RORELTUHAI 6 - Pathien Lekhabu Inthieng (BSI)

Gideon Koa a um thu

¹ Israel thlahai chun LALPA mit- hmuah thil suol an thawh a; chuleiin, LALPAIN Midianhai kutah kum sari ân umtir a.

² Midianhai chun Israelhai chu an inhmin dêr tah a; chuongchun, Midianhai lei chun Israel thlahai chun tlângah bûkhai, pûkhai, le kulhai an siem a.

³ Chun, Israelhaiin thil an hang chîng hin Midianhai, Amalekhai le khawsak nauhai chu an hang feh a, an hang do a,

⁴ umhmun an hang khuor a, Gaza chenin, hnuoia thil ṭohai chu an suksiet pêk a, Israel rama chun fâk thei hrim an hla nawh a, berâm dâm, sabengtung dâm, chenin.

⁵ An ranruolhai le an puon inhai leh an hung inthawk a, khâu ang elin tamtakin an hung inthawk hlak sih a; anni le an sanghâwngseihai chu tiem sêng khawm an ni nawh; an hunga ram chu an suksiet hlak a nih.

⁶ Chuongchun, Israelhai chu Midianhai lei chun nasataka suk- hnuoi an lo ni tah a; chun, Israel thlahai chun LALPA chu an ko a.

⁷ Chun Midianhai leia Israelhaiin LALPA chu an ko phing chun,

⁸ LALPA chun Israel thlahai laia chun zâwlnei a hung tir a, ama chun an kuomah, “LALPA Israelhai Pathien chun hieng hin a ti a nih, ‘Aiguptaa inthawk khan ka hung ṭhuoi tung cheu a, suok nina ina inthawk ka ṭhuoi suok cheu a;

⁹ Aigupta kuta inthawk le nangni suknawmnatuhai cheu kuta inthawk khan ka sansuok cheu a, in hmaa inthawkin anni chu ka hnawt suok pei a, an ram chu ka pêk cheu a;

¹⁰ chun keiin, Kei hi LALPA in Pathien chu ka nih, in umna ram neitu Amor mihai pathienhai hi in ṭi dêr ding a ni nawh, ka tih a, nisien- lakhawm, ka râwl chu in ngai si nawh,’ a ti a nih,” a tih a.

¹¹ Chun, LALPA vântirko a hung a, Ophra khuoa Abiezrit mi Joas thingsaisuo hnuoiah a ṭhung a, a naupa Gideon chun Midianhai hmu theilo dingin grêp sâwrna khura chun bu a lo vuok a.

¹² LALPA vântirko a kuomah a hung inlâr a, a kuomah, “Nang mi hrât huoisen, i kuomah LALPA chu a um,” a tih a.

¹³ Gideon chun a kuomah, “Aw pu, LALPA kan kuomah a um si chun, iengtizieha hienga kan chunga thil tlung el am a nih a? Kan thlatuhai khan, ‘LALPA chun Aiguptaa in- thawk khan a mi ṭhuoi suok ni lo am a nih?’ tia a thilthaw maktak takhai an mi hrilhai dâm kha khâwlai am a um zo ta leh? Tuhin chu LALPA chun a mi nghatsan dêr tah a, Midianhai kutah a mi pêk tah a ni hi,” a tih a.

¹⁴ LALPA chun ama chu a en a, a kuomah, “Hi i hrâtna hin fe la, Israelhai hi Midianhaia inthawkin sansuok rawh; ka tir che a ni naw am a nih?” a tih a.

¹⁵ Ama chun a kuomah, “Aw LALPA, iengtin am Israelhai hi hang sansuok el hlak ka ti lie? Ngai ta, Manasse thlahai laia hnam châu tak ka nih a, kei hlak hi ka pa sûngkuo laia a chîn tak ka ni bawk sih a,” a tih a.

¹⁶ LALPA chun a kuomah, “I kuomah ka um pei ding annâwm; chuongchun, Midianhai chu mi pakhat ang elin hne vawng el i tih,” a tih a.

¹⁷ Gideon chun a kuomah, “I mit tlung ka lo ni chun, nangma ngeiin i mi biek a nih ti inchikna ieng amanih mîn entir ta la.

¹⁸ I hmaa inhlân ding thilpêk ka va lâk a, i kuoma ka hung nâwk hmakhat chun, ka hni che hi, hitaka inthawk hin lo fe hmang dêr naw rawh,” a tih a. Ama chun “I hung nâwk hmakhat chun lo um zing ka tih,” a tih a.

¹⁹ Gideon chu a lût tah a, kêlte le beiphit epha khat chawl ṭhanglo a buotsai tah a; a sa chu leikhâwrah a sieh a, a tui chu bêlah a sieh a, thingsaisuo hnuoiah a kuoma chun a hung chawi a, a hung inhlân a.

²⁰ Chun, Pathien vântirko chun a kuomah, “Sa le chawl ṭhanglo bei kha la la, hi lung chunga hin sie la, a tui kha bun suok rawh,” a tih a. Chuong ang chun a hang thawh a.

