RORELTUHAI 21 - Pathien Lekhabu Inthieng (BSI)

Benjaminhai nuhmei ding

¹ Chun, Israel mihai chun Mizpaa chun, “Eini laia mi tukhawm ei naunuhmeihai hi Benjamin mihai nuhmeiah inneitir dêr nâwng ei tiu,” tiin ṭawng an inkhâm a.

² Chun, mipui chu Bethelah an feh a, Pathien hmaa chun zântieng chenin an ṭhung a, an râwlhai insuoin an ṭap rak rak a.

³ Anni chun, “Aw LALPA, Israelhai Pathien, iengtizieha Israel mihai lai hin hieng thil hi hung uma, vawisûn hin Israelhai hi hnam pakhata kim ta lo am an nih a?” an tih a.

⁴ Chun, a zînga chun mipui chu inhmatakin an tho a, chutaka chun mâichâm an siem a, pumrawhmang thilinhlânhai le inremna thilin- hlânhai an inhlân a.

⁵ Chun, Israel thlahai chun, “Israel hnam po po laia LALPA kuoma pungkhâwmhai laia hang ṭhang ve naw chu tuhai am an nih a?” an tih a. Mizpaa LALPA hmaa hang fe naw taphawt chu, “Sukhlum ngei ding nîng a tih,” tiin ṭawng an lo inkhâm ta tlat sih a.

⁶ Chun, Israel thlahai chun an unau Benjamin mihai chu an lainat hle el tah a, “Vawisûn ni hin Israel thlahai laia hnam khat chu sawk an lo ni ta sih a.

⁷ A la um sunhai ta ding chun an nuhmei ding iengtin am ei thaw ding nîng a ta le? Ei naunuhmeihai hi nuhmeia inneitir dêr lo dingin LALPA hming sâlin ṭawng ei lo inkhâm ta sih a,” an tih a.

⁸ Chun, anni chun, “Israel hnam laia mi a tu hnam tak am a na Mizpaa LALPA hmaha hang inlang ve naw hi?” an tih a. Chun, pungkhâwmhai umnaa chun Jabes-gilead mi chu pakhat khawm an hung ve nawh ti an hmu tah a.

⁹ Mipui chu an hang intiem chun Jabes-gilead rama umhai chu pakhat bêk khawm an lo um ve nawh ti an hmu tah a.

¹⁰ Chun, inkhâwmhai chun mi huoisen ṭha ṭhieu sîng khat le sâng hni an tir a, thu an pêk a: “Fe unla, Jabes-gilead rama umhai chu nuhmei le naupanghai khawm va sât hlum vawng ro.

¹¹ In thaw dân ding chu hieng ang hi a nih, pasal tin le nuhmei tin, pasal zâlpui taphawt chu in sukhlum vawng ding a nih,” tiin.

¹² Chun, Jabes-gilead rama umhai lai chun nunghâk za li, pasal la pâwl ngai hleklo an hmuh a, chuonghai chu Kanaan rama an inkulna Siloa chun an hung ṭhuoi a.

¹³ Chun, inkhâwmhai po po chun mi an tir a, Rimmon lungpuia um Benjamin mihai an va biek a, an kuomah inremna thu an puong a.

¹⁴ Chu phingle chun Benjamin mihai chu an kîr tah a; chun, Jabes- gilead rama nuhmeihai an ihlahai chu an pêk a, chuong sa khawm chun an lân dai ta nawh a.

¹⁵ Chun, Israel hnamhai laiah LALPAIN insuktumna a lo siem tâk leiin mipuihai chun Benjamin mihai chu an lainat ta hleh a.

¹⁶ Chuongchun, inkhâwmhai upa- hai chun, “A la damhai nuhmei ding hi iengtin am ei thaw ding chu? Benjamin mihai laia an nuhmeihai chu sukbohmang an lo ni ta sih a,” an tih a.

¹⁷ Anni chun, “Israel hnam hi sukhmanga a um nawna dingin Benjamin mi la um sunhai hin an ta dinga rohluotu an nei ngei ding a nih.

¹⁸ Ei naunuhmeihai hlak nu- hmeiah ei inneitir thei si nawh a, Israel thlahai chun, ‘Tukhawm Benjamin mi nuhmei ding pe taphawt chu ṭawngsephurin um raw se,’ tiin ṭawng ei lo inkhâm ta sih a.

¹⁹ Nisienlakhawm, ngai ta u, Bethel hmar tieng, Bethela inthawka Sekem fena lamlien saktieng panga Lebanon sim tienga um Siloah kum tin LALPA ta dinga ruoiṭhe a um hlak kha,” an tih a.

²⁰ Chuongchun, anni chun Ben- jamin thlahai kuoma chun, “Fe unla, grêp huonah vân bi unla,

²¹ lo thlîr zing unla, Siloa nu- nghâkhai rawi lâmnaa lâm dinga an hung suok pha, grêp huona inthawk chun hung suok unla, Silo nu- nghâkhai chu mâni nuhmei ding seng man unla, Benjamin mihai ramah fe vawng el ro.

²² Chun, an pahai amanih an ṭahai amanih, sawisêl dinga kan kuoma an hung leh, an kuomah, ‘Mi lunginsiet ro khai, indonaa khan an nuhmei ding kan lo manpêk seng ta si nawh a; nangni hlaka in lo pêk naw bawk sih a, lo pe ni unla thiemnaw in hlaw ding a ni bawk sih a,’ lo tîng kan tih,” tiin thu an pêk tah a.

²³ Chun, Benjamin thlahai chun chuong ang chun an thawh a, a lâmhai laia mi chu anni zât seng nuhmeiah an man a, an fe hmangpui tah a; chun, an ram tieng chun an feh a, khawpuihai chu an chei nâwk a, chutaka chun an um tah a.

²⁴ Chu phingleh chutaka inthawk chun Israel thlahai chu mâni chi chi le mâni hnam hnamin an inhlawm hran nâwk a, chutaka inthawk chun mâni ram sengah an fe nâwk tah a.

²⁵ Chuong lai chun Israelhai lai lal hrim an um nawh a, mi tinin mâni ṭha ti zâwng sengin an thaw el a nih.