RORELTUHAI 1 - Pathien Lekhabu Inthieng (BSI)

Juda le Simeonin Adoni-bezek an man

¹ Josua thi hnung chun Israel thlahaiin, “Keini ta dinga Kanaan mihai chu thawha do dingin tu am hang fe hmasa phawt a ta le?” tiin LALPA chu an râwn a.

² LALPA chun “Juda hang fe raw se, ngai ta u, a kutah ram chu ka pêk tah a nih,” a tih a.

³ Juda chun a unau Simeon kuom- ah, “Kanaan mihai hang thaw dingin ka ram bituma hin hung ve la, kei khawm i ram bitumah hung vêng ka tih,” a tih a. Chuongchun, Simeon chun a fepui tah a.

⁴ Juda chu a hang feh a; chuong- chun, Kanaan mihai le Periz mihai chu an kutah LALPAIN a pêk tah a, Bezekah mi sîng khat an that tah a.

⁵ Bezeka chun Adoni-bezek an hang hmuh a; an thawh a, Kanaan mihai le Periz mihai chu an that ṭeu a.

⁶ Adoni-bezek ruok chu a tlân a; nisienlakhawm, an hnawt a, an man a, a kutpuihai le a kepuihai an tan- pêk a.

⁷ Adoni-bezek chun, “Lal sâwmsari kutpui le kepui tan bawnga umhai chun ka dawkân hnuoia bumal an rût hlak a, ka thaw ang chiein Pathien chun a mi hung thung ve an ta hi,” a tih a. Chun, Jerusalemah an ṭhuoi a, chutaka chun a thi tah a.

Judain Jerusalem le Hebron a lâk

⁸ Chun, Juda thlahai chun Jerusalem chu an hang do a, an lâk a, kâwlhnâmin an that a, khawpui chu an raw tah a.

⁹ Chu hnunga chun Juda thlahai chu Kanaan mihai tlâng rama um dâm, simtienga um dâm, phaia um dâm chu do dingin an zu feh a.

¹⁰ Chun, Juda chun Kanaan mihai Hebrona umhai chu a va thawh a (a hma chun Hebron hming chu Kiriath- arba a nih), chuongchun, Sesai, Ahiman le Talmai chu an that a.

Othnielin Debir a lâk le Aksa a nei thu

¹¹ Chutaka inthawk chun Debira umhai chu an va thawh a (a hma chun Debir chu Kiriath-sepher a nih).

¹² Kaleb chun, “Tukhawm Kiriath- sepher chu thawha, la taphawt chu ka naunu Aksa hi nuhmeiah inneitir ka tih,” a tih a.

¹³ Chun, Kaleb sangpa Kenaz naupa Othniel chun a lâk a, chuongchun, a naunu Aksa chu nuhmeiah ân neitir tah a.

¹⁴ Aksa chun Othniel kuom a va tlung chun a pa kuomah ram hni dingin ama chu a thlêm a; chun, a sabengtung chunga inthawk chun a ṭum a, Kaleb chun a kuomah, “Ieng am i dita le?” a lo tih a.

¹⁵ Ama chun a kuomah, “Thilpêk mi pe rawh, Simtieng rama i mîn umtir ta si hin chu tui hnâr neihai mi pe la,” a tih a. Chuongchun, Kaleb chun tui hnâr nei thlanghnunghai le sakhnunghai chu a pêk tah a.

Juda le Benjamin ram lâk chin

¹⁶ Chun, Mosie tarpupa Ken thla- hai chu Arad sim tienga Juda ram thlalêra chun Juda thlahai leh tûm khawpuia inthawk chun an hang feh a; anni lai chun an hang um ve tah a.

¹⁷ Juda chu a unau Simeon le chun an inthawk a, Zephatha um Kanaan mihai chu an that a, an sukchimit dêr a. Chu khawpui hming chu Horma an tih.

¹⁸ Juda chun Gaza le a ram chin, Askelon le a ram chin, Ekron le a ram chin khawm a lâk a.

