RORELTUHAI 19 - Pathien Lekhabu Inthieng (BSI)Levi mi le a thaikêm chanchin 1 Chuong laia Israel rama lal um naw lai chun Levi chi, mi pakhat hi Ephraim tlâng ram tâwp tieng chun a um a; Juda rama Bethlehema mi thaikêmin a nei a. 2 A thaikêm chun a uiretsan a, chuongchun, Juda ram Bethlehemah a pa kuomah a tlânsan a, chutaka chun thla li zet a um a. 3 Chun, a pasal chu a tho a, a siehlaw le sabengtung pahni ṭhuoiin va thlêma lungâwitaka ṭhuoi kîr nâwk tumin a va hnawt a. Ama chun a pa ina chun a lo ṭhuoi lût a. Nunghâk pa chun ama a lo hmuin a lo lâwm hle el a. 4 Chun, a tarpupa, nunghâk pa chun a kuoma um dingin a lo thlo a, a kuoma chun ni thum a um a, an fâkin an dâwn tlâng a, chutaka chun a riek a. 5 A ni li ni chun zingkâr inhmatak- in an tho a, ama chu fe dingin an singsah a; nisienlakhawm, nunghâk pa chun a mâkpa kuoma chun, “Bei tlâwmte bêk fain i lungril insukhar phawt ta la, chu hnunga chun i la fe ding an nawm,” a tih a. 6 Chuongchun, a ṭhung a, an pahni chun an fâkin an dâwn tlâng a; chun, nunghâk pa chun mi kuoma chun, “Lungawitakin riek hrâm raw khai, i lungril chu hlimtakin um raw se,” a tih a. 7 Mi chu fe tuma a hang tho chun, a tarpupa chun a thlêm a, chuong- chun, a riek nâwk tah a. 8 A ni nga ni zîngkâr chun fe tumin inhmatakin a tho a, chun nunghâk pa chun, “I lungril sukhar hri phawt la tie, zântieng nisa innêm hun chen bêk chu um hri raw khai,” a tih a. Chun, an pahniin bu an fâk nâwk tah a. 9 Chun, mi chu a thaikêm le a siehlaw leh suok tuma an hang tho chun, a tarpupa, nunghâk pa chun a kuomah, “En ta, hi khuo khawm ân hnu tah a, vawizân chu riek nâwk hrâm el raw khai. En ta, khuo khawm ân thim hnai el ta hi, hitaka hin riek nâwk la, i lungril khawm hlimtakin um raw se; chun, zingah zîngkâr tho i ta, fe de ti nih,” a tih a. 10 Nisienlakhawm, ama chun chu zân chun riek a nuom ta nawh a, a tho a, a suok tah a, Jebus khaw zâwn a va tlung a (chu chu Jerusalem khuo a nih), sabengtung pahni inthuom sa a ṭhuoi a, a thaikêm khawm chu a ṭhang veh a. 11 Jebus khaw kâwl an tlung chun khuo an hnu hle tah a; chun, siehlaw chun a pu kuomah, “Hung rawh, hi Jebus mihai khawpuia hin lût ei tiu a, riek el ei tiu khai,” a tih a. 12 A pu chun a kuomah, “Israel thlahai ni si lo hnam khuoa chun lût lo e a, Gibea khuo tieng pan pei lem ei tiu,” a tih a. 13 Chun, a siehlaw kuomah, “Hung rawh, hieng khuo laia pakhat hi pan ei tih. Gibea khuoa manih Rama khuoa manih ei riek ding annawm,” a tih a. 14 Chuongchun, a fe nâwk ta pei a, Benjamin mihai Gibea khaw kâwl an tlung chun nisa a tla tah a. 15 Chun, Gibea khuoa riek ding chun an lût tah a; a lût a, chu khaw- pui khawlaidunga chun a ṭhung a, tukhawm ama intlungtir an um si nawh a. 16 Chun, ngai ta, tar pakhat hi zântieng chun a lo fe a hung a, ama chu Ephraim tlâng rama mi a nih. Gibeaa chun a va um vak a nih, chutaka