1 KORINTH 1 - Pathien Lekhabu Inthieng (BSI)

Chibai bûkna

¹ Paula, Pathien ditzâwnga Isu Krista tirko dinga ko le unaupa Sosthen chun:

² Korintha Pathien kohran umhai, Krista Isua sukthieng, mi inthieng ni dinga kohai kuomah, ram tina ei Lalpa (anni le eini Lalpa) Isu Krista hming lamtuhai po po kuoma leh.

³ Pathien ei Pa le Lalpa Isu Krista kuoma inthawkin lunginsietna le inremna in kuomah um raw se.

Thlarau tieng thilpêk leia lâwmthu hrilna

⁴ Krista Isua Pathien lunginsietna in kuoma pêka um lei khan in chungthuah Pathien kuomah lâwmthu ka hril rawp hlak a nih.

⁵ Iengkimah, thu hril tinrêng le hrietna tinrêngah amaa chun sukhausaa in um thua khan;

⁶ chuongchun, Krista thu inhriettira um kha nangnia sukdetin a um kha;

⁷ chuongchun, ei Lalpa Isu Krista hung inlangna nghâka in um sung hin thlarau tieng thilpêk hrim in tlasam naw a.

⁸ Ama chun ei Lalpa Isu Krista niah sawisêlboa in um theina dingin a tâwp chenin sukdet bawk a ti cheu.

⁹ Pathien a Naupa ei Lalpa Isu Krista pâwlnaa ko lûttu cheu kha ring a um a nih.

Kohran laia inṭhena

¹⁰ Chun, unauhai, in rênga thu hmunkhat in hril a, nangni lai inṭhena hrim a um nawna dingin, lungril hmunkhat le ngaituo hmunkhata feltaka in inzawm tlat lemna dingin ei Lalpa Isu Krista hmingin ka ngên cheu.

¹¹ Ka unauhai, in chungchâng thu chu, nangni lai insêlnahai a um ti Kloi sûnghai chun an mi hril a nih.

¹² Hi hi a nih ka ti chu: Mi tinin, “Kei Paula pâwl ka nih,” “Kei Appolo pâwl ka nih,” “Kei chu Kipha pâwl ka nih,” “Kei chu Krista pâwl ka nih,” in ti tâwl hi.

¹³ Krista chu ṭhein a um am a nih? Paula in aia hemdein a um am a nih? Annawleh, Paula hminga baptisin in um am a nih?

¹⁴ Krispa le Gaia naw chu nangni lai tûkhawm ka baptis naw leiin Pathien kuomah lâwmthu ka hril hlak a nih,

¹⁵ chuong naw chun, keima hminga baptis in nih ti hril rawi an tih.

¹⁶ Stephan sûnghai ruok chu ka baptis bawk a, chuonghai naw chu mi dang ka baptis am ka hriet nawh.

¹⁷ Krista chun baptis dingin a mi tir si nawh, Chanchin Ṭha chu hril dingin a mi tir lem a nih; thu vara hril lovin; chuong naw chun, Krista kraws chu iengkhawm ni lovin inchangtir rawi an tih.

Krista, Pathien thilthawtheina le varna

¹⁸ Kraws thu chu bohmang zinghai ta ding chun invêtna a ni si a, eini sandam zinghai ta ding ruok chun Pathien thilthawtheina a ni lem.

¹⁹ “Mi var varna chu sukbohmang ka ta, Remhre remhrietna chu peithlâng ka tih,” ti ziek a ni si a.

²⁰ Mi var chu khâwlai am a um a? Dân hre mi khawm chu khâwlai am a um a? Hi khawvêla sêltu chu khâwlai am a um a? Pathienin khawvêl varna hi invêtthlâk a nih ti ân hriettir naw am a nih?

²¹ Pathien varnaa chun khawvêlin varna hmanga Pathien an hmu thei naw hnungin thu hril invêt hmanga a ringtuhai sandam chu Pathienin ṭha a ti hle si a.

²² Judahai chun inchikna an phût hlak, Grik mihai khawma varna an zawng bawk hlak;

²³ keini ruok chun Krista hemdea um thu chu kan hril lem hlak a ni hi; chu chu Judahai ta dingin tlûkna, Jentailhai ta dingin invêtna a nih.

²⁴ Amiruokchu, Judahai khawm ni sienla, Grikhai khawm ni sienla, kohai ta ding chun Krista Pathien thilthawtheina le Pathien varna chu a nih.

²⁵ Pathien invêtna chu mihriem varna nêkin a var lem a, Pathien hrâtnawna khawm mihriem hrâtna nêkin a hrât lem si a.

²⁶ Unauhai, a kona cheu hi ngaituo ta u, taksa tienga mi var tamtakhai, mi hrât tamtakhai, mi ṭha tamtakhai ko an ni naw zie hi;

²⁷ nisienlakhawm, Pathienin khawvêl thil invêthai chu a thlang lem a, mi varhai chu a sukmuolpho theina dingin;

²⁸ chun, khawvêl thil sie le hmusitumhai, thil umnawhai chenin a thlang a, thil umsahai chu iengkhawm ni lova a siem theina dingin;

²⁹ chuongchun, Pathien hmaah mi tûkhawm insuong thei naw ni hai.

³⁰ Nangni ruok chu ama zârah, Krista Isua chun in um a nih; ama chu Pathien kuoma inthawka ei ta dinga varnaa siem a nih, felnaa dâm, inthiengnaa dâm, intlannaa dâm leh.

³¹ Chuongchun, an ziek ang khan, “A suong taphawt chun Lalpa chu suong raw seh.”