ṬAP HLA 3 - Pathien Lekhabu Inthieng (BSI)

Pathien zângaina zâra sanhimna beiseina

¹ A lunginsenna hmawla hremna hmu tah mihriem chu ka na,

² Ama chun a mi ṭhuoi a, varah ni loin, inthimah a mîn lâwntir a.

³ Keia chungah sûnnithlâkin a kut a thlâk takzet a.

⁴ Ka taksa le ka vun chu a sukchuor a, ka ruhai chu a suktliek a.

⁵ Ka chunga chun dai a rem tah a, nauhase nat le khâknain a mîn huon a.

⁶ Sâwttaka lo thi tahai ang khan, hmun inthimahai chun a mîn chêngtir a.

⁷ Ka vêlin a mîn huon a, ka suok thei nawna dingin; ka khaidiet chu a sukrik a.

⁸ Anih, ka khêk a, ṭhangpuina ka ngên pha leh, ka hnina chu a lo dangkîr a.

⁹ Ka lampuihai chu lung a saka sakhaiin ân huon a, ka lampuihai chu a sukkâwi a.

¹⁰ Keia ta ding chun ama chu savawm mi lo inchân zingtu, hmun fienriela sakeibaknei ang chu a nih.

¹¹ Ka lampuihai chu a herkâwi a, a mi keinâwi vawng a; râusanin a mi siem tah a.

¹² A thalngul chu a kuoi a, thal ta dinga kâp dingah a mi sie tah a.

¹³ A thalbâwm thalhai chu ka diemnêmah a hung kâp lût a.

¹⁴ Ka mihai ta dinga hrilinsîm le, ni tin tina an hla ka lo ni tah a.

¹⁵ Ama chun khâknain a mi suksip a, sairam kha leh a mîn ṭhungtir tah a.

¹⁶ Ka hahai chu lungtâthaiin a suknâwi a, pilvutin a mîn khum bawk a.

¹⁷ Nangin ka thla chu thlamuong- naa inthawka hlataka chun i sie hmang a; hlawtlingna khawm ka theinghil rau a.

¹⁸ Kei chun, “Ka hrâtna le LALPAA inthawka ka beiseina chu a bohmang an ta hi,” ka tih a.

¹⁹ Ka hrem tuorna le ka rimsikna, sairam thing le khâkna chu hre zing la.

²⁰ Ka lungril chun a hriet zing zing a, keimaa chun a kûn a.

²¹ Hi hi ka lungrilah ka hung hrietsuok nâwkin, chuleiin, ka beisei hlak.

²² A lunginsietna chun a tlin naw naw leiin, LALPA zângaina leiin sukbohmangin ka um hri nawh a.

²³ Zîng tinin an thar a; i ringumna chu a ropui a nih.

²⁴ Ka thla chun, “LALPA chu ka chanvo a na, chuleiin, amaa chun beisei ka tih,” a ta.

²⁵ Lungrila ama zawngtuhai le, ama nghâktuhai kuoma chun LALPA chu a ṭha a.

²⁶ LALPA sandamna chu miin an nghâk ṭâwk ṭâwk a, an beisei chu a ṭha a nih.

²⁷ Miin a tleirâwl laiin rîngkawl chu a phur chun a ṭha a nih.

²⁸ Ama chunga chun ân nghatpêk ta leiin, mâkhâtin ṭhung sienla, to zing raw se.

²⁹ A bau chu pilvuta chun sie sienla, chuongchun, beiseina a um thei rawi mawh.

³⁰ Ama bentu chu a bieng dawpêk sienla, kâwknaa sipa suksipin um raw se.

³¹ LALPA chun kumkhuo chun a peihâwn âwm si nawh a.

³² Lungngaina intlungtir hlak sien khawm, a zângaina hauzie ang peiin lunginsietna chu nei a tih.

³³ Nuom thu ngawtin a hremin, mihriem nauhai chu a suklungzîng ngai si nawh a.

³⁴ Hnuoia lungin intânghai po po kea sirde dingin.

³⁵ A chunghnungtak hmaihmaa mihriem thuneina herhmang ding le,

³⁶ Mi chu a chungthua hnuoisie chu, LALPA chun rem a ti nawh.

³⁷ LALPAIN thu a pêk naw laia, a hril a, hung tlung el hlak chu tu am a na?

³⁸ A chunghnungtak baua inthawk chun thu sie le ṭha chu a suok ni lo am a nih?

³⁹ Iengleiin am mi hring chu mi a suolnahai leia hremna thua chier hlak a na?

⁴⁰ Ei lampuihai chu thaw ṭâl ei ta, zawngsuok ei ta, LALPA kuomah inher kîr nâwk ei tiu.

⁴¹ Vânhaia Pathien kuoma chun ei kuthai leh ei lungril chu chawisâng vêng ei tiu.

⁴² Kan bawsiet a, kan hel tah a, nang chun i mi ngaidam nawh a.

⁴³ Lunginsennain în khum a, keini i mi hnawt a; i that a, i lunginsiet nawh a.

⁴⁴ Kan hninahai chu a fethleng thei nawna dingin, nang chu sûmpui chun în khum a.

⁴⁵ Hnamhai laia chun hnâwlthlâk le, hnâwlhnawk angah i mi siem tah a.

⁴⁶ Kan hmêlma hai po po hlakin kan chungah an bau an ka pêkpûk a.

⁴⁷ Vânsam le ṭitna chu kan chungah a hung tlung a, buoina le bohmangna le chun.

⁴⁸ Ka mihai naunu suksieta a umna lei chun, ka mit chu vadungpui tui angin a luong a.

⁴⁹ Ka mit chu, ma loin, tâwp hun nei loin, ân bunthlah a;

⁵⁰ LALPAIN vâna inthawka a hung en a, a hung hmu hmakhat chun.

⁵¹ Ka khawpui naunuhai po po lei chun, ka mit chun ka thla chu a sukna a.

⁵² A san um loa ka hmêlmahai chun, vate angin an mi hnawt rak rak a,

⁵³ A hringin khurah an mi pei lût a, lung an mi hung thlâk khum a.

⁵⁴ Tuiin ka lu a chîm tlum a, “Ka bo a ni tah ie,” ka tih a.

⁵⁵ Khur sûng inhnuoitaka inthawk chun, aw LALPA, i hming ka hung ko a,

⁵⁶ Ka râwl chu i hriet a, ka khêkna le, kân thuoknaah i na chu suksêt naw la.

⁵⁷ Nang ka hung ko ni chea chun i hung hnai a; “Ṭi naw rawh,” i ta.

⁵⁸ Aw LALPA, ka thla chungthu chu nangin i ṭan a, nangin ka hringna i sanhim a.

⁵⁹ Aw LALPA kân dik nawna i hmuh a; ka chungthu nangin rêl la.

⁶⁰ An phubalâknahai po po le, ka chunga an thiltum dânhai chu i hmu vawng kha.

⁶¹ Aw LALPA, nangin an kâwknahai le, ka chunga an thiltum po po chu i hriet a.

⁶² Ka chunga hung ṭuongtuhai hmûr le, ni tin tina ka chunga an ngairuotnahai chu.

⁶³ An ṭhung lai le an tho lai khawm chu nangin en la, an hla ka ni hi.

⁶⁴ Aw LALPA, an kuthaia an sinthaw ang peiin nangin thungna pe la.

⁶⁵ Anni kuoma i ṭawngsie, lungril ngarna chu nangin pe rawh.

⁶⁶ Nangin lunginsennain hnawt i ta, LALPA vânhai hnuoia inthawk chun sukbohmang i tih.