mihai ruok chu Benjamin mihai an nih. 17 Chun, a hang nghah a, khaw- laia mikhuolpa chu a hang hmu chun, tarpa chun, “Khâwlaia fe ding am i nih a? Khâwtaka inthawka hung am i nih a?” a tih a. 18 Ama chun, a kuomah, “Juda ram Bethlehema inthawk Ephraim tlâng ram tâwp tienga fe tum ka nih; chutaka um chu ka nih a, Juda ram Bethlehemah ka va feh a, tuhin LALPA inah fe ka tum a nih; tu- khawm a mîn tlungtir an um nawha a nih. 19 Ka sabengtung ta ding lem chun bupâwl le ran bu khawm kan nei a; chun, kei le i suoknu le i siehlawhai kuoma um ve tlangvâl ta ding khawm hin bei le uoin a um bawk a, ieng- khawm tlâksam chu kan nei dêr nawh,” a tih a. 20 Chun, tarpa chun, “Thlamuong- takin um raw khai, i mamaw po po chu keiin tum vawng ka tih, khawlaia chun chu riek lul naw rawh,” a tih a. 21 Chuongchun, a inah a ṭhuoi lût a, sabengtunghai chu bu a pêk a; chun, an kehai dâm an sâwp a, an fâkin an dâwn tah a. 22 Chuong anga hlim le lâwmtaka an um lai chun, ngai ta, chu khuoa mi Belial naupasal ṭhenkhathai chun in chu an hung inhuol tah a, kawtkhâr chu an hung suk dawt dawt a, in neitupa, tarpa kuoma chun, “I ina hung tlungpa kha hung ṭhuoi suok rawh, lo pâwl kan tih,” an tih a. 23 Chun, in neitupa chu a va suok a, an kuoma chun, “Ni lo e, ka unauhai, chuong ang êma suol chu thaw lul naw ro khai, ama hi ka mikhuol a ni hi, hieng anga thil invêtthlâktak hi chu thaw lo e a. 24 En ta u, hitaka hin ka naunu nunghâk le a thaikêm an um a, anni chu hung ṭhuoi suok ka ta, anni chu tlâwm unla, ṭha in ti ang phawtin an chungah thaw de ti niu, ama chunga ruok hin chu chuong ang thil invêtthlâk chu thaw naw ro,” a tih a. 25 Amiruokchu, chuonghai chun a thu an pawm nuom nawh a; chuong- chun, mi chun a thaikêm chu a man a, an kuoma chun a va ṭhuoi suok tah a; chun, anni chun an lo pâwl a, khaw- var hmakhat chun zânkhawvârin an lo sawisa hrep a; khuo a hung var phingle chun an insuo tah a. 26 Khuo a hung var phingle chun nuhmei chu a feh a, a hotupa tlunginpa kawtkhâr bula chun a tlu dêr a, khaw- var hnung chenin a um ta zing a. 27 Chun, a hotupa chu zîngkâr chun a hung tho a, kawtkhârhai chu a hei hawng a, fe tumin a va suok chun, a thaikêm chu a kuthai kaiṭên chunga inbânga lo tlu dêr el chu a hmuh a. 28 Ama chun, “Tho rawh, fêng ei tih,” a hang tih a; nisienlakhawm, a dawn ta dêr nawh a. Chuongchun, sabengtung chunga chun a siekai a; a tho a, a in tieng chun a fe tah a. 29 Chun, a in a va tlung chun chemtê a lâk a, a thaikêm chu a ru pumin hmun sâwm le hmun hniah a channawi a, Israel ram po poah a thawn dar a. 30 A lo hmu taphawt chun, “Israel thlahai Aigupta rama inthawka an hung suok chinah hieng ang thil hrim hrim hi a la um ngai nawh a, hmu khawm a ni ngai dêr nawh; ngaituo unla, inrâwn unla, hril ta u,” an tih a. |
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
Bible Society of India