ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 14 - Pathien Lekhabu Inthieng (BSI)

I unau sawisêl naw

¹ Chun, ringnaa hrât naw mi chu, a ringhlana sawisêl loin, lâwm lem ro.

² Mi pakhatin iengkim fa theiin ân ring a, mi hrât naw ruok chun thlai chau a fâk hlak.

³ Iengkim fa mi chun a fa naw chu hmusit naw raw se; a fa naw khawm chun a fatu chu sawisêl naw raw se; Pathienin ama chu a lâwm tah annâwm.

⁴ Mi dang siehlaw sawisêltu chu tu am i ni leh? a ngîr le a tlûk chu ama hotupa ta ding a nih. Nisienlakhawm, ama chu inngirtirin um a tih, Lalpa chun ân ngîrtir thei sih a.

⁵ Mi pakhatin ni khat hi ni dang nêkin a ngaihlu bîk hlak a, mi dangin ni po po chu inang sengin a ngai hlak a nih. Mi tin mani lungrilah inhre chieng raw se.

⁶ Ni insertu chun, Lalpa chawi- mawina dingin ân ser hlak a na. Iengkim fatu chun, Pathien kuomah lâwm thu a hril a, Lalpa chawi- mawina dingin a fâk hlak a nih; a fa nawtu khawm chun, Pathien kuomah lâwm thu a hril a, Pathien chawimawina dingin a fâk naw hlak a nih.

⁷ Tûkhawm mâni ta dinga hring ei ni nawh a, tûkhawm mâni ta dinga thi ei ni bawk nawh.

⁸ Ei hring chun Lalpa ta dingin ei hring a, ei thi khawmin Lalpa ta dingin ei thi a ni sih a; chuleiin, ei hring khawmin ei thi khawmin Lalpa ta ei nih.

⁹ Krista thina le a hung hring nâwkna san chu mi dam le mi thi Lalpa a ni theina hi a ni sih a.

¹⁰ Nisienlakhawm, nangin ieng dinga i unau i sawisêl am a na? annawleh, nangin ieng dinga i unau i hmusit am a na? Pathien rorêlna ṭhungpha hmaah ei rêngin ei la ngîr ding a ni sih a.

¹¹ “Lalpa chun, ‘Mi tinrêng Ka hmaah kûn an ta, Lei tinrêng khawm Pathien kuomah inphuong an tih,’ Tiin ṭawng kân khâm a nih,” a tih a, ti ziek ang khan.

I unau tlûkna ding siem naw

¹² Chuongchun, ei rêngin Pathien kuomah mâni chanchin ei hril seng ding a nih.

¹³ Chuleiin, insawisêl tâwl ta nâwm ei niu khai; tûkhawmin mâni unau kalna amanih tlûkna amanih siem naw tum lem seng ro.

¹⁴ Ama le ama ngawt chun ân thieng naw iengkhawm a um nawh ti Lalpa Isua chun ka hriet hle a nih, thil inthieng loa ngaitu ta ding chun, ama ta ding chun ân thieng naw a nih.

¹⁵ I thil fâk leia i unau lungril a na chun, hmangai dân kawng chu i hraw ta nâw a nih. A thi ai Kristain a thipêk chu i thil fâkin sukbo naw rawh.

¹⁶ Chuongchun, in ta dinga ṭhatna chu suola hrilin um naw raw se;

¹⁷ Pathien ram chu dâwn le fâk tieng thu a ni si nawh a; felna dâm, inremna dâm, Thlarau Inthienga lâwmna dâm a ni lem ie.

¹⁸ Tûkhawm, chuong thua Krista rawng bâwl chu, Pathien lâwm zâwng le mihriem inpâkin a um hlak.

¹⁹ Chuongchun, inremna le insuk- sâwt tuona ding thilhai chu hnawt ei tiu.

²⁰ I thil fâk leiin Pathien sinthaw sukse naw. Thil po po chu ân thieng ngei, nisienlakhawm, a thil fâkin mi a sukthlûk chun, a fatu ta dingin suol a nih.

²¹ I unau tlûkna ding a ni chun, sa fâk lo dâm, uoin dâwn lo dâm, thil iengkhawm thaw lo a ṭha lem a nih.

²² Ringna i nei chu Pathien hmaah nang chau ihrietin nei el rawh. Mâni ṭha ti kawnga thiemnaw inchangtir naw chu a ham ṭha.

²³ Amiruokchu, ringhlatuin a fâk chun, ringnain a fâk naw leiin thiemnaw a chang a nih; iengkhawm ringna boa thaw chu suol a ni sih a.