ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 2 - Pathien Lekhabu Inthieng (BSI)

Pathien rorêlna indik chu

¹ Chuleiin, aw mihriem, mi sawi- sêltu tûkhawm ni la, suonlam hrim i nei nawh, mi dang i sâwisêlna ngeia chun nang le nang thiemnaw inchangtir i nih i sawnnaw! nang a sawisêltu ngei khawma, chuong ang thil chu i thaw ve hlak sih a.

² Chuong thil thaw hlaktuhai chunga Pathienin a sawisêlna chu thu indiktak a nih ti ei hriet sih a.

³ Aw mihriem, chuong ang thil thaw hlaktuhai sawisêltu, nangin chuong ang chu i thaw ve bawk sih a, Pathienin a sawisêlna chu pumpel în ring am a ni?

⁴ Annawleh, Pathien ṭhatnain simna dingin a ṭhuoi hlak che ti hre loin, a ṭhatna hauzie le, a en theizie le, a zaidaw theizie dâm chu i ngainêp am a nih?

⁵ I lulul le i lungril ngar leiin, lungsenna le Pathien rorêlna feltak hung inlang ding nia ding chun i chungah lungsenna în khâwlkhâwm a ni lem a nih.

⁶ Pathien chun mi tin an sinthaw ang peiin rêlpêk a tih,

⁷ thil ṭha thaw fan fana, ropuina le chawimawina le bohmang thei nawna zawngtuhai kuoma chun kumkhuoa hringna pêng a tih.

⁸ Amiruokchu, kâwmaw suoh a, thutak zâwm loa fel nawna zâwm lemtuhai chunga chun Pathien lung senna le lungawinawna um a tih.

⁹ Rinumna le lungngaina nasatak, mihriem thil suksuol pohai thlarau chungah um a ta, Juda mi thlarau chungah um hmasâng a ta, chun, Grik mi thlarau chungah um nâwk a tih.

¹⁰ Amiruokchu, thil ṭhataka thaw- tuhai po po kuoma chun ropuina dâm, chawimawina dâm, lung- muongna dâm pêk nîng a tih; Juda mihai kuomah pêk hmasak nîng a ta, chun, Grik mihai kuomah ni nâwk a tih.

¹¹ Pathienin mi ditsak bîk a nei si nawh a.

¹² Tûkhawm Dân nei loa thil suksuol chu Dân boin bohmang a ta; chun, tûkhawm Dân nei zinga suksuol chu, Dâna rêlpêkin um a tih.

¹³ Dân hretu ringawthai chu Pathien mithmuin mi fel an ni nawh a, Dân anga thawtuhai chu mi fela tiemin um lem an tih.

¹⁴ Dân nei naw Jentailhai hmanin an lungril insiengpuia dân thilhai kha an thawin, Dân nei naw hai sien khawm anni le anni chu dânah an insiem fâwm a,

¹⁵ an lungrilah dân sinthaw chu ziek a nih ti an inentir a; chu chu an sie le ṭha hrietnain an hrietpui a, an lungrilhai chu ân sêl a, akâr leh thiem ân changtir vak a, akâr leh thiemnaw ân changtir vak a.

¹⁶ Pathienin ka Chanchin Ṭha hril anga mihriemhai thurûk Isu Krista hmanga a ngaituo ni chun chuong ang chu nîng a tih.

Judahai le Dân chu

¹⁷ Nisienlakhawm, nang Juda hming put i ni sih a, Dân chu i ringsan a, Pathien i suong a,

¹⁸ a dit zâwng i hriet a, Dân thu inchûktirin i um leiin thil ṭhatak chu ṭha i tih a,

¹⁹ nang ngei chu mitdelhai ṭhuoitu, inthima umhai êntu;

²⁰ invêthai sukvartu le nautêhai inchûktirtu niin în ring a, Dâna chun varna le thutak um dân i nei leiin.

²¹ Chuong ang i ni si chun, nang mi danghai inchûktirtu, nang le nang în chûktir naw am a nih?

²² Nang inru lo dinga mi dang hriltu, nangin în rûk hlak maw? Nang uire lo dinga mi dang hriltu, nang i uire maw? Nang milim theidatu, nangin milim biekna ina thilhai chu în rûk hlak maw?

²³ Nang Dân suongtu, nangin Dân i bawsiet leiin Pathien chu i suk- hmingse hlak a ni maw?

²⁴ An ziek ang ngei khan, Pathien hming chu nangni leiin Jentailhai laiah sukpâwiin a um ta a ni hi.

²⁵ Dân zâwmtu i ni chun sertan chu a sâwt tak zet a nih; Dân bawsetu i ni ruok chun i sertan chu tan naw ang el a lo ni tah.

²⁶ Chuleiin, sertan naw mîn Dân thu ruothai chu a vawng chun, a sertan naw chu tan anga ngai a ni naw ding am a nih?

²⁷ Chun, mani insieng ziea sertan loin Dân chu a zâwm kim chun, nang, lekha thu le sertan dân nei sia Dân bawsetu chu a sawisêl naw ding che maw?

²⁸ Ân lang ela Juda mi ni chu Juda mi tak a ni nawh a; ân langa taksa mei meia sertan chu sertan tak tak a ni chuong naw bawk.

²⁹ Amiruokchu, ân lang el ni loa Juda mi ni chu Juda tak a nih; chun, sertan tak chu lungril tienga tan a nih, Lekha thu ela ni loin, Thlarauah a nih; ama chun mihriem inpâk a hlaw nawh a, Pathien inpâk a hlaw lem hlak.