RORELTUHAI 20 - Pathien Lekhabu Inthieng (BSI)

Benjamin mihai doa an um thu

¹ Chuongchun, Israel thlahai po po chu an inthawk tâwl tah a, thukhat chelin, Dan khuoa inthawka Beer-seba chenin, Gilead rama mihai leh, Mizpaah LALPA kuomah an inkhâwm tah a.

² Chun, mi po po hotuhai, Israel chihai po po chen khawm chun Pathien mihai inkhâwmnaa chun an va ṭhang veh a, sipai kâwlhnâm chawi mi, nuoi li an nih.

³ (Benjamin thlahai chun Israel thlahai chu Mizpaa chun an hang fe ti an lo hriet a.) Chun, Israel thlahai chun, “Iengti zieha hieng anga rîtlona hi hung um am a nih a? mi hril ta u,” an tih a.

⁴ Chun, Levi chi, nuhmei an that pasal chun, “Benjamin chihai umna khuo Gibeaah ka thaikêm leh riek tumin kan lût a.

⁵ Chun, Gibea mihai chun an mi hung thaw tah a, zânah in an hung inhuol a, mi that an tum a, ka thai- kêmnu chu an sawisa hrep a, a hung thi tah a.

⁶ Chuongchun, ka thaikêm ruong chu ka lâk a, ka channâwi a, Israelhai ram hluo po poah ka thawn dar a nih. Israel rama hin thil tirdakumtak le invêtthlâktak an lo thaw ta sih a.

⁷ Nangni Israel thlahai, in rêng hin ngai ta u, in ngaidân le in remti dân chu hril ro khai,” a tih a.

⁸ Chuongchun, mipui po po chu thukhat chelin an tho ṭhuop a, “Tukhawm mâni puon in tieng fe nâwm ei nih, tukhawm mâni ina khawm lût naw bawk ei tiu.

⁹ Gibea mihai ei thaw dân ding chu hieng ang hi a nih:

¹⁰ ai sân ei ta, Israelhai chunga thil indik nawtak an thaw ang peia an thawh a, Gibea hmuna Benjamin mihai ei hang thawnaa mipuihai fâk ding lo inhlântu dingin Israel hnam po po laia mi za khatah sâwm pei, sâng khatah za pei, sîng khatah sâng pei thlang suok ei tih,” an tih a.

¹¹ Chuongchun, Israel mihai po po chu chu khawpui thaw ding chun, mi pakhat anga insuikhawmin, an pungkhâwm tah a.

¹² Chun, Israel hnamhai chun Benjamin hnamhai po po kuoma chun, “Nangni laia hieng anga rîtlona hung um el ta hi iengtizie am a nih a?

¹³ Gibeaa Belial nauhai chu hung ṭhuoi ro, chuongchun, Israel rama suol hi a re theina dingin lo sukhlum kan tih,” tiin mi an tir a. Nisien- lakhawm, Benjamin chihai chun an unau Israel thlahai thuhril chu an lo pawm nuom nawh a.

¹⁴ Benjamin thlahai chu Israel thlahai chu do dingin khawpuia inthawk dâmin an hung suok tâwl a, Gibeaa chun an lût tâwl a.

¹⁵ Chun, chu nia Benjamin thlahai khawpuia inthawka kâwlhnâm chawia suokhai chu, Gibeaa mi za sari thlang ṭhieu tiemsa loin, mi sîng hni le sâng ruk an nih.

¹⁶ Chuong po po lai chun vawi- kawlawng thlang ṭhieu za sari an um a, an rêng chun vailungdênga sam- zai ruol khawm ṭhel hlek lo mi an nih.

¹⁷ Chun, Israel mihai chu Benjamin mihai tiem loin, kâwlhnâm chawi mi ṭhieu nuoi li an nih, chuong- hai po po chu indo mi vawng an nih.

¹⁸ Chun, Israel thlahai chu an tho a, Bethelah an hang feh a, Pathien an hang rawn a, “Benjamin thlahai chu tu am a na hang thaw hmasa ding?” an tih a. LALPA chun, “Judahai hang fe hmasa raw se,” a tih a.

¹⁹ Chuongchun, Israel thlahai chu zîngkâr an tho a, Gibea chu an hang inhuol a.

²⁰ Chun, Israel mihai chu Ben- jamin mihai thaw ding chun an inthawk a, anni thawna dingin Israel mihai chun Gibeaah ṭhanghmun an hang siem a.

²¹ Benjamin thlahai chu Gibea khuoa inthawk chun an hung suok a, chu ni chun Israel mihai lai chun mi sîng hni le sâng hni an hung that tah a.

²² Chun, mipui, Israel mihai chu an hang infui tuo nâwk a, an thaw phut nia an thawna hmuna bawk chun thaw dingin ṭhang an hang siem nâwk a.

²³ (Chun, Israel thlahai chu an hang feh a, Pathien hmaah zântieng chenin an hang ṭap a, “Kan unau Benjamin thlahai hi do dingin kan hang inthawk nâwk ding am a nih?” tiin LALPA an indawn a. LALPA chun, “Hang thaw nâwk ro,” a tih a).

²⁴ Chun a ni hni niin Israel thlahai chun Benjamin thlahai chu an hang hnai a.

²⁵ Benjamin mihai khawm chu a ni hni ni chun thaw dingin Gibeaa inthawk chu an suok veh a, Israel thlahai lai chun sîng khat le sâng riet an hung that nâwk a, chuonghai po po chu kâwlhnâm chawi mi an nih.

