ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 4 - Pathien Lekhabu Inthieng (BSI)

Abraham enkhina chu

¹ Anleh, Abraham, tisa dâna ei thlatu chun a hmu ieng am hril ei ta?

² Abrahamin a thilthaw leiin thiem a chang si chun, suong ding a nei a nih; Pathien tieng ruok chun a nei nawh a;

³ Pathien Lekhain ieng am a hril a? “Abraham chun Pathien a ring a, chu ringna chu a felnaa ngai a nih,” tiin a hril a nih.

⁴ Chun, sinthawtu hlaw chu lunginsietnaa ngai a ni nawh a, bat anga ngai a ni lem a nih.

⁵ Amiruokchu, mi, a thilthawa innghat loa, Pathien hre nawhai thiem inchangtirtu ring lemtu ringna chu, a felnaa ngai a nih.

⁶ Mi, a thilthaw ngaituo loa, Pathienin fela a ingaihai hamṭhatzie chu David khawmin:-

⁷ “An bawsietnahai ngaidama umhai le, An suolhai inkhuma um chu An hamṭha.

⁸ Lalpain suol neia a ingai naw chu an hamṭha,” tia a hril ang khan.

⁹ Anleh, chu hamṭhatna chu sertanhai chung chau âm a ni a um, sertan nawhai chunga khawm? “Abraham ringna chu a felnaa ruot a nih” ei ti sih a.

¹⁰ Chu chu iengti ziea ngai am ni tâng a ta? A sertan hmain am a ni, a sertan hnungin? A sertan hnungin a ni nawh a, a sertan hmain a ni lem a nih.

¹¹ Chuongchun, sertan loa a um laia, ringnain felna chu a hmu ti inhrietna, sertan inchikna chu a hmuh a, chu felna chu an ta dinga ruot a nina dingin sertan lohai laia ringtuhai po po pa a ni theina dingin,

¹² sertanhai pa khawm a ni thei bawkna dingin– sertanhai pa chau a ni nawh a, ama, ei pa Abraham sertan loa a um laia, ringna a nei anga nei fâwmhai pa a ni lem a nih.

Thutiem chu ringnaa hriet a nih.

¹³ Dân leiin Abraham le a thlahai kuoma chun khawvêl ro hluo ding thu chu tiem a ni nawh a, ringnaa felna lei a ni lem.

¹⁴ Dâna mihai rohluotuhai an ni si chun, ringna ienga khawm hmang a ni ta nawh a, thutiem khawm chu iengkhawm a ni ta nawh;

¹⁵ Dân chun lunginsenna a siem hlak sih a; Dân um nawnaa chun bawsietna khawm a um bawk nawh.

¹⁶ Chuleiin, lunginsietna a ni theina dingin, ringna leiin a nih hi suon po pohai chun thutiem chu matheiloa an hmu chu. Dân nei mi chauin an hmu ding a ni nawh a, Abraham ringna ang ringna neihai khawmin hmûng an tih. Abraham chu ei rênga pa a nih,

¹⁷ mithihai sukhringtu le, thil umnawhai a taka inumtirtu, a iring Pathien mithmua chun; “Chi tam- takhai pain siem ka ti che” tia ziek ang khan.

¹⁸ Beiseina âwm a um naw khawmin beiseitakin a ring a, chi tamtakhai pa a hung ni theina dingin, “Khi zât khin i thlahai la um an tih,” tia hril ang khan.

¹⁹ Chun, ringna detlo chuong loin, a taksa thi tah anga um chu a ngaituoh a, ama chu kum za lai mi a ni sih a, Sara ching khawm a ngaituo bawk a.

²⁰ Nisienlakhawm, ringna tlasam- in Pathien thutiem chu a ringhla chuong nawh a, Pathien a châwimawi a;

²¹ a thutiem chu ân hlawtling tir thei ti a ring hle bawk a, a ringna chu a hung det lem tah a.

²² Chuleiin a ringna chu a felnaa ngai a hung ni tah.

²³ Chuongchun, a ringna chu a felnaa ngai a ni ti ama ta ding chaua ziek a ni nawh a,

²⁴ Isu, ei Lalpa mithi laia inthawka keithotu ringtu einihai ta ding khawmin a nih, ei ringna chu felnaa ngai nîng a tih.

²⁵ Chu Isu chu ei suolna leiin inmantirin a um a, thiem ei changna dingin keithoin a um bawk a.