ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 8 - Pathien Lekhabu Inthieng (BSI)

Thlaraua hringna chu

¹ Chuongchun, tuhin chu Krista Isua umhai ta ding chun thiem- naw inchangtirna hrim a um ta nawh.

² Krista Isua Hringna Thlarau dân chun suolna le thina dâna inthawk chun a mi sansuok ta sih a.

³ Tisa leiin Dân chu a hrât nawh a, a thaw thei ruol naw chu Pathienin ama Naupa ngei tisa suol ang putin suol thawina dinga hung tirin, tisaa suolna um chu thiemnaw ân changtir tah a nih,

⁴ tisa dân hraw lo a, Thlarau dân hraw lemtu einia hin Dân thu ruot chu hlena a um theina dingin.

⁵ Tisa dâna umhai chun tisa tieng thilhai an dit hlak; Thlarau dâna umhai ruok chun thlarau tieng thilhai an dit hlak. Tisa tieng thil dit chu thina a ni sih a;

⁶ Thlarau tieng thil dit ruok chu hringna le lungmuongna a nih;

⁷ tisa dit zâwng chu Pathien dona a ni sih a. Chu chu Pathien dânin a um nghâl si nawh a, um khawm a um thei bawk nawh.

⁸ Chuleiin, tisaa umhai chun Pathien an suklâwm thei nawh.

⁹ Chuongchun, Pathien Thlarau chu nangniah a chêng takzet a ni chun, tisaa um ni loin, Thlaraua um in ni lem. Tukhawm Krista Thlarau nei naw chu ama mi a ni nawh.

¹⁰ Krista chu nangniah a um ruok chun, in taksa chu suolna leia thi khawm ni sien, Pathiena thiem changa um in ni leiin in thlarau chu a hring a nih.

¹¹ Nisienlakhawm, mithi laia inthawka Isu keitho nâwktu Thlarau kha nangniah a um chun, mithi laia inthawka Krista Isu keitho nâwktu khan nangnia um Thlarau zâra chun, in taksa thi theihai chu sukhring bawk a tih.

Pathien Nau nina

¹² Chuleichun, unauhai, bat ei nei, tisa dâna um lo dingin, tisa kuoma khawm ni bawk loin.

¹³ Tisa dâna in um chun in thi ngei ding a nih; amiruokchu, taksa thil- thawhai chu Thlaraua in sukhlum hlak chun hring in tih.

¹⁴ Pathien Thlarau ṭhuoia umhai po chu Pathien nauhai an ni sih a.

¹⁵ Ṭia um nâwk dingin suok nina thlarau in hmu a ni si nawh a; nau nina thlarau in hmu lem a nih; chu thlarau zâra chun, “Abba! (Pa)” tiin ei khêk hlak hi.

¹⁶ Thlarau ngei chun, eini thlarau leh, Pathien nauhai ei nih ti a mîn hriettir hlak.

¹⁷ Chun, nauhai ei ni chun ro- hluotuhai, Pathien rohluotu, Krista hluopuituhai ei nih; chuleiin, ama ei tuorpui ding a nih, a kuoma chawimawia ei um ve theina dingin.

Ropuina hung inlang ding chu

¹⁸ Tulaia tuornahai hi ei chunga ropuina suklanga la um ding le chun hrilkhi khawpa ka ngai si nawh a.

¹⁹ Thilsiemhai chun beiseitakin Pathien nauhai hung inlangna chu an nghâkhla hle sih a.

²⁰ Thilsiem po pohai chu, thil teplo thu thua inumtirin an um tah; an nuoma um an ni nawh a, ân umtirtu lei a ni lem a nih.

²¹ Beiseina neiin thilsiemhai po po khawm chu sietna suoka inthawka insuoin um an ta, Pathien nauhai zalênna ropuia chun an lût ding a ni sih a.

²² Thilsiem po pohai chu tu chen hin inrûm le nauhasena tuorin an um tâwl ti ei hriet sih a.

²³ Chu chau khawm chu ni loin, eini, Thlarau rahmasa neituhai ngei khawm hin, nau ei nina (ei taksa intlanna) chu nghâkin, eini meu khawm ei lungrilin ei inrûm sih a.

²⁴ Beiseinain a nih, sandama ei um chu; nisienlakhawm, hmu thei zing beiseina hi beiseina a ni nawh a, miin a hmu thei zing chu iengtin am a la beisei hlak a?

²⁵ Ei hmu naw chu ei beisei chun ei nghâk fan fan hlak a nih.

²⁶ Chuong ang bawkin, Thlarau chun ei hrât nawnahaiah a mi ṭhang- pui hlak a; ieng anga ṭawngṭai ding am a ni ti ei hriet si nawh a; nisienlakhawm, Thlarau chun inrûm hril ruol loin a mi ṭawngṭai pêk hlak.

²⁷ Chun, Pathien dit zâwng ang peiin mi inthienghai chu a ṭawngṭai pêk hlak leiin, lungrilhai entu chun Thlarau dit zâwng chu a hriet hlak a nih.

²⁸ Chun, Pathien hmangaituhai amain a ruot anga a kohai ta ding chun, an ṭhatna dingin iengkimin a thawpêk hlak ti ei hriet a.

²⁹ A hrietlâwkhai chu ama Naupa ang taka um dingin a ruot lâwk sih a, a Naupa chu unau tamtak laia nau lutîr a hung ni theina dingin.

³⁰ Chun, a ruot lâwkhai chu a ko bawk a; a kohai chu thiem ân changtir bawk a; chun, thiem ân changtir hai chu a châwimâwi bawk a.

Krista Isua Pathien hmangaina

³¹ Chuong thua chun ieng am hril tâng ei ta? Pathien eini tieng a ṭhang chun tuin am mi do thei a ta?

³² Ama naupa ngei khawm hla loa, ei rênga aia petu chun, thil dang po po khawm a thlâwnin a mi pêk sa naw ding am a nih?

³³ Pathien mi thlanghai chu tuin am hêk a ta? Thiem inchangtirtu kha Pathien a ni sih a.

³⁴ Tuin am thiemnaw inchangtir a ti leh? A thi chu Isu Krista chu a ni sih a, anih, mithi laia inthawka tho nâwk ta lem a, Pathien changtienga uma a mi hrilpêktu bawk kha a nih.

³⁵ Krista hmangainaa inthawk chu tuin am mi ṭhêng a ta? Rinum- nain amanih, lungngainain amanih, suknawmnatnain amanih, ṭâmin amanih, saruoknain amanih ṭiumin amanih, kâwlhnâmin amanih a mi ṭhe ding am a nih?

³⁶ “Nangma leiin sûnnithlâkin thatin kan um hlak; Berâm that ding anga ngai kan nih,” tia ziek ang khan.

³⁷ Ṭhe lo e! chuong po poa chun, a mi hmangaitu lei chun ropuitaka hnetu ei nih.

³⁸ Chiengtakin ka hriet a nih; thina dâm, hringna dâm, vântirko dâm, inlalna dâm, thil umsa le a la um ding dâm,

³⁹ thilthawtheina dâm, insângna dâm, inthûkna dâm, thilsiem dang hrim hrim khawmin ei Lalpa Krista Isua um Pathien hmangainaa inthawk chun mi ṭhe naw ni.