RUTH 3 - Pathien Lekhabu Inthieng (BSI)

Ruth le Boaz, buchîlna hmunah

¹ Chun, a tarpinu Naomi chun a kuomah, “Ka naunu, i ta dinga khawsakna ṭha ka zawngpêk naw ding che am a nih?

² Boaz, a siehlaw nunghâkhai laia sin i va thawnapa kha ei laibung bul a ni naw am a nih? Ngai ta, vawizân hin buṭei hrizâwlah a zâp fai ding a nih.

³ Insil la, sahriek innâl la, i incheina puon ṭha takhai sil la, hri- zâwla chun zu fe rawh: amiruokchu, ama chu fâk le dâwn ân zo hmakhat chu a kuomah inhriettir dêr naw rawh.

⁴ Chun, a zâl phaleh a zâlna chu inchik la, lût la, a ke hlîm la zâl rawh; chun, amain i thaw ding chu lo hril a ti che,” a tih a.

⁵ Ruth chun a dawn a, “I hril taphawt chu thâwng ka tih,” tiin.

⁶ Chuongchun, hrizâwla chun a zu feh a, a tarpinuin a hril ang tak chun a thawh a.

⁷ Chun, Boaz chu bu a fâka a dâwn zo chun a lungril a hung hlim ta hleh a, bu hlûm bula zâl dingin a fe tah a. Ruth chu to ṭawkin a va feh a, a ke chu a hlîma a zâl ve tah a.

⁸ Zânrilah chupa chu inlâurakin a ṭhanghar a, a hei inlet a; a ke thluona nuhmei lo zâl ve zing chu a hmuh a.

⁹ Chun, ama chun, “Tu am i nih a?” a tih a. Ama chun, “I siehlawnu Ruth ka nih, i siehlawnu hi i puon mi hung kêuzawm rawh; ka laibung bul i ni sih a,” a tih a.

¹⁰ Ama chun, ka naunu LALPAIN malsâwm raw se che; tlangvâl pasie amanih hausa i zui nawa hin a hma- saa nêk hmanin a hi hnunga mia hin ṭhatna i suklang nasa ta lem a nih.

¹¹ Tuhin, “ka naunu, ṭi naw rawh; i hni taphawt thawpêk pei ka ti che; ka khaw mi chanpui po poin nuhmei feltak i nih ti an hriet seng sih a.

¹² Chun, tuhin, laibung bul chu ka ni ngei el; amiruokchu, keia nêka hnai lem a um a.

¹³ Vawizân chu um phawt el la, zingkâr ama chun i ta dinga laibung chan chu a thaw nuom chun ṭhang a ta, thaw raw se; amiruokchu, laibung chan chu a thawpêk nuom naw che chun, LALPA hringna sâlin, laibung chan chu thawpêk ngei ka ti che, zingkâr chenin zâl zing el rawh,” a tih a.

¹⁴ Chuongchun, zingkâr chenin a ke thluona chun a zâl tah a, chun tukhawm lân hmu chieng thei hmain a tho a; chun, ama chun, “Hrizâwla chun nuhmei chu a hung ti tu- khawmin hre naw raw se,” a tih a.

¹⁵ Chun, “I puon bât kha hung la la dâw rawh,” a tih a. Chuongchun, a dawh a, buṭei chu tekhâwng ruk ân khi suok a, a sung a, ân phurtir a, chun, khuoa chun a fe tah a.

¹⁶ A tarpinu kuom a hang tlung chun, “Ka naunu, ieng am i chang a?” a lo tih a. Ama chun, chu mipain thil a thawpêk po po chu a hril vawng a.

¹⁷ “Hi buṭei tekhâwng ruk hi a mi pêk a, ‘I tarpinu kuoma chun kut ruokin fe dêr naw ti nih,’ a mi ti a nih,” tiin.

¹⁸ Chun, ama chun, “Ka naunu, ieng angin am thil a hung um ding ti i hriet hma chun nghâk el rawh, vawisûn niha hi thil hi a thaw zo hmakhat chun ama chu a to el âwm si nawh a,” a tih a.