THUVARHAI 1 - Pathien Lekhabu Inthieng (BSI)

Thuvarhai hlutzie

¹ Israel lal, David naupa Solomon thuvarhai chu:

² Varna le inchûktirna hre dingin; Hrietthiemna thuhai hre dingin

³ Thilthaw vara inchûktirna dawng dingin, Felnaa le rorêlnaa le thlierbîk nei lonaa leh;

⁴ Mi mâwl kuoma varna pe ding le, Tlangvâl kuoma hrietna le ngairuotthiemna pe dingin,

⁵ Mi var chun a hriet a, thiemnaa chun a belsa theina ding le, Hrietthiemna nei mi chun rorêlna ṭhahai chu a changna dingin;

⁶ Thuvar le tekhithu hrethiem ding le, Mi var thuhai le an thuril hrilhai chu hrethiem dingin.

⁷ LALPA ṭina chu hrietna bul a nih: Amiruokchu, invêt chun varna le inchûktirna chu an hmu- sit a.

⁸ Ka naupa, i pa inchûktirna hi ngai la, I nu inchûktirna chu nghatsan naw rawh;

⁹ I lua chun pâr ṭhi mawitak nîng an ta, I rîng vêla chun ṭhi ang an ni ding a ni sih a.

¹⁰ Ka naupa, mi suolhaiin an thlêm che chun Remtipui el naw rawh.

¹¹ Hienghin ti sien khawm, “Keini leh hung la, Thisen inchân ei ta, A san um loin mi pawitâwk- lo chu inrûkin inchân ei ta;

¹² Seol ang elin an hring pumin lem ei ta; Mi felhai ngei chu, vânsama fethlahai ang elin;

¹³ Thil hluhai po po chu hmûng ei ta, Ei inhai chu râllâk thilin suksip ei ta;

¹⁴ I chanpuol chu keini lai sielût ve la, Ei rêngin sumbâwm khat ei nei ding annâwm” tiin.

¹⁵ Ka naupa, anni chu lampuia chun intlawnpui naw la, An lampuia inthawk chun i ke chu vêng ṭha rawh.

¹⁶ An kehai chu rîtlona tieng a tlân a, Thisen insuo dingin an inhmaw sih a.

¹⁷ Vate hrim hrim mithmua lên keiphar chu; A thlâwn el a ni sih a.

¹⁸ Chun, chuong anni thisen ngei inchântuhai chun, Anni hringna ngei chu inrûkin an inchân a nih.

¹⁹ Hlêpnaa duâm mi taphawthai lampui chu chuong ang chu a nih; A neituhai hringna chu a lâk hmang hlak.

²⁰ Varna chu kawtthlêra chun inringtakin a khêk a; Khawlaiahai chun a râwl chu ân suoh a.

²¹ Kawtthlêr inrîk mur murna hmun takhaia chun a khêk a, Dâi kawtkhâr lûtnaa dâm chun. Khawpui sûnga chun a thuhai chu a hril a.

²² Ieng chen am nangni mi mâwlhai, mâwlna hi in hmangai ding a na? Hmusittuhai chu an hmusitnaa chun an lâwmin, Invêthai chun ieng chen am hrietna chu in theida ding a na?

²³ Ka kâwknaa hin nghakîr unla, Ngai ta u, in kuoma chun ka thlarau chu hung buok ka ta, Ka thuhai chu in kuomah inhriettir ka ti cheu.

²⁴ Ka ko cheu a, in ngaisak nawh a, Ka bân ka pharsuok a, tu- khawma in ngaisak nawh a,

²⁵ Ka thurâwn chu iengkhawm loah in siem a, Ka kâwkna a ieng khawm chu in ngai naw leiin,

²⁶ Kei khawm in lunginzing nia chun innui ka ta, In ṭitna hung pha khawm chun nuisan ka tih,

²⁷ In ṭitna chu thlipui angin, In lunginzîngna chu thlivir angin a hung a, Rimsikna le tuorna chu in chungah a tlung pha chun;

²⁸ Chun, kei chu mi hung ko an ta, nisienlakhawm, dawn naw ningah; Nguntakin mi hung zawng an ta, nisienlakhawm, mi hmu naw hi hai.

²⁹ Hrietna chu an theidah a, LALPA ṭîna chu an thlang nawh a,

³⁰ Ka thurâwn a ieng ieng khawm an zâwm nawh a, Ka kâwkna po po chu an hmusit a,

³¹ Chuleiin, anni lampui rasuok ngei chu fâng an ta, An thiltumhai ngeia suksip ni tâng an tih.

³² Mi mâwl hnungtawlna chun anni chu sukhlum a ta, Invêthai nuomsakbâwlna chun anni chu a suksiet ding a ni sih a.

³³ Amiruokchu, tukhawm keia thu ngai chu himtakin chêng a ta, Rîtlona ṭi dêr loin um ṭawk ṭawk a tih.