RORELTUHAI 10 - Pathien Lekhabu Inthieng (BSI)

Tola le Jairin Israel ro an rêl

¹ Abimelek hnunga chun Israel- hai chu sansuok dingin Issakar mi Dod nau Pua naupa Tola a hung suok a, Ephraim tlâng ram Samir khuoah a um a.

² Kum sâwmhni le kum thum Israelhai ro a rêl a, chun a thih a, Samir khuoah an phûm a.

³ Chu hnunga chun Gilead mi Jair a hung suok a, kum sâwmhni le kum hni Israelhai ro a rêl a.

⁴ Ama chun naupasal sâwmthum, sabengtungte sâwmthum chunga chuong hlak mi a nei a, chun, Gilead rama chun khaw sâwmthum an nei a, chuong chu tu chen hin Havvoth-jair an tih.

⁵ Chun, Jair chu a thih a, Kamon khuoah an phûm a.

Ammon mihaiin Israel an nêksâwr

⁶ Israel mipui chun LALPA mit- hmua thil suol chu an lo thaw nâwk tah a, Baalhai le Astaroth, Suria mi- hai pathienhai, Zidon mihai pathien- hai, Moab mihai pathienhai, Ammon mihai pathienhai, Philistin mihai pathienhai rawng an lo bâwl tah a; chuongchun, LALPA chu an nghat- san a, a rawng an bâwl ta nawh a.

⁷ Chuongchun, LALPA chu Israel- hai chunga chun a lunginsen hle el tah a, Philistin mihai le Ammon thlahai kuomah a zawr tah a.

⁸ Chu kum chun Israel thlahai chu an suklungzîngin an nêksâwr êm êm el a, Jordan râl Gilead rama Amor mihai rama Israel mi umhai po po chu kum sâwm le kum riet sûng rau an nêksâwr a.

⁹ Chun, Ammon thlahai chu Juda mihai, Benjamin hnamhai le, Ephra- im pahnamhai do dingin Jordan râl an kai a; chuongchun, Israelhai chu namên loin an lunginzîng tah a.

¹⁰ Chun, Israel mihai chun, “Kan Pathien chu kan lo nghatsan chie ta cheh a, Baalhai rawng chu kan lo bâwl ta leiin i chungah thil kan lo suksuol tah a nih,” tiin LALPA an ko a.

¹¹ LALPA chun Israel mihai kuom- a chun, “Aigupta mihaia inthawk, Amor mihaia inthawk, Ammon mihaia inthawk le, Philistin mihaia inthawk dâmin ka sansuok cheu ni lo am a nih?

¹² Zidon mihai, Amalek mihai, Maon mihai khawma an nêksâwr cheu a; chun, in mi ko a, an kuta inthawkin ka sansuok cheu a.

¹³ Chuong sa khawma nangnîn in mi nghatsan a, pathien danghai rawng chu in bâwl ta lem a; chuleiin, sansuok ta naw ning cheu ah.

¹⁴ In ithlang pathienhai chu ko ta unla, anni chun in lunginzîng pha chun sansuok el raw hai se cheu chu,” a tih a.

¹⁵ Chun, Israel mihai chun LALPA kuomah, “Thil kan lo suksuol tah a nih; nangin ṭha i ti ang angin kan chungah thaw la, kan hni che hi, a san ruok chu vawisûn hin mi hung sansuok hrâm raw khai,” an tih a.

¹⁶ Chuongchun, anni laia hnam dang pathienhai chu an sie hmang vawng a, LALPA rawng chu an bâwl tah a; chun, Israelhai lunginzîngna lei chun a lungril a lungngai ta bêk bêk el a.

¹⁷ Chun, Ammon mihai chu an pungkhâwm a, Gileadah an vân kul a, Israel mihai chu an inkhâwm veh a, Mizpaah an inkul a.

¹⁸ Chun, mipuihai, Gilead rama mi lienhai chu an inbiek a, “Ammon mihai thaw phuttu ding hi tu am a um a? Gilead ram po poa hotuah um a tih,” tiin.