²⁶ Chuongchun, Israel thlahai po po le mipuihai po po chu an hang feh a, Bethela chun an hang feh a; an ṭap a. LALPA hmaah an ṭhung a; chu ni chun zântieng chenin bu an nghei a; LALPA kuomah pumrawhmang thilinhlân le inremna thilinhlânhai an inhlân a.

²⁷ Chun, Israel thlahai chun LALPA an râwn a, (chuong lai chun chutaka chun Pathien Thuthlung bâwm chu a um a;

²⁸ chun, chuong lai chun Aron naupa Eleazar naupa Phinehas chun a rawng a bâwl hlak a nih.) “Kan unau Benjamin thlahai chu kan hang thaw nâwk ding am, kan tâwpsan el ta ding?” tiin. LALPA chun, “Hang fe ro, zînga chu chu in kutah ka pêk ta ding a nih,” tiin a dawn a.

²⁹ Chun, Israelhai chun Gibea khuo vêla chun inchântu an insie rûk a.

³⁰ Chun, Israel thlahai chu Benjamin thlahai chu do dingin a ni thum ni chun an hang inthawk nâwk a, ni dang ang bawk khan Gibea khuo thaw ding chun ṭhang an hang siem nâwk a.

³¹ Benjamin thlahai chu mihai chu do dingin an va suok a, khuo chu an suoksan a, chuongchun, ni dang ang bawk khan mihai chu thawin an that ṭan nâwk a, phûl faiah Bethel khuo hang fena le Gibea khuo lampuihaia chun Israelhai chu sâwmthum an that a.

³² Benjamin thlahai chun, “A hma ang bawk khan, ei hmaah an tlâwm nâwk ta le,” an tih a. Israel thlahai ruok chun, “Tlân ei tiu khai, khaw- puia inthawk hi lamlienah intâwl- dawktir ei tiu,” an tih a.

³³ Chuongchun, Israelhai po po chun an ṭhanghmun chu an suoksan a, Baal-tamar hmunah ṭhanghmun an siem a; chun, lo inchânrutu Israel- hai kha an ṭhanghmun Maare-geba hmuna inthawkin an hung suok a.

³⁴ Chun, Israel mihai laia thlang ṭhieu sîng khatin Gibea khuo chu an thawh a, an inthaw chu a nasa hle el a, nisienlakhawm, anni chun an chan a se ngei ding a nih ti an hriet nawh.

³⁵ LALPAIN Benjamin mihai chu Israelhai hmaa chun a sukhlum ṭeu a; Israel thlahai chun chu ni chun Benjamin mi sîng hni le sâng nga le za khat an that a, chuonghai po po chu kâwlhnâm chawi mi vawng an nih.

³⁶ Chuongchun, Benjamin mihai chun an tlâwm an tah ti an inhriet tah a, Israel thlahai chun Gibea khuo thaw dinga inrûka inchântuhai an sie kha an ringzo leiin Benjamin mihai an hang hnungintawl san a nih.

³⁷ Chun, inrûka inchântuhai chun Gibea khuo chu an baw ta thut a, inrûka inchântuhai chu an inzar dar a, khuoha mihai po po chu kâwl- hnâmin an thaw ta rak el a.

³⁸ Israel mihai le inrûka inchân- tuhai kha an intiemna chu khawpui sûnga mei sukkhûk lui lui phaleh

³⁹ Israel mihai chun indona chu thaw ṭan ve ding ti a nih. Benjamin mihai chun an hang thaw ṭan a, Israel mihai chu sâwmthum lai an that a, “Ei inthaw phut ni ang bawk khan an tlâwm nâwk ta ngei el le,” an tih a.

⁴⁰ Nisienlakhawm, khawpui sûng- a chun meikhu chu a hung intung ta lui phingleh, Benjamin mihai chu an hei nghaleh a, khawpui chu a puma vân tienga khu tung ta lui lui el chu an hei hmuh a.

⁴¹ Chun, Israel mihai chu an hung inher nâwk tah a, Benjamin mihai chu an lunginzîng ta hleh a, an chan a se ding a nih ti an hriet ta leiin.

⁴² Chuleiin, Israelhai hmaa chun thlalêr tieng ân tlânse tah a; nisien- lakhawm, an hnawtzui ta ngat ngat a, khawpuia inthawka hung suokhai chun chutaka chun an sukhlum a.

⁴³ Benjamin mihai chu an inhuol ta tlat a, an hnawt a, nisa suokna tieng Gibea dep an châwlna hmunah an hnawt phâk a.

⁴⁴ Benjamin mihai chu mi sîng khat le sâng riet an thih a, an rêng el chun mi hrât huoisen ṭhieu an nih.

⁴⁵ Chun, an intâwl a, thlalêr tieng Rimmon lungpuiah an tlânseh a; mi sâng nga chu lamlienhaia chun an that a, Gidom chenin an hnawt- zui ngat ngat a, mi sâng hni an that a.

⁴⁶ Chuongchun, chu niha Benja- min mi thihai po chu kâwlhnâm chawi mi ṭhieu sîng hni le sâng nga an nih, an rêng chun mi hrât huoisen an nih.

⁴⁷ Mi za ruk ruok chu thlalêr tieng Rimmon lungpuiah an tlânseh a, chu Rimmon lungpuia chun thla li an um a.

⁴⁸ Chun, Israelhai chu Benjamin thlahai chunga chun an inthawk nâwk a, khawpui sûnga mi taphawt chu ranhai an hmu taphawt khawm kâwlhnâmin an sât hlum pei a; chu nawa khawm khuo an hmu taphawt chu an raw pei a.