RORELTUHAI 11 - Pathien Lekhabu Inthieng (BSI)

Jepthain Ammon mihaia inthawka Israel a sansuok

¹ Tuhin Gilead mi Jepthah chu mi hrât huoisen a nih, ama chu nawchizawr naupa a nih. A pa chu Gilead a nih.

² Gilead nuhmei chun ama chu naupasalhai a neipêk bawk a; chun, a nuhmei naupasalhai chun an hung puitlingin Jepthah chu an hnawt suok a, a kuomah, “Nang chun chu ei pa insûng ro hluo thei naw ti nih, nuhmei dang le nau i ni leiin,” an tih a.

³ Chuongchun, Jepthah chu a unauhai laia inthawk chun a tlân hmang a, Tob ramah a um tah a; chun, Jepthah kuoma chun mi hotak takhai an um a, ama chu an zui hlak a.

⁴ A nakie deu chun Ammon mihai chun Israelhai chu an do tah a.

⁵ Ammon mihaiin Israelhai an hang do chun, Gilead mi upahai chu Tob rama Jepthah ṭhuoi dingin an fe suok tah a.

⁶ Chun, Jepthah kuoma chun, “Ammon mihai kan do theina dingin kan hotu takah hung um ta la,” an tih a.

⁷ Jepthah chun Gilead mi upahai kuoma chun, “In mi theida a, ka pa ina inthawk khan in mi hnawt suok a ni naw am a nih? In lunginzîng phinga iengdinga ka kuoma hung am in ni leh?” a lo tih a.

⁸ Gilead mi upahai chun Jepthah kuomah, “Chu lei tak chun a nih annâwm, tuhin nanga tieng kan hung ngha nâwk chu, Ammon mihai va do dinga keini le i fe theina dingin; chun, Gilead rama umhai po po chungah kan hotuah um i tih,” an tih a.

⁹ Chun, Jepthah chun Gilead mi upahai kuoma chun, “Ammon mihai do dinga in mi ṭhuoi nâwk a, LALPA- IN anni chu a mi pêk chun in hotuah um takzet ka ti maw?” a tih a.

¹⁰ Gilead mi upahai chun Jepthah kuomah, “LALPA chu ei inkâra hretu nîng a ta, i thu ang chun thaw ngei ngei kan tih,” an tih a.

¹¹ Chuongchun, Jepthah chu Gilead mi upahai kuoma chun a fe ve tah a, chun, mihai chun hotu le a lusa tak dingin an lo siem tah a; chun Jepthah chun Mizpaah LALPA hmaah thu iengkim an hril tah a.

¹² Chun, Jepthah chun Ammon mihai lal kuoma chun, “Ka chungah ieng am i tiha hienga ka ram do dinga ka kâwla hung el i ni lie?” tiin palaihai a tir a.

¹³ Ammon mihai lal chun, “Israel- hai Aigupta rama inthawka an hung suok lai khan ka ram an lâk leiin a nih, Arnona inthawka Jabbok le Jordan chenin; chuleiin, chu ramhai chu sêl loin mi hung pe nâwk el rawh,” tiin, Jepthah palaihai chu a lo dawn a.

¹⁴ Jepthah chun Ammon mihai lal kuoma chun palaihai a tir nâwk a,

¹⁵ a kuomah, “Jepthah chun hieng ang hin a tih, ‘Israelhaiin Moab ram an lâkpêk nawh a, Ammon mihai ram khawm an lâkpêk bawk nawh;

¹⁶ Aigupta rama inthawka an hung suokna Tuipui Sen chena thla- lêr kha an fe thleng a, Kades kha an tlung khan

¹⁷ Israelhai chun Edom lal kuom- ah, I ram min fe thlengtir rawh, kan hni che a nih, tiin palaihai an tir a; nisienlakhawm, Edom lal chun a lo ngaisak nuom nawh a. Chuong ang bawk chun Moab lal kuomah an tir nâwk a; nisienlakhawm, a lo remti nawh a; chuleiin, Israelhai chu Kadesa chun an um tah a.

¹⁸ Chu zoah thlalêr chu an fe thleng a, Edom ram le Moab ram chu an fe huol a, Moab ram saktieng pangah an feh a, Arnon khingtieng pangah an inkul a, Moab ram sûnga chu an lût dêr naw a nih, Arnon chu Moab ramri chin a ni sih a.

¹⁹ Chun, Israelhaiin Amorhai lal Sihon, Hesbon lal kuomah palaihai an tir a, Israelhai chun a kuomah, kan hmun tienga fe dingin i ram fe thleng kan tih, kan hni che a nih, an tih a.

²⁰ Nisienlakhawm, Sihon chun Israelhai chu a ram fe thleng ding chun a ring zo nawh a, Sihon chun a mihai po po chu ân khâwm a, Jahaz khuoah ân kul a, Israelhai chu a do tah a.