¹⁹ LALPA chu Juda kuoma chun a um a; chuongchun tlâng rama umhai chu a hnawt hmang vawng a, phai- zâwla umhai ruok chu thîr tawlailîr- hai an nei leiin a hnawt suok thei nawh.

²⁰ Chun, Mosiein a lo hril ta angin, Kaleb chu Hebron pêk a nih a; chu- taka chun Anak naupasalhai pathum chu a hnawt suok a.

²¹ Benjamin thlahai ruok chun Jerusalema um Jebus mihai chu an hnawt suok nawh a, Jebus mihai chu Benjamin thlahai leh tu chen hin Jerusalemah an la um hmunkhat ta zing a nih.

Josefin Bethel a lâk

²² Josef sûngkuohai khawm chu Bethel thaw dingin an hang suok veh a, an kuomah LALPA chu a um a.

²³ Chun, Josef sungkuohai chun Bethel enthlatu ding mi an tira (a hma chun chu khaw hming chu Luz a nih).

²⁴ Enthlatuhai chun khaw sûnga inthawka mi pakhat hung suok hi an hmuh a, a kuomah, “Kan hni che hi, khawpui sûng lûtna mi kâwkhmu raw khai; chuongchun, keini khawma ṭhatakin kan thaw ding che a nih,” an tih a.

²⁵ Chun, khawpui sûng lûtna chu a kâwkhmuh a, chuongchun, kâwl- hnâmin chu khuo chu an thawh a, chu mipa le a sûnghai po ruok chu an hlah a.

²⁶ Chu mipa chu Hit mihai rama chun a lût a, khuo a siem a, chu khuo chu a hmingah Luz ân bûk a; tu chen hin chu hming chu a la put zing a nih.

Manasse le Ephraim ram lâk chin

²⁷ Manasse chun Beth-sean le a khaw chinhaia umhai, Taanak le a khaw chinhaia umhai, Dor le a khaw chinhaia umhai, Ibleam le a khaw chinhaia umhai, Megiddo le a khaw chinhaia umhai chu a hnawt suok nawh a; chu rama chun Kanaan mihai chu an um zing ta lem a.

²⁸ Israel thlahai chu an hung hrât tiel tiel china khan chu Kanaan mihai chu sinthawha ruoi dingin an inumtir a, an hnawt suok fai rêt ta nawh a.

²⁹ Ephraim chun Gezera Kanaan mi umhai chu a hnawt suok nawh a; Kanaan mihai chu Gezera chun anni lai an um ve ta lem a.

Hnam danghai ram lâk chin

³⁰ Zebulun chun Kitron khuoa umhai le Nahalal khuoa umhai chu a hnawt suok nawh a; Kanaan mihai chu anni lai an um veh a, sinthawha ruoi dingin an um ta lem a nih.

³¹ Aser chun Akkoa umhai, Sidona umhai, Ahlaba umhai, Akziba umhai, Helbaa umhai, Aphika umhai, Rehoba umhai, a hnawt suok nawh a;

³² Aser thlahai chu chu rama um Kanaan mihai laia chun an um ve ta lem a, anni chun an hnawt suok naw leiin.

³³ Naphtali chun Beth-semesa umhai le Beth-anatha umhai a hnawt suok nawh a; chu rama um Kanaan mihai lai chun an um ve ta lem a; amiruokchu, Beth-semesa umhai le Beth-anatha umhai chu an sinthaw- a ruoi dingin an um tah a nih.

³⁴ Amor mihai chun Dan thlahai chu tlâng ramah an hnawt kai a, ruoma an fe thlâk chu an phalpêk si nawh a.

³⁵ Amor mihai ruok chu Har-heres tlânga dâm, Aijalona dâm, Saalbima dâm an um ta zing a, nisienlakhawm, Josef sûnghai kut chu an chungah a hrât a, an sinthawtua hmang dingin an hung um tah a.

³⁶ Chun, Amor mihai ramri chu Akrabim hang fena le Selaa inthawka a tunga fe pei a nih.