ZEKARIA 2 - Pathien Lekhabu Inthieng (BSI)

Zâwlneiin inlârnaa inkhîna hrui a hmu thu

¹ Chun, ka mithai chu ka hang inlên a, ka en a, mi a kuta inkhina hmawl chawi hi ka hmuh a.

² Chun, keiin, “Khawtienga fe ding am i na?” ka ta. Ama chun ka kuom- ah, “Jerusalem chu inkhi dingin, a khang chu ieng ruol am a na, a dungtieng ieng chen am a na ti hre dingin,” a ta.

³ Chun, ngai ta, vântirko a mi betu chu a fe suok tah a, chun, vântirko dangin ama chu ân tuokpui a, a kuomah,

⁴ “Tlân la, hi tlangvâl kuoma hin, ‘mipui tam lei le ranruol leiin Jerusalem chu khuohai kulhai um lo anga hluo el nîng a tih,’ tiin hril rawh.

⁵ A vêlin kei a mei kul bang nîng ka ta, a sûnga chun kei chu a ropuina ka ni ding a ni sih a, LALPA chun a tih,” a ta.

Salintânghai kovin an um

⁶ “Hung ro, hung ro, hmâr rama inthawk dâm chun hung tlân suok ro, LALPA chun a tih: vân kil liahai chena chun ka lo sukdar ta si cheu a, LALPA chun a tih.

⁷ Babulon naunu le chêng hmun- khat Zion, hung la, hung suok rawh.

⁸ LALPA chun hieng hin a ti sih a: A ropuina ding ang peiin ama chun nangni suksetu cheu hnamhai kuom- a chun a mi tir a; nangni tâwktu cheu chun ama mit nautê a tâwk a ni sih a:

⁹ Ngai ta u, anni chunga chun ka kut chu thin ka ta, chuongchun, anni rawng bâwlpêktuhai ta dingin râllâk sum hung ni tâng an tih; chun, sipaihai LALPA chun kei a mi tir a nih ti hre tâng in tih.

¹⁰ Aw Zion naunu, hlim la, hla sak rawh, en ta, ka hung mêk a, nangni lai chun ka chêng ding a ni sih a, LALPA chun a tih.

¹¹ Chun, chu nia chun hnam tamtakhai chu LALPA tieng hung kawp an ta, ka mihai an hung ni ding a nih; chun, kei chu nangmaa chun chêng ka ta, chuongchun, sipaihai LALPA chun i kuomah a mi hung tir a nih ti hre tâng i tih.

¹² Chun, ram inthienga chun LALPA chun a chanpuol dingin Juda chu hluong a ta, Jerusalem chu thlang tâng a tih.”

¹³ Mi po pohai, LALPA hmaa chun to ṭhiep ro khai: a chêngna inthienga inthawk chun a hung thohar ta sih a.