1 JOHAN 3 - Pathien Lekhabu Inthieng (BSI)

Pathien nauhai

¹ Ngai ta u, Pain a mi hmangaina chu a va nasa de! “Pathien nauahai,” a mîn bûk ta chu; chuong ang chu ei ni hrim a nih. Hi hi lei hin khawvêlin a mi hriet naw a nih, ama chu an hriet naw leiin.

² Dittakhai, tuhin Pathien nauhai ei na, iengtin am ei um ding ti chu a lân lang hri naw a; ama a hung inlang pha chun ama angin ei um ding a nih ti chu ei hriet, ama chu a um pângngai angtakin ei hmu ding a ni si a.

³ Tûkhawm ama chunga chu beiseina nei taphawt chu ama ân thieng angin ân sukthieng hlak.

⁴ Tûkhawm thil suksuol taphawt chun dân khawm a bawsiet a nih; suol hi dân bawsietna a ni si a.

⁵ Ama chu suolhai la hmang dingin a hung inlang tah ti in hriet; amaa chun suol iengkhawm a um si naw a.

⁶ Tûkhawm amaa um zing chun thil a suksuol nawh; tûkhawm thil suksuol chun ama chu a hmu naw a, hriet khawm a hriet bawk nawh.

⁷ Nauhai, tû ihlêm khawmin um naw ro; felna thawtu chu a fel a nih, ama a fel ang bawkin.

⁸ Thil suksuoltu chu Diebola suok a nih; Diebol chun a tîra inthawkin thil a suksuol si a, Pathien Naupa hung inlang san tak chu Diebol sinthawhai a sukbohmang theina dingin a nih.

⁹ Tûkhawm Pathien inei chun, Pathien chi amaa a um leiin suol a thaw zawm zing ngai nawh, Pathien inei a ni lein suol a thaw zawm zing thei bawk nawh.

¹⁰ Hitaka hin Pathien nauhai le Diebol nauhai ân hriet a nih; tûkhawm felna thaw naw chu Pathiena inthawka suok a ni naw a, a unau hmangai naw khawm chu Pathiena inthawka suok a ni bawk nawh.

Inhmangaituo seng ding

¹¹ Hi hi a tira inthawka thuincha in ihriet kha a ni si a, ei inhmangaituo seng ding a nih, ti hi;

¹² Kaina mi suol laia mi, mani unau thattu ang khan um lovin. Iengleiin am a that a? Ama thilthawhai a suol a, a unau thilthawhai a fel leiin.

¹³ Unauhai, khawvêlin an theida cheu chun mak ti naw ro.

¹⁴ Unauhai ei hmangai leiin thinaa inthawkin ei suok a, hringnaah ei lût tah ti ei hriet. Tûkhawm hmangaina nei naw taphawt chu thinaah a la um zing a nih.

¹⁵ Tûkhawm a unau theida chu tuolthat a nih; tuolthattu tûkhawm chatuona hringna nei zing hrim an um nawh ti in hriet si a.

¹⁶ Hitaka hin hmangaina chu ieng am a ni ei hriet, ama chun ei ta dingin a hringna a pêk ta leiin, eini khawmin unauhai ta dingin ei hringna ei pêk ve ding a nih.

¹⁷ Nisienlakhawm, tûkhawm, khawvêl sum neiin, a unau tlasamin hmu sienla, ama chu lainat si naw sienla, Pathien hmangaina chu amaah iengtin am um a ti leh?

¹⁸ Nauhai, thu chauin inhmangai nâwm ei niu, lei chauin inhmangai naw bawk ei tiu; thilthaw le titakzetin ni lem raw se.

Pathien ring detna

¹⁹ Chutaka chun thutaka inthawk ei nih ti inhrieng ei ta, ama mithmu ngeiah ei lungril chu thlêm tlai bawk ei tih,

²⁰ ei lungrilin thiemnaw a mîn changtirna kawnga chun, Pathien chu ei lungril nêkin a ropui lem a, iengkim a hriet si a.

²¹ Dittakhai, ei lungrilin thiemnaw a mîn changtir naw chun, Pathien tieng ei huoi a nih,

²² chuongchun, a thupêkhai ei zâwm a, a mithmuah thil lâwmum ei thaw hlak leiin, ei hni taphawt a kuoma inthawkin ei hmu pei hlak a nih.

²³ A thupêk chu hi a nih, a Naupa Isu Krista hming awi inla, amain thu a mi pêk angin inhmangai tuo bawk inla.

²⁴ A thupêkhai zâwm chu amaah a um zing a, ama khawm chu amaah a um zing bawk a nih. Chun, hitaka hin ama chu einiah a um zing ti ei hriet, Thlarau a mi pêka hin.