RORELTUHAI 8 - Pathien Lekhabu Inthieng (BSI)

¹ Chun, Ephraim mihai chun a kuomah, “Iengtizieha hienga i mi thawh a, Midianhai do dinga i fe laiin i mi ko ve naw am a nih a?” an tih a. An hal nasa hle el a.

² Ama chun an kuomah, “Nangni nêkin tuhin ieng am ka thaw bîk leh? Abiezer mihai grêp lo nêk chun Ephraim mihai grêp hmu ṭhel zawng hi a nasa lem ni lo am a nih?

³ Pathien chun Midian lalhai, Oreb le Zeeb chu in kutah a hung pêk ta cheu a, nangni nêkin kei hin ieng am ka thaw thei chuong leh?” a tih a. Chuongchun, chu thu a hang hril chun a chunga an lunginsen chu a re tah a.

Gideonin Midian lalhai a man

⁴ Chun, Gideon le a kuoma mi za thum umhai chun Jordan vadung chu an zu tlung a, an kai a, châu sa sain an hnawt pei a.

⁵ Chun, Sukkoth khuoa mihai kuoma chun, “Hieng ka hnungzuihai hi, ka hni cheu hi, beiphêkhai pe ta u khai, an châu ta êm el a, Midianhai lal Zeba le Zalmunna ka hnawt a nih,” a tih a.

⁶ Sukkoth khuoa mi lienhai chun, “Zeba le Zalmunna chu i kuta umsa ang hrieua chuonga i sipaihai bei kan hang pêk el ding chu?” an tih a.

⁷ Gideon chun, “Aw le, LALPAIN Zeba le Zalmunna chu ka kuta a mi pêk pha chun in taksa chu thla- lêra hling le hlohlingneihai chun sun thlêr dei duoi ngei ka ti maw le,” a tih a.

⁸ Chutaka inthawk chun Penuelah a hang feh a, an kuomah chuong ang bawk chun a hril nâwk a, chun Penuel khuoa mihai chun Sukkoth khuoa mihai dawn dân bawkin an lo dawn veh a.

⁹ Chun, Penuel khuoa mihai kuoma chun, “Inremna thu phura ka hung kîr nâwk pha chun, hi kul hi chu hung sukchim ngei ka tih,” tiin a hril bawk a.

¹⁰ Tuhin Zeba le Zalmunna chu an sipaihai, khawsak nauhai sipaihai thi mahlahai po po, sîng khat le sâng nga lai leh Karkorah an um a, kâwlhnâm chawi mi ṭhieu nuoi khat le sîng hni an thi sih a.

¹¹ Chun, Gideon chu Noba le Jogbeha saktienga puon ina umhai lampuia chun a hang feh a, sipaihai chu a hang thawh a, sipaihai chu lungmuongtakin an lo um sih a.

¹² Chun, Zeba le Zalmunna chu an tlânse tah a; chuongchun, a hnawt a, Midian lal pahni Zeba le Zalmunna chu a man a, sipaihai po po chu a chawkbuoi tah a.

¹³ Chun, Joas naupa Gideon chu indonaa inthawkin Heres lam tunga chun a hung kîr nâwk tah a.

¹⁴ Chun, Sukkoth khuoa tlangvâl pakhat a man a, thu ân dawn a; ama chun Sukkoth khuoa mi lienhai le upahai hming chu a ziekpêk vawng a, sâwmsari pasari an nih.

¹⁵ Chun, Sukkoth khuoa mihai kuoma chun a hang feh a, “Zeba le Zalmunna hi en ta u, hienghai hi annâwm, ‘Zeba le Zalmunna chu i kuta umsa ang hrieua, chuonga i mi châuhai bei kan hang pêk el ding chu,’ tiha in mi tielnahai kha,” a tih a.

¹⁶ Chuongchun, chu khuoa upahai chu a man a, thlalêr hling le hlohling- neihai chun Sukkoth mihai chu ân chûktir a.

¹⁷ Chun, Penuel khaw kul chu a sukchim a, khuoa mihai khawm chu a that a.

