RORELTUHAI 13 - Pathien Lekhabu Inthieng (BSI)

Samson pieng thu

¹ Israel thlahai chun LALPA mithmua thil suol an thaw nâwk tah a, chuongchun, LALPAIN anni chu Philistin mihai kutah kum sâwmli ân umtir a.

² Chun, Zora khuoa Dan hnam mi pakhat a um a; a hming chu Manoa a nih, a nuhmei chu a ching a, nau hrim a nei nawh a.

³ Chun, LALPA vântirko a nuhmei kuoma chun a hung inlâr a, a kuom- ah, “Ngai ta khai, i ching a, nau hrim i la vawn ngai nawh a, nisienlakhawm, inrai i ta, naupasal nei i tih.

⁴ Chuongchun, fîmkhur raw khai, uoin le zu hrim dâwn naw la, fâk thienglo hrim khawm fa dêr naw rawh;

⁵ ngai ta, inrai i ta, naupasal i nei ding a ni sih a, a lua chun bakmêt chem hrim ruoi ni naw nih a, naupang chu sula a um laia inthawkin Pathien ta dinga Nazarit mi a ni ding a ni sih a, ama chun Israel mihai hi Philistin mihai kuta inthawk chun sansuok ṭan a tih,” a tih a.

⁶ Chun, nuhmei chun a pasal kuomah, “Pathien mi mi pakhat ka kuomah a hung a, a hmêl chu vântirko hmêl ang ṭiumtak a nih, khâwtienga mi am a ni kân dawn ta chuong nawh a, ama chun a hming hlak a mi hril naw bawk a;

⁷ amiruokchu, ka kuomah, ‘Ngai ta, inrai i ta, naupasal nei i tih, chuongchun, uoin le zu hrim dâwn naw la, fâk thieng lo thil hrim khawm fa dêr naw rawh, naupang chu sula a um laia inthawka a thi chenin Pathien ta dinga Nazarit mi a ni ding a ni sih a,’ a tih a,” tiin a hril a.

⁸ Chun, Manoain LALPA kuomah a ngên ta rak a, a kuomah, “Aw LALPA, ka hni che, Pathien mi i hung tir kha kan kuomah hung nâwk sienla, naupang hung pieng ding chu ieng tin am a na kan thaw ding mi hung inchûktir raw se,” a tih a.

⁹ Pathienin Manoa thuhril chu a lo ngai a, chun, nuhmei chu phûla a ṭhung laiin Pathien vântirko chu a kuomah a hung nâwk a, a pasal Manoa ruok chu a kuoma chun a um ve nawh a.

¹⁰ Chun nuhmei chu inhmâwtakin a tlân tah a, a pasal chu a va hril a, a kuomah, “Ngai ta, ni khat nia ka kuoma hung bawk kha, ka kuomah a hung inlâr nâwk tah,” a tih a.

¹¹ Manoa chu a tho a, a nuhmei chu a zui a, ama kuom chu a va tlung a, a kuomah, “Nang hi i ni maw nuhmei kuoma thuhriltu chu?” a tih a. Ama chun, “Ka nih,” a tih a.

¹² Chun, Manoa chun, “I thu ang pei chun hung tlung raw se, naupang umdân ding chu iengtin am nîng a ta, ieng am nîng a ta a thaw ding chu?” a tih a.

¹³ LALPA vântirko chun Manoa kuomah, “Nuhmei kuoma ka hrilhai po po kha ngaituo ṭha el raw se,

¹⁴ Grep hruia inthawk hrim hrim chu a fâk ding a ni nawh a; uoin le zu hrim khawm a dâwn ding a ni nawh, fâk thienglo thil hrim khawm a fâk ding a ni nawh; thu ka ipêk ta po po kha vawngṭha raw se,” a tih a.

¹⁵ Chun, Manoain LALPA vântir- ko kuoma chun, “Ka ngên che a nih, kan thlo hri che a nih, kêlte hang buotsaipêk phawt kan ti che,” a tih a.

¹⁶ LALPA vântirko chun Manoa kuomah, “Mi thlo la khawm i bu chu chu fa naw ning, chun, pumraw- hmang thilinhlân dinga buotsai i ni ruok chun, LALPA kuomah în hlân ding a nih,” a tih a. Manoa chun ama chu LALPA vântirko a nih ti a hriet si nawh a.

¹⁷ Manoa bawk chun LALPA vân- tirko kuoma chun, “Ieng am i hming, i thuhril ang ngeia a hung tlung pha kan chawimawi theina ding chein?” a tih a.

¹⁸ LALPA vântirko chun a kuom- ah, “Iengdinga ka hming i min dawn am? Hril mi a ni dêr nawh,” a tih a.

¹⁹ Chun, Manoa chun kêlte chu fâk ding thilinhlân leh a lâk a, lungpui chungah LALPA kuomah ân hlân a; chun, vântirko chun thil maktak a thaw tah a, Manoa le a nuhmei chun an thlîr zing a.

²⁰ Mâichâma inthawka meichawk chu vântieng ân tung lai chun LALPA vântirko chu mâichâma meichawka chun a tungin a fe tah a; Manoa le a nuhmei chun an thlîr zing a, hnuoia chun an bawkkhup dêr el tah a.

²¹ Amiruokchu, LALPA vântirko chu Manoa le a nuhmei kuoma chun a hung inlâr nâwk ta nawh a. Chuong- chun, Manoa chun LALPA vântirko a nih ti a hriet tah a.

²² Chun, Manoa chun, a nuhmei kuomah, “Ei thi ngei ding a nih, Pathien ei hmu tlat sih a,” a tih a.

²³ A nuhmei ruok chun a kuomah, “LALPAIN mi sukhlum a tum dâm chun pumrawhmang thilinhlân le fâk ding thilinhlân ei inhlânhai kha pawm nuom da ni ie, hieng ang po pohai dâm hi min entir naw bawk a ta, hieng ang thilhai khawm hi tuta ṭum hin mi hril naw bawk a tih,” a tih a.

²⁴ Chun, nuhmei chun naupasal chu a hung nei tah a, a hmingah Samson an sak a; chun, nautê chu a hung inṭhanglien a, LALPAIN ama chu mal a sâwm a.

²⁵ Chun, Zora le Estaol inkâra Mahane-dana chun LALPA thlarauin ama chu a khîkhar ṭan tah a.