THUHRILTU 8 - Pathien Lekhabu Inthieng (BSI)

¹ Mi var ang hi tu am a um a? Thil umze hrie tu am a um a? Mi a varna chun a hmêl chu a sukvar a. A hmêl inrumna khawm chu a danglam tah.

Laltak thu zâwm ding a nih

² Thu ka râwn che; Lal thupêk chu pawisa rawh, Pathiena în khâmna lei chun.

³ A hmaihmaa inthawk fe suok inhmaw naw la, thil suol khawm thaw zing naw rawh; a nuom zâwng taphawthai chu a thaw si a.

⁴ Lal thu chun thilthawtheina a nei leiin, tuin am a kuomah, “Ieng am i thaw a” ti thei a ta?

⁵ Tukhawm thupêkhai pawmtu chun thil ṭha naw tuok naw nih; mi var lungril chun hun indik le a kawnglam a hriet.

Pathien lampuihai chu mihriem hrietna bâka mi a nih

⁶ Thil tinrênghai chun hun le kawnglam an nei si a; mihriem buoina chu a chungah nasa hle sien khawm.

⁷ Thil la hung tlung ding chu a hriet si nawh a, a la hung ni dân ding chu tuin am hril thei a ti leh?

⁸ Thlarau chu chel dingin, thlarau chunga thuneina nei mihriem an um nawh; thi ni chunga khawm chun thuneina an nei bawk nawh; chun, indonaa chun châwl a um bawk nawh; chu chu kuoma pêka um ta chu rîtlona chun ama rîtlona chu sansuok naw nih.

⁹ Hi po po hi ka hmu tah a; nisa hnuoia sin po pohaia chun ka lungril chu ka hmang tah a; mi pakhatin mi dang chungah ama le ama ân suknatna ding elin thuneina a nei hun chu a nei a nih.

¹⁰ Chun, mi rilo chu phûma a um ka hmuh a, thlâna chun an hung a; chuong thil thaw diktuhai chu hmun inthienga inthawk chun an fê hmang a, khawpuia chun anni chu theinghil an ni tah a; hi khawm hi teplo bawk a nih.

¹¹ Sin ṭha naw chunga thu rêl thlûk chu inrangtaka suksuok a ni ngai nawh a, chuleichun, mihriemhai naupasalhai chun thil suol thaw dingin an lungril chun a tin rân hlak a nih.

¹² Mi suol chun thil ṭha naw vawi za thawin a dam sûng nihai chu suksei tho sien khawm; matheiloin, Pathien ṭituhai ta ding chun, ama hmaa an ṭi leiin, a ṭha ding a nih ti ka hriet a;

¹³ amiruokchu, mi rilo ta ding chun ṭha naw nih a, a dam sûng ni- hai khawm chu suksei pha naw bawk a tih; chu chu hlim ang el hi a na; Pathien hmaa chun a ṭî naw leiin.

¹⁴ Hnuoi chunga hin thil teplo thaw tah a um a; mi fel chu an um a, an kuoma khawm chun mi rilohaiin an thaw ang angin a tlung a nih; chun, mi rilohai an um bawk a, an kuoma khawm chun mi felhai sin- thaw ang ang chun a tlung ve bawk a nih. Hi khawm hi teplo bawk a nih ka tih.

¹⁵ Chun, miin hlima uma, fâka dâwn nêka nisa hnuoia hin thil ṭha lem a nei naw leiin, nuomsipna hi ṭha ka ti el a nih; nisa hnuoia Pathienin ama a lo pêk tah a dam sûng nihaia po po chun a sininrimna chu a kuoma chun a um ding a ni sih a.

¹⁶ Hnuoi chunga sin thawa um- hai chu hmu ding le, varna chu hre dinga ka lungril ka hmang lai chu: (sûna manih zâna mani khawma mithaiin îmu a hmu nawzie dâm chu);

¹⁷ nisa hnuoia sin thawa um, mi- hriemhaiin an hmu suok thei naw, Pathien sinthaw chu ka hmuh a; ieng ang khawmin, miin zawngin nasatak- in thaw inrim sien khawm, hmu suok chuong naw nih; mi var khawma hriet inring sien khawm hmu suok chuong bawk naw nih.