RORELTUHAI 16 - Pathien Lekhabu Inthieng (BSI)

Gazaa Samson chanchin

¹ Samson chu Gazaah a feh a, chutaka chun nawchizawr hi a hmuh a, a kuomah a lût tah a.

² Chun, “Samson chu hitaka hin a hung ie,” tiin Gaza mihai chu an hril a. Chuongchun, an inhuol tah a, khawpui kul kawtkhâra chun zân- khawvâr an inchân a, zânkhawvâr chun an to ṭhiep a, “Khuo hung var phawt phawt sien, chuongchun, ei that ding annâwm,” an tih a.

³ Nisienlakhawm, Samson chu zânril chenin a zâl a, zânril lai chun a tho a, khawpui kul kawtkhârhai le a ban pahni chu a chel a, a kilnahai chen a phawidawk vawng a, a liengkoin a put a, Hebron zâwn tlâng sîp chenin a hang put kai a.

Samson le Delila chanchin

⁴ A nakie deu chun Sorek ruoma mi nuhmei pakhat a dit zâwng tah a, a hming chu Delila a nih.

⁵ Chun, Philistin mihai mi lienhai chu a kuoma chun an hang feh a, a kuomah, “Ama chu kan hneh a, khuopa kan sawisak theina dingin a hrâtna san hi hriet tumin zâwr raw khai, chuongchun, kan rêng hin tangka sâng khat le za khat pe seng kan ti che,” an tih a.

⁶ Chuongchun, Delila chun Sam- son kuoma chun, “I hrât hlena san hi mi hril raw khai, iengtin am sawisak dinga khuop thei ning i tih a?” a tih a.

⁷ Samson chun a kuomah, “Thal- hrui thar la ṭâwl lo pasariin mi khuop sienla, chuongchun, hrât naw ning a, mi dang ang el bawk nîng ka tih,” a tih a.

⁸ Chun, Philistin mi mi lienhai chun thalhrui thar pasari la ṭâwl hlek lohai chu an pêk a, chuonghai chun a khuop tah a, Pindan sûng rilah inchânrutuhai an sieh a.

⁹ Chun, a kuomah, “Samson, Phi- listin mihaiin an hung thaw ding che a nih ie,” a tih a. Chun, thalhruihai chu meiin ziza hrui pawn a kâng tan ang el hin a suktan tah a. Chuong- chun, a hrâtna san chu hriet a ni nawh a.

¹⁰ Chun, Delila chun Samson kuomah, “Ngai ta, i mi hlêm a, khêl i mi hril a nih, ieng anga khuop thei am i ni ding a na mi hril ta raw khai,” a tih a.

¹¹ “Hruihruol thar la hmang hlek loin mi khuop hai sienla, chuong- chun, hrât ta naw ning a, mi dang ang el bawk nîng ka tih,” a tih a.

¹² Chuongchun, Delila chun hrui- hruol thar a lâk a, a khuop tah a; chun, a kuomah, “Samson, Philistin mihaiin an hung thaw ding che a nih ie,” a tih a. Pindan sûng rila chun ân chânrutuhai kha an um a. Chun, a kut khuopna chu patzai suktan ang elin a hang suktan tah a.

¹³ Chun, Delila chun Samson kuomah, “I mi la hlêmin, khêl i mi la hril ta rawp a ni hi, ieng anga khuop thei ding am i nih a, mi hril raw khai,” a tih a. Ama chun, “ka sam phier sari hi puonah khâwng sa la, kilnain kildet la; chuongchun, hrât ta naw ning a, mi dang ang bawk ni el ka tih,” tiin a dawn a.

¹⁴ Chuongchun, a sam phier sari chu puonah a khâwng sah a, kilnain a kilde tlat a, a kuomah, “Samson, Philistin mihaiin an hung thaw ding che a nih ie,” a tih a. Chuongchun, a in chu a hung har a, puonkawl kildena chu a kawl le a pat pumin a keidawk ta vawng el a.

¹⁵ Chun, a kuomah, “I lungril hi i mi pêk hlek si nawh a, iengtizieha, ‘Ka hmangai che,’ ti thei am i ni leh? Hi ṭum thum rau i mi hlêmna i suklang tah a nih a, i hrât vieuna san hi i mi la hril dêr da el a” a tih a.

¹⁶ Chuonga ni tin ela a mawr rak a, a ngên tlut tlut leiin, thina khawp rauin a lungvar a hung lunginzîng tah a.

