ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 13 - Pathien Lekhabu Inthieng (BSI)

Rorêltuhai thu awi ding

¹ Mi tin an chunga rorêltuhai thu thuin um raw se. Pathien thu loin tukhawm rorêltu an um ngai si nawh a; rorêltua umhai hi Pathien iruot an nih.

² Chuleiin, tûkhawm rorêltu kal chu Pathien iruot kal a nih; a kaltuhai chun anni chungah rorêlna hmûng an tih.

³ Rorêltuhai chu thil ṭha thaw- tuhai ta ding chun ṭium an ni nawh a, thil ṭha naw thawtuhai ta ding ruok chun ṭium an nih. Anleh, rorêltu ṭi loa um i nuom am? Thil ṭha thâw la, a înpâk hlâwng i tih;

⁴ ama chu i ṭhatna dinga Pathien rawngbâwltu a ni sih a. Nisien- lakhawm, thil suol i thaw chun ṭi rawh, kâwlhnâm chu a chawi mei mei si nawh a; ama chu Pathien rawng- bâwltu, thil suksuoltuhai chunga lunginsenna phuba latu a ni sih a.

⁵ Chuleiin, lunginsenna ṭi lei chau ni loin, i sie le ṭha hrietna lei khawmin rorêltu thu thuin i um ding a ni hrim a nih.

⁶ Hi lei hin annâwm sie khawm in chawi hlak; chuong ang thil ngei thaw fan fan dinga Pathien rawng- bâwltuhai an ni sih a.

⁷ Mi po po kuomah pêk ding taphawt chu pe ro; leiman pêkna ding kuoma chun leiman pe unla, sie chawina ding kuoma chun sie chawi unla, ṭi ding chu ṭi unla, inza ding chu inza ro.

Unau inhmangaina

⁸ Inhmangai tuona ngawt naw chu tû iengkhawm bat naw ro; mâni mihriempui hmangaitu chun dân chu a zâwm famkim ta sih a.

⁹ Hieng, “Uire naw, tuol that naw, inru naw, inhnar naw,” ti le thupêk danghai hrim hrim hi, “Nangma în hmangai angin i vênghai i hmangai ding a nih,” ti hin a khai khâwm vawng a nih.

¹⁰ Hmangainain vênghai a suk- khawhlo ngai nawh a, chuleiin hmangaina hi dân hraw famkimna a nih.

Krista ni hung hnai zie

¹¹ Tulai thil umzie in hriet lei le, inhai ta dingin innaa inthawkin ṭhanghar a hun ta takzet ti in hriet leiin chu chu ka hril a nih; tuhin chu ei awi phut lai nêk khan chu ei sandamna chu a hnai lem ta sih a.

¹² Zân hi a bo vâng vâng tah a, khuo a var ding a ni tah, chuleiin inthimna thilthawhai chu pei inla, var thuomin inthuom ei tiu khai.

¹³ Sûna um angin mawitakin um ei tiu, zu dâwn buoi le zu inruia um loin, hur le indit hmanga um loin, insuol le inîtthîka um loin,

¹⁴ Lalpa Isu Krista chun inthuom lem unla, in tisa inhâwkna puitlin dingin iengkhawm insiem naw ro.