²¹ Chun, LALPA, Israelhai Pa- thienin Sihon le a rawihai po po chu Israelhai kutah a pêk a, an that tah a, chuongchun, Israelhai chun chu ram Amor mihai umna ram po po chu an nei ta vawng a.

²² Chuongchun, Amor mihai ramri chin po po Arnona inthawka Jabbok tlung rakin thlalêra inthawk Jordan tlung zakin an nei ta vawng a nih.

²³ Tuhin chuong anga LALPA Israelhai Pathienin a mi Israelhai hmaah Amor mihai chu a lâkpêk ta hnung chu, nangin i neipêk thei thu ding am a nih?

²⁴ I pathien Kemosin i puola a lo ruotpêk che chu i nei el ding a ni naw am a nih? Chun, LALPA kan Pathien- in kan hmaha a lâkpêkhai chu kan nei ding a nih.

²⁵ Moab lal Zippor naupa Balak nêkin i hrât lem am a nih? Ama chun Israelhai kha a chawkbuoiin a do hlak am a nih?

²⁶ Israelhai Hesbona le a khaw chînhaia dâm, Aroer le a khaw chînhaia dâm, Arnon ramri dep khawpuihai po poa chun kum za thum zet an um lai khan iengdinga la loa lo la um zing am i ni leh?

²⁷ Chuleiin, i chunga hin thil ieng- khawm ka suksuol nawh, nangma lem hin mi hung thaw i tum lei hin ka chungah thil i suksuol a nih; LALPA rorêltu chun tuhin Israel mihai le Ammon mihai kâra thu chu ngaituo raw se,’ a tih,” tiin.

²⁸ Nisienlakhawm, Ammon mihai lal chun Jepthah thu incha chu a lo ngai nuom nawh a.

²⁹ Chuongchun, LALPA thlarau chu Jepthah chungah a hung tlung a, Gilead le Manasse ram a fe thleng a, Gilead rama Mizpa a fe thleng a, chun, Gilead rama Mizpaa inthawk chun Ammon mihai kuomah a fe pei a.

³⁰ Chun, Jepthah chun LALPA kuomah ṭawng ân khâm a, “Ammon mihai hi ka kuta i mi pêk takmeu chun,

³¹ Ammon mihai kuoma inthawka râlmuonga ka in ka kîr nâwk pha chun iengkhawm ka kawtkhâra mi hung tuok hmasatak phawt chu, LALPA ta ding nîng a ta, pumraw- hmang thilinhlân dingin hmang ngei ngei ka tih,” tiin.

³² Chuongchun, Jepthah chu Am- mon mihai do ding chun a fe tah a; chun, LALPAIN a kutah a pêk tah a.

³³ Aroera inthawka Minnith chen- in a thaw pei a, khuo sâwmhni zet; chun, Abel-keramim chenin a that a that a. Chuongchun, Ammon mihai chu Israel mihai hmaa chun an lo tlâwm tah a.

Jeptha naunu

³⁴ Chun, Jeptha chu a umna khuo Mizpa chu a tlung tah a; chun, ngai ta, a naunu chun khuongtehai leh lâmin ama a lo tuok a, a nau nei sun a na, ama naw chu naunuhmei le naupasal dang hrim a nei nawh.

³⁵ Ama chu a hang hmu phingleh a puonhai a keithlêr a, “E khai, ka naunu, i mi suktlâwm ta hle el a; a mi suklungzînghai laia mi i ni ta hi! LALPA tiengah ka bau ka lo ka ta sih a, chu chu inphat nâwk thei ka ni ta nawh,” a tih a.

³⁶ Ama chun a kuomah, “Pa, LALPA tieng i bau lo ka ta che chu, i baua thu suok ang ngeiin ka chung- ah i thaw el ding a nih; LALPA chun i hmêlma Ammon mihai chunga ngei chun i phuba a lâk ta sih a,” a tih a.

³⁷ Chun a pa kuoma chun, “Hieng ang hin thâwng ka tih, thla hni sûng chu keia khâtin um hran ka ta, tlânga hai hang rawl ka ta, ka nunghâkna hi hang sûn ka tih, kei le ka ruolhai le hin,” a tih a.

³⁸ Ama chun, “Fe ta la,” a tih a. Chuongchun, thla hni thang dingin a tir a, a suok tah a, ama le a ruolhai le chun; chun, tlângahai chun a nu- nghâkna chu a hang sûn a.

³⁹ Thla hni hnunga chun a pa kuomah a hung kîr nâwk a, ama chun ṭawng a lo inkhâm ta ang khan, a chungah a thawh a, pasal tukhawma an pâwl nawh.

⁴⁰ Chuongchun, Israel naunuhai chun Gilead mi Jeptha naunu chu kum tin ni li sûn dânah an hung nei tah a.