RORELTUHAI 17 - Pathien Lekhabu Inthieng (BSI)

Mika milim biek

¹ Ephraim tlâng rama chun mi pakhat a um a, a hming chu Mika a nih.

² Ama chun a nu kuomah, “Tangka sâng khat le za khat an inrûkpêk cheh a, nang khawma ṭawngsie in- phura, ka na hriet ngeia i hril kha, en ta, kha tangka kha ka kuomah a um a, keia lâk a ni kha,” a tih a. A nu chun, “Ka naupa chu LALPA mal- sâwmin um raw se,” a tih a.

³ Chun, tangka sâng khat le za khat chu a nu a pêk nâwk a; chun, a nu chun, “Hi tangka hi keima kut ngeiin, ka naupa puola milim siemna ding le milim sungna dingin LALPA kuomah kân hlân a nih, chuleiin, tuhin ka pêk nâwk ding che a nih,” a tih a.

⁴ Chun, tangka chu a nu a hang pêk chun a nu chun tangka za hni chu a lâk a, tangkaraw suttu kuomah a pêk a, ama chun milimin a lo siem a, milimin a lo sung tah a, chu chu Mika ina chun a um a.

⁵ Chun, Mika chun pathienhaiah a nei a, zakawsîng le milimhai a siem a, a naupa pakhat chu a thiempu dingin a suktum tah a.

⁶ Chuong lai huna chun Israel ramah lal an um nawh a, mâni sengin ṭha an ti zâwng zâwngin an thaw el a nih.

⁷ Chun, Bethlehem-judaa mi Juda hnam, Levi chi tlangvâl pakhat a um a, chutaka chun a va um ve vak a.

⁸ Ama chu Bethlehem-juda khaw- puia inthawka suok a, umna zawnga invâk a nih a, chuonga ân vâknaa chun Ephraim tlâng rama Mika in chu a va tlung tah a.

⁹ Mika chun a kuomah, “khâwtaka inthawka hung am i nih a?” a lo tih a. Ama chun a kuomah, “Bethlehem- judaa inthawkin, Levi chi ka nih a, umna ding zawnga invâk ka nih,” a tih a.

¹⁰ Mika chun a kuomah, “Ka kuoma hin um el ta la, ka pa ding le thiempu dingin um la, kum tinin tangkaruo tlang sâwm pêng ka ti cheh a, silfên sil khat le i fâk dinghai khawm,” a tih a.

¹¹ Chuongchun, Levi chi chu a lût tah a, Levi chi chun ama kuoma um chu a remti tah a, chuongchun, chu tlangvâl chu a naupa pakhatah a um tah a.

¹² Chun, Mika chun Levi chi chu a suktum tah a, chuongchun, tlangvâl chu a thiempuah a hung um a, Mika ina chun a um tah a.

¹³ Chuongchun, Mika chun, “Tu zet hin chu Levi chi ka thiempu dingin ka nei ta sih a, LALPA chun mi suktluongtlung ngei a tih ti ka hriet,” a ti tah a.