1 KORINTH 11 - Pathien Lekhabu Inthieng (BSI)

¹ Keiin Krista ka entawn angtak hin, nangni khawmin mi entawn ve ro.

Nuhmei ta dinga lukhum

² Iengkima in mi hriet zing lei le, thurosiehai ka hung hril angtaka in la vawng tlat leiin kân pâk cheu a nih.

³ Nisienlakhawm, pasal taphawt lu chu Krista a na, nuhmei lu chu a pasal a na, chun Krista lu chu Pathien a nih, ti in hrietchieng ka nuom a nih.

⁴ Pasal tukhawm, lukhum khum puma ṭawngṭai amani, thuhril amani phawt chun, ama lu chu a sukmuolpho a nih.

⁵ Amiruokchu, nuhmei tukhawm, lu inkhum lova ṭawngṭai amani, thu a hril amani chun, a lu a sukmuolpho a nih, ama chu a lu mêt kawl leh thuhmun a nih.

⁶ Nuhmei lukhum khum lova a um si chun, vâw kawl law law raw se; nisienlakhawm, nuhmei ta dingin vâw amanih, ziet kawl amanih inzâpui a um si chun lukhum khum raw se.

⁷ Pasal ruok chu Pathien angpui le a ropuina a ni leiin, a lu ân khum ding a ni naw a, nuhmei ruok chu pasal ropuina suklangtu a nih.

⁸ Pasal hi nuhmeia inthawka siem a ni naw a, nuhmei ruok chu pasala inthawka siem a ni lem si a.

⁹ Pasal hi nuhmei ta dinga siem a ni naw a, nuhmei ruok chu pasal ta dinga siem a nih.

¹⁰ Vântirkohai leiin, nuhmei chu a pasal thuhnuoia um a nih ti inchikna dingin a lu ân khum ding a nih.

¹¹ Nisienlakhawm, Lalpaa chun nuhmei hi pasal ṭhang lovin a um thei naw a, pasal khawm nuhmei ṭhang lovin a um thei bawk nawh.

¹² Nuhmei hi pasala inthawka siem a ni ang bawk hin, pasal khawm chu nuhmeia inthawka pieng a ni si a; nisienlakhawm, thil po po hi Pathiena inthawka suok vawng an nih.

¹³ Nangni ngeiin ngaituo hman ro: Nuhmeiin a lu inkhum lova Pathien kuoma a ṭawngṭai hi a mawi am a ni?

¹⁴ Pasalin sam sei a put chun, a ta dingin thil inzakum a nih ti in piengpui lungril khawmin ân hriettir naw cheu am a ni?

¹⁵ Nuhmei ruok chun sam sei a nei chun a ta dinga ropuina a ni lem; a sam chu inkhumna dinga pêk a ni si a.

¹⁶ Tukhawmin, hi thu hi a lo sêl a ni khawmin, chuong ang bâk chu dân dang hrim ei nei nawh; Pathien kohranhai khawma an nei bawk nawh.

Lalpa Zânbu

¹⁷ Amiruokchu, hieng thu ka ihrilhai cheua hin kân pâk thei naw cheu a nih, in inkhâwm pha ṭhatpui nêkin in sietpui lem hlak leiin.

¹⁸ A hmasatakin, kohran anga in inkhâwm chângin nangni lai inṭhena a um hlak ti thu ka lo hriet si a; iemani chenah ka ring deu bawk a nih.

¹⁹ Nangni laia a taktakhai chu an inlang theina dingin nangni lai awi dân tum khawm a um ding hrim a nih.

²⁰ In inkhâwma in fâk hlak hi, Lalpa zânbu a ni naw tawp el.

²¹ Fâk hun a tlung pha leh, mi tinin mani bu seng in lo fâk el hlak si a, chuongchun pakhat phîngṭâmin a um a, pakhat ân rui hlak.

²² Iengtizie am a na? Fâk le dâwnna dingin in in nei seng an naw am a ni? Annawleh, Pathien kohran hmusitin, iengkhawm nei nawhai chu in sukzak el hlak am a ni? In kuomah ieng am hril tâng ka ta? Kân pâk ding cheu am a ni? Hi kawnga hin chun kân pâk thei naw cheu.

Lalpa Zânbu buotsai dân

²³ Ka thu hril sâwng cheu kha Lalpa kuoma inthawka ka dawng a na; khânga inmantira a um zân khan, Lalpa Isûn, bei a lâk a,

²⁴ lâwmthu a hril zovin, a khawi a, “Hi hi ka taksa, in ta ding chu a nih. In mi hriet zingna dingin hi hi thaw hlak ro,” a ti kha.

²⁵ Chuong ang bawkin, zânbu fâk zovin, no khawm chu a lâk a, “Hi hi ka thisena Thuthlung Thar chu a nih. In dâwn povin in mi hriet zingna dingin thaw hlak ro,” a ti kha.

²⁶ Chu bei chu in fâk a, no chu in dâwn zâtin, Lalpa hung nâwk hmakhat a thina chu in puong hlak a ni si a.

Tlâklo taka Lalpa Zânbu fâk

²⁷ Chuleiin, tukhawm tlâklo puma bei chu faa, Lalpa no chu dâwn taphawt chun, Lalpa taksa le thisen chungah suol maw phur a tih.

²⁸ Mi tin mani infie seng sienla, chuong ang chun bei chu fain no chu dâwn raw se.

²⁹ A fatu le a dâwntu chun, Lalpa taksa chîktaka a ngaituo si naw chun, ama chunga rorêlna intlun dingin a fâkin a dâwn a ni si a.

³⁰ Hi lei hin nangni laia tamtak chu, in hrâtnawin in hrivawi a sie a nih, ṭhenkhat chu in thi ta a.

³¹ Amiruokchu, chîktakin inngaituo hlak unla chu, ro rêlpêkin ei um naw ding bah.

³² Rorêlpêka ei um khawmin, khawvêl mihai anga thiemnaw changa ei um nawna dingin Lalpa thununin ei um hlak a nih.

³³ Chuleiin, ka unauhai, fa dinga in inkhâwm pha, innghâk tâwl hlak ro.

³⁴ In inkhâwm chu thiemnaw in chang phana a ni nawna dingin, a phîngṭâm chun inah hung fa zet raw se. Thil danghai chungchâng chu ka hung pha leh la kâwkhmûng ka ti cheu.