²⁷ Chuongchun, nangnirawi hi Krista taksa chu in nih, a pênghai in ni seng bawk a.

²⁸ Chun, Pathienin ṭhenkhat chu kohran lai a sie a, pakhatnaa chun tirkohai, a pahninaa chun thuhriltuhai, a pathumnaa chun inchûktirtuhai a sie a, chu hnunga chun thilmak thawhai an um a, chu zoa chun sukdam theina thilpêkhai, ṭhangpui theina thilpêkhai, rorêl thiemna thilpêkhai, ṭawng hrietlo chi tum tuma thuhril theina thilpêkhai a um nâwk a.

²⁹ An rêngin tirko an ni vawng am a nih? An rêngin thuhriltu an ni vawng am a nih? An rêngin inchûktirtu an ni vawng am a nih? An rêngin thilmak thawtu an ni vawng am a nih?

³⁰ An rêngin sukdam theina thilpêk chu an nei vawng am a nih? An rêngin ṭawng hrietlohaiin an hril vawng am a nih? An rêngin thu an hrilfie vawng am a nih?

³¹ Thilpêka ropuitakhai chu châk hle lem ro. Chun, tuhin kawng ṭha nâwk zuol inentir ka ti cheu.