²¹ Chuongchun, LALPA vântirko chun a hmawl chawi hmawr chun sa le chawl ṭhanglo bei chu a hei tâwk a; chun, lunga inthawk chu mei a hung suok a, sa le chawl ṭhanglo bei chu a kâng hmang vawng a; chun, LALPA vântirko chu a mithmua inthawk chu a fe hmang tah a.

²² Chuongchun, Gideon chun LALPA vântirko a nih ti a hriet tah a; chun, Gideon chun, “E khai, aw Lalpa PATHIEN, LALPA vântirko chu in- hmatawn ngeiin ka hmu ta chu aw!” a tih a.

²³ LALPA ruok chun a kuomah, “Thlamuongtakin um la, ṭi naw rawh, thi naw ti nih,” a tih a.

²⁴ Chuongchun, Gideon chun chu- taka chun LALPA ta dingin mâichâm a siem a, Jehova-Salom ân bûk a; tu chen hin Abiezrit mihai khuo Ophraa chun a la um zing a nih.

²⁵ Chu zân ma chun LALPAIN a kuomah, “I pa bâwngchal, bâwngchal pahnina, kum sari mi chu la la, i pa inei Baal mâichâm hi sukchim la, a bula Asera hi phûr rawh,

²⁶ chun, hi kul chunga hin kawng- zâwng neitakin LALPA i Pathien ta dingin mâichâm siem la, bâwngchal pahnina chu la la, i phûr ding Asera thing chu hmangin pumrawhmang thilinhlân inhlân rawh,” a tih a.

²⁷ Chuongchun, Gideon chun a siehlawhai laia mi sâwm a ṭhuoi a, LALPAIN a kuoma a hril ang chun a thaw tah a; nisienlakhawm, a pa sûnghai le khawpuia mihai chu a ṭi leiin sûnah a thaw ngam nawh a, zânah a thaw a nih.

²⁸ Khawpuia mihai chu zîngkâr inhmataka an hang tho chun, Baal mâichâm sukchima lo um le, a bula Asera phûr thlûka lo um le, mâichâm siem chunga bâwngchal pahnina inhlâna lo um chu an hmuh a.

²⁹ “Hi hi tu thaw am nîng a ti leh aw?” tiin an inbiek tâwl a. Chun, an hang indawn a, an hang indap vêl hnung chun, “Joas naupa Gideon thaw a lo ni zing annâwm ie,” an ti tah a.

³⁰ Chun, khawpuia mihai chun Joas kuoma chun, “I naupa chu hung ṭhuoi suok rawh, a thi ngei ding a nih; Baal mâichâm a sukchim lei le a bula Asera a phûr leiin,” an tih a.

³¹ Joas ruok chun ama hung khingtuhai po po kuomah, “Baal chu in ṭan ding a ni maw? Ama chu in hum ding am a nih? Tukhawm ama ṭan taphawt chu zingkâr le le hin sukhlum ding a nih; pathien a ni chun a mâichâm an sukchim leiin ama le ama inṭan ta sienla,” a tih a.

³² Chuleiin, chu ni chun Gideon chu Jerubbaal ti a ni tah a, chu chu, “Baal chun ama khing raw se” tina a nih, Baal mâichâm a sukchim lei chun.

³³ Chun, Midianhai po po le, Amalekhai le khawsak nauhai chu an pung khâwm tah a, Jordan vadung an kai a, Jezreel ruomah an inkul a.

³⁴ Nisienlakhawm, LALPA thla- rau chu Gideon chungah a hung tlung a, chun, tawtawrâwt a hang mût a; ama zui dingin Abiezrit mihai chu a ko khâwm tah a.

³⁵ Chun, Manassehai po po kuom- ah mihai ân tlântir a, anni khawm chun, ama chu an pan khâwm tah a: chun Aserhai, Zebulunhai le Naphta- lihai kuoma khawm mihai ân tlântir a, anni khawm chun an hung thlawp ve tah a.

³⁶ Chun, Gideonin Pathien kuom- ah, “I hril anga keia kuta Israelhai hi i sansuok ding chun,

³⁷ ngai ta, hrizâwlah berâm hmul sieng ka ta, berâm hmula chau chun dâidaw a lo tlah a, hnuoi po po chu a lo hul vawng chun, i hril angin keia kutin Israelhai hi i sansuok ding a nih ti hrieng ka tih,” a tih a.

³⁸ Chuong ang chu a hung ni ngei a, a zînga zingkâr inhmataka a tho a, berâm hmul chu a hmetsâwr chun, berâm hmula mi chu dâidaw berbu khat zet a sâwr suok el tah a.

³⁹ Chun, Gideonin Pathien kuom- ah, “Ka chunga hin lunginsen naw la, vawi khat chau hang hril nâwk ka tih, vawi khat chau berâm hmulin mi sukfiepêk nâwk rawh, tuta ṭum chu berâm hmul chau chu lo hul sienla, hnuoi chung po poa chun dâidaw lo um ve thung raw se,” a tih a.

⁴⁰ Chun, chuong angin chu zân chun Pathienin a hung thawh a; berâm hmul chau chu a lo hul a, hnuoi chung po poa chun dâidaw chu a lo um ta thung a.