TITA 1 - Pathien Lekhabu Inthieng (BSI)

Chibai bûkna

¹ Paula Pathien suok, Pathien ithlanghai ringna kawnga le, Pathien ngaisak tieng thutak hrietna kawnga Isu Krista tirko bawk chun:

² Chatuona hringna beiseina chu Pathien khêl hril thei naw chun leilung insieng hmain a tiem a;

³ nisienlakhawm, ama hun taka- hai chun a thu chu thuinchaa chun a suklang tah a, chu thuincha chu Pathien ei Sandamtu thupêk ang peia inkawltir ka nih.

⁴ Tita, ringna hmunkhata ka nau taktak kuomah: Pa Pathien le Krista Isu ei Sandamtu kuoma inthawka lunginsietna le inremna um raw se.

Kohran Upa thlangna

⁵ Hi lei hin Kret thlierkâra khan ka mâksan che a nih: thil sukfel bâkhai chu i sukfel pei theina ding le, thu ka pêk che ang khan khaw tinah upahai i ruotna dingin;

⁶ tukhawm, sawisêlbo, nuhmei pakhat nei, nauhai Pathien thu awi, inhawi chên taluona kawnga sawisêl hlaw naw, dân naw anga um naw, an ni ta phawt chun.

⁷ Kohran hotu chu Pathien sum enkawltu a ni leiin sawisêlbo a ni ding a nih; mi kâwmaw, lunginrawm, uoin inrui hmang, mi vaw hmang, hlêpna inthieng nawa mi duâm a ni ding a ni nawh.

⁸ Mi lâwm dân thiem, a ṭha tieng dit, lungril indiktak, mi fel, mi inthieng, insûm thei mi a ni lem ding a nih.

⁹ Inchûktirna indik tak kawnga chun mi ân fui theina ding le, sêltuhai chu thiemnaw ân changtir theina dingin inchûktirna ang pei thu ringum chu pawm tlat mi a ni bawk ding a nih.

Inchûktirna indik nawhai

¹⁰ Dân ang nawa um, thu hril mei meihai le hlêmtuhai tamtak an um sih a, sertanhai laia mi an ni deu tak.

¹¹ Chuonghai bau chu huppêk ding a nih, hlêpna inthieng naw dit leia thu inchûktir naw ding inchûk- tirin, mihai a sûng sûngin an chawk khawhlo hlak sih a.

¹² Anni laia mi an zâwlnei pakhat ngeiin, “Kret thlierkâra mihai chu khêlhlip dâm, sahrâng suol dâm, thabo buhehai an ni rawp hlak,” tiin a hril kha.

¹³ Chu thu inhriettir chu ân dik a nih. Chuleiin, ringnaa chun an indik theina dingin natakin kâwk rawh.

¹⁴ Judahai tienami thu le, thutak nghatsantuhai thupêkhai chu an ngaisak nawna dingin.

¹⁵ Mi inthienghai ta ding chun ieng- kim ân thieng hlak; nisienlakhawm, mi inthieng naw le ring nawhai ta ding chun iengkhawm ân thieng hrim a um ngai nawh, an lungril le an sie le ṭha hrietna hrim khawm ân thieng ta nawh.

¹⁶ “Pathien kan hriet,” tiin an ṭhang hlak a; nisienlakhawm, tirdak- um dâm, thu awi naw dâm, thil ṭha tinrêng thaw kawnga Pathien dit naw zâwnghai an nih, an thilthawin an inphatsan hlak sih a.