RORELTUHAI 14 - Pathien Lekhabu Inthieng (BSI)

Samson le Timnaa nuhmei chanchin

¹ Samson chu Timna khuoah a zu feh a, Timnaa chun Philis- tin mihai naunuhmeihai laia mi nuhmei pakhat hi a zu hmuh a.

² A hung nâwk chun a nu le pa chu a hril a, “Timna khuoah Philistin mihai naunuhai laia mi nuhmei pakhat ka hmuh a, ka nuhmei dingin mi neipêk ro,” a tih a.

³ A nu le pa ruok chun a kuomah, “I unauhai naunuhmeihai laia manih, ei chihai po po laia hin amanih nuhmei an um dêr naw nîng a ti maw, Philistin mi, sertanlohai laia nuhmei ding i zu zawng el chu?” an tih a. Samson ruok chun a pa kuomah, “Mi neipêk el rawh, ka dit êm i sawn- nâwm ie,” a tih a.

⁴ Nisienlakhawm, a nu le pa chun, chu chu LALPA thaw a nih ti an hriet nawh a; Philistin mihai chunga remchâng a zawng a ni sih a. Chuong lai chun Philistin mihai chun Israel mihai chungah ro an rêl a.

⁵ Chuongchun, Samson chu a nu le pa le chun Timnaa chun an zu feh a, Timnaa grêp huon hi an zu tlung a; chun, ngai ta, sakeibaknei vânglai hin a lo inrûm khum a.

⁶ Chun, LALPA thlarau chu a chungah nasatakin a hung tlung a, chuongchun, kêlte kei nâwi takin a kei nawi el tah a, iengkhawm a chawi si nawh a; nisienlakhawm, a thil thaw chu a nu le pa chu a hril nawh.

⁷ Chun, a zu feh a, nuhmei chu a zûn biekpui a, Samson chun a dit hle el a.

⁸ Chun, a nakie deu chun zu nei tumin a zu fe nâwk a, sakeibaknei ruong kha en tumin a va pêt a; chun, sakeibaknei taksaa khuoi lo um mur mur le a zu khawm lo um chu a hmuh a.

⁹ Chu chu a lâk a, a fe nâwk tah a, fe malam chun a fâk pei a; chun, a nu le pa kuom chu a hang tlung a, anni khawm a pêk veh a; anni khawm chun an fâk a, amiruokchu, khuoizu chu sakeibaknei taksaa inthawka a lâk a nih ti iengkhawm a hril nawh a.

¹⁰ Chun, a pa chu nuhmei kuoma chun a zu feh a; chun, chutaka chun Samson chun ruoi a ṭheh a, chu chu tlângvâlhai thaw dân hrim a nih a.

¹¹ Chun, mipuiin ama chu an hmu phingleh a kuoma um ve dingin ruol- hai sâwmthum a ṭhuoi a.

¹² Chun, Samsonin an kuomah, “Tuhin thukhir indawn ka ti cheu le; ruoiṭhe ni, ni sari sûnga in mi hrilfie theia in hriet suok thei chun puon zai inhmi sil sâwmthum le inthlengna puon sâwmthum pêng ka ti cheu;

¹³ amiruokchu, in mi hrilfie thei naw chun, puon zai inhmi sil sâwm- thum le inthlengna puon sâwmthum in mi pêk ding a nih,” a tih a. Anni chun a kuomah, “I thukhir chu hang hril ta la, lo ngai kan tih,” an tih a.

¹⁴ Chun ama chun an kuomah, “Fatua inthawka fâk ding hung suok a, Hrâttaka inthawka thlumtak hung suok, ti hi,” a tih a. Chun, ni thum sûng chun chu thukhir chu an hrilfie thei ta nawh a.

¹⁵ A ni sari ni chun Samson nuhmei kuoma chun, “I pasal hi hi thukhir hi mi hrilfie dingin thlêm rawh, chuong naw chun nang le i pa sûnghai hi kan raw el ding a nih, mi sukrethei dingin a ni maw in mi fiel? A nih ni lo am a nih?” an tih a.

¹⁶ Chuongchun, Samson nuhmei chu a hmaa chun a ṭap a, “Mi hmangai loin i mi theida a lo ni lem hi tie: ka chihai chu thukhir în dawn a, kei hlak i mi hrilfie ve si nawh a,” a tih a. Ama chun a kuomah, “Ngai ta, ka nu le ka pa khawm ka hril nawh a, nang ka hril ding che maw?” a tih a.

¹⁷ Chun, a ruoiṭhe, ni sari sûng po chu a hmaah a ṭap a ṭap el a, chun a ni sari ni chun a ngên tlut tlut el leiin a hril ta khawng khawng a; chun, ama chun thukhir chu a chihai chu a hril ve tah a.

¹⁸ Chun, a ni sari ni, nisa tlâk hmain chu khuoa mihai chun a kuomah, “Khuoizu nêka thlum lem ieng am a ni a le? Sakeibaknei nêka hrât lem ieng am a nih a le?” an tih a. Ama chun an kuomah, “Ka bâwngla hin hnuoi inlet naw unla chu, Ka thukhir hi in hriet suok dêr naw ding bah,” a tih a.

¹⁹ Chun, LALPA thlarau chu a chungah nasatakin a hung tlung a, chun Askelonah a zu feh a, chu khuoa mi sâwmthum a that a, an thuom a hlîppêk a, inthlengna puonhai chu thukhir hrilfietuhai chu a pêk tah a. Lungsen êm êmin a pa in tieng a kîr nâwk tah a.

²⁰ Chun, Samson nuhmei chu inneinaa ṭhien dinga a hmang, a ruolpa kha an lo pêk tah a.