¹⁷ Chuongchun, a lungril po po chu a hril ta vawng a, a kuomah, “Ka lua hin bakmêt chem hrim ruoi a la ni ngai nawh a, ka nu sula ka um laia inthawka Pathien ta dinga Nazarit mia hung um ka nih a, tuhin hung invaw ta lang chu ka hrâtna chu bo vawng el a tih; chuongchun, hung hrât nâwng ka ta, mi dang ang bawk hung ni el ka tih,” a tih a.

¹⁸ A lungril po po chu a hril vawng an tah ti Delila chun a hriet phingleh Philistin mihai mi lienhai chu, “La hung nâwk phawt ta u, a lungril po po chu a mi hril vawng a ni tah,” tiin ân cha tâwl tah a. Chuongchun, Philistin mihai mi lienhai chu a kuoma chun an hang feh a, tangka chu an chawi a.

¹⁹ Chun, a mal chungah a in innghiltir a, chun pasal a ko a, a sam phier sari chu ân âttantir ta vawng a, a sawisa ṭan tah a; chuongchun, a hrâtna chu a hung bo vawng el tah a.

²⁰ Chun, “Samson, Philistin mi- haiin an hung thaw ding che a nih ie,” a hang tih a: chun, a in chu a hang har a, “Ni dang ang bawk khan suok nâwk el ka ta, intleng suok nâwk el naw ning am,” a tih a, LALPAIN a mâksan tah ti hrim a hriet nawh a.

²¹ Chun, Philistin mihai chun an man a, a mit an kheldawkpêk a, Gaza khuoah an fe thlâkpui a, dâr kawlhai an inbuntir a, lung inah bu a râwt nawi hlak a.

²² Nisienlakhawm, a lu vâw kha a lua sam chu a hung sei nâwk tah a.

Samson thi thu

²³ Chun, Philistin mihai mi lien- hai chu an pathien Dagon kuoma inthâwina ropuitak inhlân ding le insukhlim dingin an pung khâwm tâwl a, “Ei pathienin ei hmêlmapa Samson a mi pêk tah annâwm,” an tih a.

²⁴ Chun, mipuihai chun an hang hmu chun an pathien chu an inpâk a, “Ei pathienin ei hmêlmapa le ei ram suksetu, mi tamtak mi thattupa chu ei kutah a mi pêk tah annâwm,” an tih a.

²⁵ Chuonga an lungril a hlim lai tak chun, “Samson kha ennuom ding- in hung ko ta u,” an tih a. Chuong- chun, Samson chu lung ina inthawk chun an va ko suok a, chun an hmaa chun ennuomah a um tah a, ban le ban inkâra hin an inngîrtir a,

²⁶ Chun, Samson chu ama keitu naupang kuoma chun, “Hi in dotu ban hi mi hang inthemtir ta, hang innghai ka tih ie,” a tih a.

²⁷ Chu in chu nuhmei le pasalin an sip mup el a; Philistin mihai mi lienhai po po chu chutaka chun an um vawng a, chun Samson ennuoma thlîrtuhai chu in chunga chun pasal le nuhmei sâng thum lai an um a.

²⁸ Chun, Samson chun LALPA a ko a, “Aw Lalpa PATHIEN, ka hni che hi, mi hung hre zing la, ka hni che hi, tuta ṭuma chau bêk hin mi hung sukhrât la, aw Pathien, ka mit khing hni phuba hi Philistin mihai chunga hin hang la vak ka tih,” a tih a.

²⁹ Chun, Samson chun chu in dotuhai tak, sût pahni chu a hei them a, a kut changtiengin pakhat chu a ringsan a, a kut vawitiengin pakhat.

³⁰ Chun, Samson chun, “Philistin mihai hi hang thichil ka tih a,” a tih a. Chuongchun, a theitâwpin a kûn rak a; chun, mi lienhai le mipui a sûnga umhai po po chu in chun a del tah a. Chuongchun, a dam laia a suk- hlumhai nêk chun a thichilhai chu an tam lem a.

³¹ Chun, a unauhai le a pa sûnghai po po chu an hung suok a, an lâk a, an hang zâwn a, Zora le Estaol inkâra a pa Manoa phûmna hmunah an phûm tah a. Chuongchun, kum sâwmhni Israelhai chungah ro a rêl a nih.