THUVARHAI 7 - Pathien Lekhabu Inthieng (BSI)

Nawchizawr zaihlêmnahai

¹ Ka naupa, ka thu hi kawl la, Ka thupêkhai hi nangmaa chun siekhâwl rawh.

² Ka thupêkhai hi kawlin khawsa la, Ka închûktirna chu i mitnautê angin;

³ I kutpârhaia chun khuopde la, I lungril phêk chunga chun ziek rawh.

⁴ Varna kuoma chun, “Nang chu ka farnu i nih,” ti la, Hrietthiemna chu i laibungah inbûk rawh.

⁵ Hmêlmak nuhmeia inthawka an kawl theina ding chein, Hmêlmak a thuhaia zaihlêmtu chea inthawk chun.

⁶ Ka in tukverah, Ka thirlêna chun ka en hlak sih a.

⁷ Chuongchun, mi mâwlhai laia chun ka en a, Tleirâwlhai laia chun, Hrietthiemna bo tlangvâl ka hmuh a.

⁸ Ama chun amanu tuol kawtthlêra chun fein, Amanu in lampui chu a hraw a,

⁹ Chu ni zântiengah, thimtham hnuoiah; Zân mâwk inthim mup hnuoia chun.

¹⁰ Chun, ngai ta, chutaka chun nuhmei, Nawchizawr inthuoma inthuom, lungril inlêktak ân tuokpui a.

¹¹ Amanu chu mi bautam ngalhrâttak a na, A ina hrim a ke chu a um hman ngai nawh a.

¹² Kawtthlêra le khawlai dunghaia umin, Kil tina inchânin a nghâk zing a.

¹³ Chuongchun, amanu chun ama chu a man a, a fâwp tah a, Chun, hmêl iniemtakin a kuomah a hril tah a;

¹⁴ “Inremna thilinhlânhai inthâwina inhlân ding ka nih a, Hi ni hin ka thutiemhai chu kân thien tah a.

¹⁵ Chuleiin, nangma tuok ding chein ka hung suok a nih; Taimataka i hmêl zawng dingin, chuongchun, ka hmu suok ta che hi.

¹⁶ Ka khum chu puon cheimawi inkhumin ka chei tah a, Puon ṭielhai Aiguptaa khâwng chun.

¹⁷ Ka khum chu riminhnik ka theh a, Murra le, beraw le, thingzungthakin.

¹⁸ Hung la, zingkâr chenin ei hmangaina sipzak lâng ei ta, Hmangainahaiin eini chu inhnêm ei tih,

¹⁹ Ka pasal chu inah a um nawh a, Khuol ram hlatakah a fe ta sih a.

²⁰ Ama chun tangka fûn a chawi a, Thla lir pha leh hung tlung a tih,” tiin.

²¹ Amanu thu hril ṭha chun ama chu ân pêktir tah a; A hmûrhai zaihlêmna chun ama chu a tirlui tah a.

²² Ama chun amanu chu a zui nghâl a, Bâwngchal sathattu kuoma fe ang elin, Annawleh, invêt sukdikna dinga thîrkawl bun ang elin,

²³ Thalin a thin chu a sunthleng hmakhata, Vatein châng a baw ang elin, A nun thlengna ding a nih ti hre loin.

²⁴ Chuleiin, tuhin ka nau- pasalhai, mi lo ngai unla, Ka baua thuhai hi pawisa ta u.

²⁵ A lampuihaia chun in lungril innghat naw sienla, A lampuihai chu zui bawk naw ro.

²⁶ Mi tamtak chu hliemin a peithlûk ta sih a; Anih, a sukhlumhai po po chu sipai râlhrâthai an nih.

²⁷ Amanu in chu Seol fena lampui a na, Thina pindana lûtthla chu.