¹⁸ Chun, Zeba le Zalmunna kuoma chun, “Tabor tlânga in mi thathai kha mi ieng ang am an nih a?” a tih a. Anni chun, “Nanga ang ang hi an nih, lal nau hawina an nei seng el,” an tih a.

¹⁹ Ama chun, “Ka unau, ka nu naupahai ngei an nih in sawnnaw, LALPA chu a hring zing ang hin, anni chu lo hla ta chu ni unla ka that naw ding cheu bah,” a tih a.

²⁰ Chun, a naupa upa tak Jether kuoma chun, “Khai le nangin that rawh,” a tih a. Nisienlakhawm, tlang- vâl chun a kâwlhnâm chu a phawi nawh a, tleirâwl chau a la ni leiin a ṭi a nih.

²¹ Chun, Zeba le Zalmunna chun, “Nang kha hung inthawk la mi hung thaw ta la, patling le patling inthaw ding a nih annâwm,” an tih a. Chun, Gideon chu a tho a, Zeba le Zalmunna chu a that tah a; chun, an sa- nghâwngseihai rînga rîngawrhai chu a lâk a.

Gideon thilthaw danghai le a thi thu

²² Chuongchun, Israel mihai chun Gideon kuomah, “Nangin kan chung- ah ro rêl ta raw khai, nang le i naupa- salhai le i naupasalhai nauhai chen khawmin; nangin Midianhai kuta inthawk hin i mi sansuok ta sih a,” an tih a.

²³ Gideon chun an kuomah, “Kei chun chu in chunga hin ro rêl naw ning ah, ka naupa hlakin in chungah ro rêl naw bawk a tih; LALPAIN in chungah ro rêl lem a tih,” a tih a.

²⁴ Gideon ma chun an kuomah, “Thil pakhat ruok chu hni cheu ka nuom a, mi tinin in râllâk nabe kha mi pe seng ta unla,” a tih a (Ismael mihai an ni leiin rângkachak nabe an nei a nih).

²⁵ Anni chun, “Pe mawl kan ti che,” an tih a. Chuongchun, puon an phah a, mi tinin an râllâk nabe chu an the suok ta seng a.

²⁶ Chun, chuong rângkachak nabe a hni khâwm chu a rikzie chu rângkachak shekel sâng khat le za sari a nih, rîngawrhai, nabehai, Midian lalhai puon senduk tiemsa loin an sanghâwngseihai khaidiet hli khawm ṭhang loin.

²⁷ Chun, Gideonin chuonghai chun thiempu zakawsîng a siem a, a umna Ophra khuoa chun a sieh a; chutaka chun chu chu bein Israelhai po po chu an lo uire zo tah a, Gideon le a sûnghai ta ding khawma châng a lo ni tah a.

²⁸ Chuongchun, Midianhai chu Israel thlahai hmaa chun suktlâwm- in an lo um tah a, an châng thei ta nawh a. Gideon dam sûng chu ram chu kum sâwmli râlmuongin a um a.

²⁹ Chun, Joas naupa Jerubbaal chu a feh a, ama inah a um tah a.

³⁰ Gideon chun ama nei ṭhieu naupasal sâwmsari a nei a, nuhmei tamtak nei a ni leiin.

³¹ Sekema a thâikêmin naupasal a neipêk bawk a, a hmingah Abimelek a sak a.

³² Joas naupa Gideon chu tar kûna damin a thih a, Abiezrithai ta Ophra a pa Joas thlâna chun an phûm tah a.

³³ Chun, Gideon a thi phing chun Israel mipui chu an hnungtawl nâwk nghâl tah a. Baalhai kuoma chun, an hung uire tah a, Baal-berith chu an pathienah an hung siem a.

³⁴ Chun, Israel mipui chun an vêla hmêlmahai po poa inthawka san- suoktu LALPA an Pathien chu an hriet ta nawh a;

³⁵ Jerubbaal (Gideon) chu Israel- hai chunga theitâwpa ṭhat insuo hlaktu sûnghai chunga khawm chun ṭhat an inchu ve ta nâw bawk a.